“Mai te huru ra e te faaroo ra o Iehova i te aau o te mau metua.” Mea na reira to te hoê metua tane i Malaisie i te faataaraa i te anairaa video na te tamarii A riro ei hoa no Iehova.

Mai te matararaa mai te mau video matamua, ua faaineine te mau Ite no Iehova i te tahi atu no nia ia Kaleba e to ˈna utuafare. Te haapii ra te mau video e vai ra i teie nei i nia i te jw.org i te tamarii i te mau haapiiraa faufaa i te pae morare e i te pae varua mai teie: No te aha eiaha ˈi ratou e eiâ e e nafea ratou e pure ai i te Atua?

Ua huri-aˈena-hia te video matamua na roto 131 reo. Ua fanaˈo ïa te mau tamarii na te ao atoa i te reira.

Te papai ra te hoê mama e pae tamarii ta ˈna: “Mai te noaaraa mai te DVD Si tu écoutes et obéis, tu seras béni a hoê hebedoma i teie nei, ua mataitai matou i te reira e 50 taime.”

Te ora nei Millie, 12 matahiti, i Beretane. E huma roro to ˈna tuaana 15 matahiti o Thomas te iˈoa. Te papai ra o Millie: “Te vai ra ta Thomas mau video no nia ia Kaleba i nia i ta ˈna iPad. E nehenehe ïa o ˈna e faaite i te reira i to ˈna mau hoa i te fare haapiiraa. Mea au roa na ˈna te mau himene e ua taˈi roa te hoê tuahine a faaroo ai ia Thomas ia himene ma to ˈna aau atoa. Mea faahiahia ia hiˈo atu.”

Ua faaite mai Ava e e 8 matahiti, e 9 avaˈe e e 25 mahana to ˈna. Ua papai o ˈna: “Mea ite roa o Kaleba e to ˈna tuahine i te haapii i te tamarii.”

Te papai ra o Mikaylah: “E ono matahiti to ˈu. Mauruuru no te DVD Si tu écoutes et obéis, tu seras béni. Te haapii maira te reira ia ˈu ia faaroo i to ˈu na metua no te mea e faaoaoa te reira ia Iehova.”

Ua mataitai te hoê taata papai hohoˈa e ere i te Ite no Iehova i te video Mea ino ia eiâ. Ua faahiahia roa oia i to ˈna iho â râ faarooraa e na te hoê noa pǔpǔ nainai i rave i te reira. Ua parau oia: “Ua matau vau i te taata papai hohoˈa o te ohipa ra no te mau taiete rarahi e nainai, e i te tahi taime, i feruri na vau eaha râ te huru ia ohipa i te vahi mai tera. No te aha râ ta ratou ohipa e tutavaraa atoa? No te faaata rii i te taata tau hora noa, oti atu ai. E faataui ta outou mau video i te oraraa o te mau tamarii, e haapii ia ratou ia faataa ê i te maitai i te ino e e tauturu ia ratou ia rave i te mau faaotiraa maitai. Mea faufaa roa ta outou e rave ra, e tauturu te reira i te taata.”

E farii oioi te mau metua na te ao atoa i te reira. Te papai ra te hoê mama: “Ua mataitai ta ˈu tamaiti e toru matahiti o Quinn te iˈoa i te video Ô Jéhovah, qui sera ton ami? I te afaraa o te himene, hiˈo mai nei oia ia ˈu, tuu ihora i to ˈna rima i nia i to ˈna ouma e parau mai nei: ‘Mama, ua oaoa roa to ˈu aau i te mataitairaa i teie video.’”