Ua tupu te ûa rahi i te pae apatoerau no Italia i Novema 2016 e ua î roa te pape i te tahi mau oire iti i te pae apatoa o te oire Moncalieri. I te tahi mau vahi, ua tae roa te pape i te hoê metera e te afa i te teitei. Ua papai te hoê vea “aita hoê aˈe taata aore ra vahi tei ore i roohia i te pape rahi.” Ua faahaere oioi te feia mana i na 1 500 tiahapa taata i rapae i to ratou fare. Maoti te vitiviti o te ohipa a te mau pǔpǔ taata faaora, aita hoê aˈe i pohe. Tera râ, ua ere e rave rahi utuafare i ta ratou mau taoˈa.

Ua oioi te mau pǔpǔ Ite no Iehova o tera vahi i te haa. Ua tauturu ratou i te mau utuafare tei fifihia ma te tatara i te vari e te pehu tei ô roa mai i roto i to ratou fare. Oia atoa ma te tamâ i te mau tauihaa tei toe mai e te mau taoˈa o te utuafare. Ua opani te feia mana i te mau purumu. Ia itehia râ te hoê pǔpǔ e afai mai ra i te tauihaa e te maa, e vaiiho te feia mana ia ratou ia tere na nia i te purumu no te tauturu i te mau utuafare. Ua ohipa amui te mau rima tauturu e to ratou mau hoa Ite no Iehova. Oia atoa e te feia tapiri o te tahi atu mau haapaoraa.

Ei hiˈoraa, ua î roa te tahi tuhaa o te hoê fare tahua rau i te vari. Ua ohipa te feia tauturu no te faahaere i te pape i rapae. I muri iho, ua tauturu te hoê pǔpǔ rahi a te mau Ite no Iehova i te hoê o to ratou mau hoa, o Antonio to ˈna iˈoa, e to ˈna utuafare ia tuu i te mau pehu i rapae. Hau atu, ua tauturu ratou i te tahi atu mau taata e ora ra i roto i tera fare tahua rau. Ua faanaho ratou i te ohipa e tau hora noa i muri iho, aita faahou e pehu i roto i te mau piha atoa. Ua oaoa roa te taata no ta ratou i rave. Ua haere te hoê taata e ora ra i roto i tera fare tahua rau, o Viviana to ˈna iˈoa, e farerei i te vahine a Antonio e ua na ô oia ma te taˈi: “A haamauruuru maitai na i to oe mau taeae no ta ratou i rave. Mea faahiahia roa outou.”

I roto i te hoê oire iti tei ino-maitai-hia no te ûa rahi, ua ite te taata i te mau pǔpǔ Ite no Iehova o tei tauturu i te feia atoa tei roohia i te fifi no tera ati natura. Ua putapû roa to ratou aau. Ua ohipa amui vetahi o ratou e te mau rima tauturu e ua oaoa roa ratou i te pee i te mau faaueraa ta te pǔpǔ aratai i horoa.

Ua ino roa te fare o te hoê taata e ua î roa to ˈna fare tapearaa pereoo i te vari. Ua maere roa oia i te iteraa na Ite no Iehova e vaˈu i te ohipa noa e maha hora i te maoro no te faahaere i te mau pehu i rapae. Ma te mauruuru, ua tauahi oia vetahi o te feia rave ohipa e ua patapata oia i te hoê poroi i nia i te tahi reni natirara faahoaraa no te faaite i to ˈna mauruuru no ta ratou “tauturu faahiahia roa.”

Ua faatia te hoê Ite no Iehova: “Ua tauturu matou e rave rahi feia e ere i te Ite no Iehova. E rave rahi o ratou, e 80 matahiti ïa to ratou. Ma te taˈi, ua faaite vetahi o ratou i to ratou mauruuru no te ohipa ravehia.” Te vai ra hoê taata mea ohipa rahi i roto i te ekalesia Katolika o tera fenua. Ua faaite oia i te mau Ite no Iehova i to ˈna mauruuru no ta ratou tauturu e ua parau oia: “Mea faahiahia roa ia ite e noa ˈtu e haapaoraa ê to tatou, ua tauturuhia te tahi e te tahi.” Ua parau te tahi atu taata: “E ite noa te taata ia outou i te pororaa i te Tapati poipoi, aita râ ratou e ite i te tauturu ta outou i horoa mai.”