I te avaˈe no Me 2015, ua hapono te taata faatere i te tiaauraa o te oire rahi roa ˈˈe no Rusia apatoa, o Rostov-sur-le-Don, i te tahi rata no te haamauruuru i te mau Ite no Iehova. Ua haapopou oia ia ratou no ta ratou mau tutavaraa rahi no te faanehenehe i te oire i te tau uaaraa tiare.

I te roaraa o te mau tutavaraa no te faanehenehe atu â i te oire no Rostov-sur-le-Don, ua ohi e maha amuiraa a te mau Ite no Iehova i te mau pehu e te mau huˈahuˈa itehia i nia i te purumu e i te hiti o te mau anavai. I roto tau hora noa, ua faaî ratou e 300 farii pehu e ua tuu ratou i te reira i roto i te mau pereoo rahi.

No te aha te mau Ite no Iehova i hinaaro rahi ai e tauturu i te oire? Ua na ô Raisa, e 67 matahiti to ˈna: “Eita vau e nehenehe e hiˈo noa. Te hinaaro nei au ia mâ to ˈu oire e ia ora te taata taitahi i roto i te hoê oire mâ. Noa ˈtu eita e rave rahi taata tei ite i ta matou i rave, ua oaoa vau i te ohipa. E te mea faufaa aˈe, ua ite te Atua ra o Iehova i te reira.” Ua faaite Aleksander: “Te poro nei matou ia vetahi ê e te tauturu atoa nei matou i te mau taata. Oaoa roa vau a rave ai i te ohipa no to ˈu mau taata-tupu.”

Ua mauruuru roa te mau taata no te huru feruriraa horoa noa ta te mau Ite no Iehova i faaite. A ite ai e eita te mau Ite no Iehova i aufauhia no te ohipa i ravehia, ua maere roa te tahi taata e faaea ra i ǒ. Ua faaoti oia i te apiti ia ratou i te ohipa tamâraa e ua na ô oia: “Aita vau i manaˈo e e nehenehe au e oaoa roa i roto i te ohipa tamâraa. Eita vetahi o outou i faaea i ǒ nei, ua haere mai râ outou no te tamâ i to matou oire!”

Ua ite te hoê tia mana a te oire e ua ohi te tahi pǔpǔ iti o te mau Ite no Iehova i e rave rahi pehu. Ua pata oia i te hohoˈa o teie mau Ite no Iehova e huti ra i te mau farii pehu ta ratou i faaî. Ua hinaaro teie tia mana e “faaite ia vetahi ê e nafea ia rave i tera ohipa.”