E nafea matou e pata ˈi i te mau hohoˈa tano no ta matou mau papai? No te pahono atu, a hiˈopoa na i te hohoˈa o te api matamua o te vea A ara mai na! no Tetepa 2015 (Farani). a

• Te hohoˈa. Na te Tuhaa o te mau hohoˈa itehia i te Pu haapiiraa a te mau Ite no Iehova i Patterson, New York e haapao i te reira. Na mua roa, ua taio ratou i te tumu parau “L’argent et vous.” I muri iho, ua papai ratou i te tahi mau hohoˈa rii e tuea ra i te tumu parau. Na te Tomite papairaa o te Tino aratai i maiti eaha tei tano ia patahia.

• Te vahi. Aita te mau hohoˈa i patahia i te tahi fare moni. Ua faanaho râ te feia pata hohoˈa i te hoê piha i te Pu haapiiraa a te mau Ite no Iehova mai te hoê fare moni. b

• Te taata. No te hohoˈa o te vea, e mau Ite no Iehova anaˈe tei patahia mai te huru ra e te tiai nei ratou i roto i te hoê fare moni o te tahi oire rarahi. E haaputu-pauroa-hia te mau hohoˈa ia ore te tahi taata e ite-pinepine-hia i roto i ta matou mau papai.

• Te mau taihaa. Ua faaohipa te Tuhaa o te mau hohoˈa i te moni ê no te faaite e ere te fare moni i Marite. Maoti te mau taihaa faaohipahia, e manaˈo tatou e mea mau iho â tera hohoˈa. Te na ô ra Craig, taata pata hohoˈa: “Titauhia ia faaineine pauroa na mua ˈˈe.”

• Te ahu e te taoˈa faaunauna. No te hohoˈa o te vea, ua afai mai te taata i ta ratou iho mau ahu. Ia hinaarohia râ te tahi hohoˈa no te tau tahito aore ra no te tahi tupuraa taa ê, e imi e e nira te Tuhaa o te mau hohoˈa i te ahu tano. E faaohipa-atoa-hia te taoˈa faaunauna taata ma te haapao maitai i te tau, te aamu aore ra te tupuraa hinaarohia no te hohoˈa. Te parau ra Craig: “I teie tau, mea papu roa ˈˈe te mau hohoˈa patahia e te mau matini faaohipahia. E mea tia ïa ia vai ara ˈtu â. Eiaha e hape rii, e ino roa mai te hohoˈa.”

• Te pataraa i te hohoˈa. Ua haapao maitai te feia pata hohoˈa i te maramarama ia manaˈo te taata e ua ravehia te reira i te poipoi. E mea tia ïa ia hiˈopoa ratou e mea tano anei te maramarama i to te piha e i te huru hohoˈa hinaarohia (e maramarama anei o te mahana, o te avaˈe e te vai atu â). Te na ô ra Craig: “Taa ê roa ˈtu i te video, e titauhia ia faaite i te tupuraa hinaarohia maoti hoê noa ˈˈe hohoˈa. Mea faufaa roa ïa te maramarama.”

• Te neneiraa. I muri aˈe, ua mohimohihia te hohoˈa o te moni ia hiˈo noa te feia taio i te mau taata eiaha râ nohea mai te moni. Ua taui-atoa-hia te û o te mau mea e haaati ra i te mau opani e haamaramarama ia tuea te reira i te mau û o te api matamua o te vea. Na mua roa e mea uteute, i teie nei râ mea matie.

Hau atu i te Tuhaa o te mau hohoˈa i Patterson, e pǔpǔ pata hohoˈa atoa i to te mau Betela na te ao nei mai i Auteralia, Beresilia, Kanada, Heremani, Tapone, Korea, Malawi, Mehiko e Afirika Apatoa. E nehenehe ratou e hapono atu i te mau hohoˈa no ta matou mau papai. E fanaˈo te Tuhaa o te mau hohoˈa i Patterson e 2 500 hohoˈa hau i te avaˈe taitahi. E rave rahi hohoˈa o tei faaohipahia no te mau vea Te Pare Tiairaa e A ara mai na! Ua neneihia hau atu 115 mirioni vea i 2015. No te ite atu â, a haere mai e mataitai i ta matou mau piha i Patterson i New York aore ra i te tahi atu mau Betela na te ao nei.