“Te hinaaro nei au ia haere oe i Columbia, i New York no te haruharu hoê o ta tatou mau himene. Na te feia aravihi e haapao i te reira. Eiaha roa ˈtu e faaite ia vetahi ê.”

I te hopea o 1913, ua rave o William Mockridge i taua hopoia maere mau ta Charles Taze Russell i horoa ia ˈna. a Ua haruharuhia te himene “The Sweet By-and-By” i nia i te hoê ripene upaupa rarahi 78 ohuraa. I muri iho, ua taa ia William e e faaohipahia taua himene ra i te omuaraa o te “Hohoˈa Darama o te Poieteraa.” E pataraa hohoˈa tera i te mau hohoˈa teata e te mau hohoˈa penihia i nia i te hiˈo tei faatanohia i te haruharuraa o te mau oreroraa parau Bibilia e te upaupa. Ua faaitehia na mua te “Hohoˈa Darama” i New York i Tenuare 1914.

Ua hautihia hau atu i te 50 upaupa i nia i te mau iri haruharuraa tei faaohipahia i te pataraa o te “Hohoˈa Darama” na roto i te reo Beretane. Oia atoa i te himene ta William i haruharu. Ua faaineine te tahi atu mau taata i te rahiraa o te mau upaupa. Te vai ra râ te tahi mau upaupa, mai ta to William, tei haruharuhia na te Feia haapii Bibilia. Ua himene ratou ma te faaohipa i te mau taˈo e vai ra i roto i te Hymnes de l’Aurore du Millénium, hoê o ta ratou mau buka himene.

E rave rahi matahiti te mau Ite i te faaohiparaa i te mau himene papaihia na vetahi ê no te arue i te Atua. I te tahi râ taime, ua taui ratou i te mau taˈo no te faatuati i te reira i ta ratou i taa i nia i te mau Papai.

Ei hiˈoraa, ua faaohipahia i roto i te “Hohoˈa Darama” te himene “Our King Is Marching On.” E faatanoraa tera o te himene “Battle Hymn of the Republic.” Te parau ra te irava matamua o tera himene e: “Ua ite to ˈu na mata i te hanahana o te taeraa mai o te Fatu.” Tera râ, ua taui te Feia haapii Bibilia i te mau taˈo ma te parau e: “Ua ite to ˈu na mata i te hanahana o te vairaa mai o te Fatu.” E tuati teie tauiraa i ta ratou i taa no nia i te faatereraa a Iesu. Aita oia e tae noa mai, e vai mai râ oia i te hoê anotau taa ê.—Mataio 24:3.

I te piaraa o te buka Chantant et vous accompagnant de musique dans votre coeur, i 1966, ua tutava te mau Ite i te tatara i te mau upaupa tei faaohipahia i roto i te mau papai a te ao aore ra te tahi atu mau haapaoraa. I tera matahiti, ua faanaho atoa ratou i te hoê pǔpǔ upaupa iti no te haruharu i na 119 himene o tera buka. Ua faaohipa te mau amuiraa i taua mau haruharuraa i ta ratou mau putuputuraa. Ua au atoa te tahi mau Ite i te faaroo i te reira i te fare.

I 2009, ua pia te mau Ite no Iehova i te hoê buka himene apî Himene ia Iehova. Ua haruharuhia te mau himene o tera buka na roto e ahuru aˈe reo. I 2013, ua haamata te mau Ite i te tuu i ta ratou mau video pehepehe no te mau tamarii i nia jw.org, mai te video A pure i te mau taime atoa. E rave mai te mau taata i te mau upaupa i nia jw.org tau mirioni taime i te avaˈe hoê.

Ua faaite e rave rahi mau taata i ta ratou mauruuru no tera mau upaupa. Ua papai te hoê vahine, o Julie to ˈna iˈoa, no nia i te buka Himene ia Iehova e: “Mea nehenehe mau te mau himene apî! I te taime o vau anaˈe, e hauti au i te mau himene e faaite maitai i to ˈu huru aau. I te hopearaa, e piri atu â to ˈu mau taairaa e o Iehova e e hinaaro papu atu â vau i te tavini ia ˈna ma te horoa ia ˈu taatoa.”

Ua parau te hoê metua vahine, o Heather to ˈna iˈoa, e nafea te video A pure i te mau taime atoa i ohipa ai i nia i ta ˈna mau tamarii e hitu e e iva matahiti, ma te papai e: “Ua tauturu te reira ia ratou ia pure, eiaha noa i te poipoi aore ra i te taime e amui matou pauroa, i te mau taime atoa râ e hinaaro ratou e paraparau ia Iehova.”