Ua tauturuhia te feia apî i mua i te hamani-ino-raa i te fare haapiiraa
No ta Hugo, 10 matahiti, i rave no te tauturu i te mau piahi i mua i te hamani-ino-raa i te fare haapiiraa, ua horoa te hoê taatiraa tauturu Beretane na ˈna i te parau haamauruururaa piihia Diana Award.
Ua parau Hugo: “Maoti te video Mets un harceleur K.-O. sans utiliser les poings i noaa ˈi ia ˈu teie parau haamauruururaa. Ua riro vau ei tia papu no te patoi i te hamani-ino-raa maoti ta ˈu i haapii i roto i teie video i nia i te jw.org.”
“E tupu te hamani-ino-raa i nia i te mau tamarii o te ao atoa nei i te mau mahana atoa . . . , tera râ . . . nehenehe oe e faaruru i te reira.” (Mai roto mai te video Mets un harceleur K.-O. sans utiliser les poings)
Ua faaite na mua Hugo i te video Mets un harceleur K.-O. i ta ˈna mau orometua haapii. Ua maere roa ratou e ua rave i te faanahoraa ia nehenehe te mau piahi atoa e haere i nia i te jw.org. E rave rahi tamarii faito 8 tae atu i te 10 matahiti i te fare haapiiraa a Hugo te faaohipa tamau nei i tera reni. Ua parau ratou e ua tauturu te reira ia ratou ia faaruru i te mau fifi mai te hamani-ino-raa, ia ite atoa i te mau pahonoraa i te mau uiraa mai teie, Nafea ia noaa mai te hoa maitai?
Ravea tauturu i te feia apî
I te tahi atu fare haapiiraa i Beretane, i hamani-ino-noa-na-hia o Elijah, 8 matahiti. Ua mataitai o ˈna e to ˈna utuafare i te video Mets un harceleur K.-O. e ua rave ratou i te tahi mau faaineineraa ia taa ia Elijah eaha te parau e eaha te rave ia hamani-ino-faahou-hia oia. Ua itoito mai Elijah no te faaruru i teie fifi. I muri aˈe, i te hebedoma patoiraa i te hamani-ino-raa, ua faaite te faatere haapiiraa a Elijah i te video i te mau piahi atoa.
Papu roa, e ere i Beretane noa te hamani-ino-raa, tei te mau vahi atoa râ. Te tauturu atoa nei teie video pauroa te ui apî o te mau vahi atoa.
I Marite, ua hamani-ino-noa-hia atoa o Ivie, 10 matahiti, e te hoê hoa haapiiraa e ua mǎtaˈu roa oia. I muri aˈe i to ˈna mataitairaa i te video Mets un harceleur K.-O., ua itoito mai Ivie no te farerei i tera tamahine. Ua aparau atoa oia e ta ˈna orometua haapii, o tei tauturu atu ia ˈna i roto i teie fifi. Ua tatarahapa to ˈna hoa haapiiraa e mea afaro roa raua Ivie i teie nei.
Te haapeapea nei te mau Ite no Iehova no te maitai o te feia apî. E tamau noa matou i te pia i te mau aˈoraa maitai no te tauturu atu ia ratou i roto i te mau fifi o te mau mahana atoa mai te hamani-ino-raa.
E au atoa outou . . .
HOHOˈA PAPAIHIA
Ia upootia oe ma te ore e tupai!
E ite oe no te aha e hamani-ino-hia ˈi vetahi e eaha te ravea no te upootia.
HOHOˈA PAPAIHIA
A patoi i te faaheporaa a te mau hoa!
Maha ravea ia noaa te itoito no te rave i te faaotiraa.