Mai te neneiraa o Te Pare Tiairaa no Tiurai 2011, ua piahia te hoê neneiraa Beretane faaohiehia no te hoê matahiti tamataraa. I teie nei, ua oti te tamataraa e ua faaotihia ia tamau noa te piaraa o Te Pare Tiairaa faaohiehia.

Mai Tenuare 2013, te vai atoa ra te reira na roto i te reo Farani, Potiti e Paniora.

Ua piahia te neneiraa faaohiehia no te tauturu i te feia e haere ra i te Piha a te Basileia no te mau putuputuraa a te amuiraa na roto i te reo Beretane, aita râ te reira to ratou reo tumu.

Mai te neneiraa matamua iho â, e rave rahi mau rata haamauruururaa tei papaihia. Hoê no ô mai ia Rebecca, e 64 matahiti to ˈna, o te ora nei i Libéria e o tei ore i haere aˈe i te haapiiraa. Teie ta ˈna i papai: “Te haapii ra vau i te taio. I te tahi taime ia taio anaˈe vau i Te Pare Tiairaa, aita vau e taa noa ˈˈe. Mea au roa na ˈu te neneiraa faaohiehia. Ua taa maitai ia ˈu i te reira.”

E faaohipa atoa e rave rahi mau metua i te neneiraa faaohiehia no te tauturu i ta ratou mau tamarii ia faaineine ia ratou no te Haapiiraa o Te Pare Tiairaa, hoê o te mau putuputuraa a te mau Ite no Iehova.

Ua papai o Rosemary, e toru mootua tamahine ta ˈna: “Mea fifi roa te haapiiraa i Te Pare Tiairaa e ta ˈu mau mootua tamahine. E tia ia faaohipa i te titionare no te ite i te auraa o e rave rahi mau taˈo. Pau rahi te taime no te taa i te mau taˈo, ere roa ˈtu ai te mau tamarii i te manaˈo faufaa. I teie nei, e rave tatou i taua taime no te taio i te mau irava faahitihia e no te imi i te taairaa i rotopu i te reira e te haapiiraa.”