Te taio ra te taata na te ao atoa i te mau papai a te mau Ite no Iehova. E mirioni te taio nei i te reira i nia i te roro uira, mai ia oe i teie nei. Teie râ, e maere paha oe i te ite i te rahi o ta matou ohipa neneiraa. Mai 2013 mai â, ua pia matou i te mau papai niuhia i nia i te Bibilia na roto e 700 aˈe reo e ua opere i te reira i 239 fenua.

Hou 1920, na te mau taiete tapihoo i nenei i ta matou mau papai atoa. I 1920 râ, ua haamata matou i te nenei i te tahi o ta matou mau vea e buka iti i te hoê vahi iti tarahuhia i Brooklyn, New York. Mea haihai roa te haamataraa! I teie nei, e 15 fare neneiraa ta matou. Teihea roa? Tei Afirika, Asia, Auteralia, Europa, Marite Apatoerau e Marite Apatoa.

O te Bibilia iho â ïa te buka faufaa aˈe ta matou e nenei ra. I 1942, ua nenei matou i te huriraa Beretane o te King James Version. Mai 1961, ua huri e ua pia te mau Ite no Iehova i te Huriraa o te ao apî o te mau Papai moˈa ma te taatoa. I 2013, ua nenei matou hau atu i te 184 mirioni Bibilia mai teie na roto 121 reo.

Eita teie mau numera e faaite pauroa mai. E vai maoro te mau Bibilia ta matou e nenei nei. Te faaohipa nei hoi matou i te api parau aita e oˈava i roto e rearea ˈi te reira. E tahoê maite atoa matou i tera buka. Te faahopearaa? Te hoê Bibilia au mau noa ˈtu e e faaohipahia te reira i te mau mahana atoa.

E nenei atoa matou i te mau papai o te tauturu i te taata ia taa i te Bibilia. Teie te mau numera no 2013:

• Te Pare Tiairaa, o ta matou ïa vea matamua. E neneihia te reira na roto hau atu e 210 reo e o te vea opere-rahi-aˈe-hia na te ao. E 16 api to te vea taitahi e e 45 000 000 aˈe vea te neneihia ra i te mau avaˈe atoa.

• A ara mai na! O te piti ïa o te vea opere-rahi-aˈe-hia i muri mai i Te Pare Tiairaa. E 44 000 000 aˈe vea te neneihia ra i te mau avaˈe atoa na roto e 99 reo.

• Eaha ta te Bibilia e haapii mau ra? E buka e 224 api teie faataahia no te tauturu i to ˈna feia taio ia taa i te mau haapiiraa tumu o te Bibilia. Mai 2005, ua hau atu i te 214 mirioni buka tei neneihia na roto hau atu e 240 reo.

• Faaroo i te Atua. O te hoê ïa buka rairai e 32 api piahia no te tauturu i te feia tei ore i ite maitai i te taio. Te faaite ra te reira i te mau parau mau Bibilia ohie ia taa maoti te mau hohoˈa nehenehe mau e te tahi mau tatararaa poto. Ua hau atu i te 42 mirioni buka rairai tei neneihia na roto hau atu e 400 reo.

Taa ê atu i teie mau papai, e nenei te mau Ite no Iehova e rave rahi buka, buka rairai e api parau o te tauturu i te mau piahi Bibilia ia rave i te mau maimiraa no te ite i te pahonoraa i ta ratou mau uiraa Bibilia. Oia atoa ia faaruru i te mau fifi o te oraraa e ia fanaˈo i te oraraa utuafare oaoa. I 2012, ua nenei te mau fare neneiraa a te mau Ite no Iehova hau atu i te 1,3 miria vea e i te 80 mirioni buka e Bibilia.

E pinepine te feia o te haere e mataitai i ta matou mau fare neneiraa i te maere a ite ai i te taata e rave maite ra i ta ratou ohipa no te nenei i teie mau papai. Te horoa noa nei teie mau tane e vahine i to ratou taime e itoito. I to ratou taeraa mai i te Betela, o “Fare a te Atua” te auraa, aita te rahiraa o ratou i ohipa aˈenei i roto i te hoê taiete neneiraa. Ua aravihi mai râ ratou maoti te hoê porotarama haapiiraa i ravehia i te Betela e te hoê vahi ohipa o te faaitoito i te haapiiraa. Ei hiˈoraa, e pinepine oe i te ite i te mau tane apî e 20 tiahapa matahiti ia ohipa i nia i te mau matini neneiraa vitiviti o te nenei e 200 000 vea 16 api i te hora.

Na te ao atoa nei, na te mau ô horoa noa e turu ra i te ohipa a te mau Ite no Iehova. Ua parau Te Pare Tiairaa no Atete 1879 (i parauhia na Le Phare de la Tour de Sion) e na Iehova e turu ra i Te Pare Tiairaa, eita ïa te reira e ani i te turu a te taata. Hoê â manaˈo to matou i teie â mahana.

No te aha e horoa ˈi i te taime, te moni e te puai rahi no teie ohipa? Te taio ra paha oe hoê o na mirioni Bibilia e buka ta matou i nenei aore ra te taio ra paha oe i te reira i nia i te natirara. Ta matou e hinaaro ra, oia hoi ia tauturu te reira ia oe ia haafatata ˈtu i te Atua.