E 80 matahiti to Graham Browne. Ua tauturu teie Ite no Iehova i te tahi taata tei fifi i te pae o te roro ia ore ia ouˈa, tei nia hoi oia i te fare tahua Sky Tower i Auckland i Niu Zelani, 328 metera te teitei. Ua parau Graham, “ua hinaaro tera taata e paraparau i te tahi Ite no Iehova. Ua niuniu mai te mau mutoi no te ani e farii anei au i te tauturu atu.”

“Maoti te feia rave ohipa o te Sky Tower, ua oomo vau i te tahi ravea parururaa e ua taamu i ta ˈu Bibilia maoti te hoê taura roa. Ua aratai te mau mutoi ia ˈu i te tahi tahua mataitairaa, 192 metera te teitei. Haaati aˈe i tera fare tahua, mea paaina te mataˈi e te toetoe atoa. Aita te taata e hinaaro ra e ouˈa i atea roa ia ˈu, te parahi ra oia i te vahi ǒaǒa o te tahi eˈa turu e tei roto i te aore to ˈna nau avae.”

“Ma te tuô, ua faaite au e Ite no Iehova vau e te hinaaro ra e tauturu ia ˈna. Ua pure au i roto ia ˈu e muri iho, ua rave i ta ˈu Bibilia e ua haamata i te paraparau.”

“Ua faataa vau i te faufaaraa o te ora, tera hoi te manaˈo tumu o te oreroraa parau ta ˈu i vauvau aita i maoro aˈenei i ta matou Piha a te Basileia.”

“Ua na ô atu vau: ‘Mea faufaa oe no te Atua e ua horoa ˈtu oia i te tahi ô faahiahia, te ora. No te aha e ore ai e faaite ia ˈna te haafaufaa ra oe i tera ô? Ee, a haere mai na i te vahi papu.’”

“Ua taio atoa vau e rave rau irava Bibilia mai te Ioane 3:16 o te na ô ra: ‘I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.’”

“Ua na ô atu vau: ‘Te here ra ïa te Atua ia oe e te hinaaro ra ia ora oe.’”

“I te haamataraa, e au e aita oia i tâuˈa noa ˈˈe i ta ˈu i parau. Ua pure au ia Iehova ia tauturu ia ˈu ia haaputapû i to ˈna aau. I te pae hopea, ua tia mǎrû noa oia e ua tapiri mai. Ua ahoaho roa ino oia.”

“Ua na ô mai oia: ‘Aita i maoro aˈenei, ua haere mai te mau Ite no Iehova i to ˈu fare, ua tiahi râ vau ia ratou. Ua peapea roa vau no ta ˈu i rave. E faaore anei oe i ta ˈu hara?’”

“Ua parau atu vau: ‘Mai tera atoa vetahi o matou na mua ˈˈe a riro ai ei Ite no Iehova. Mea papu, e faaore Iehova i ta oe hara.’”

“Ua pahono mai oia: ‘Mauruuru, ua haapeapea mau te reira ia ˈu.’”

“Ua na ô faahou atu vau: ‘Ite oe, aita vau e hinaaro ia mauiui oe. E ravea parururaa to nia ia ˈu, o oe râ, ia hee noa ˈtu oe, e ere roa oe i te ora faufaa mau. E peapea roa Iehova ia tupu te reira. Ee, a haere mai na i te vahi papu.’”

“Ua taui to ˈna huru. Na ô mai nei: ‘Na reira. E haere atu vau.’”

“Ua haere mai nei oia i nia i te tahua mataitairaa e oioi noa te mau mutoi i te aratai ia ˈna i te vahi papu. Hoê hora to mâua paraparauraa.”

Te tâuˈa mau ra te mau Ite no Iehova i te taata, i te feia iho â râ e hepohepo ra. Na te ao nei, e faaohipa ratou i te mau Papai no te horoa i te tamahanahanaraa e te tiaturiraa. E haapapu ratou e te tâuˈa mau ra te Atua i te taata.