Ua rahi atu â te feia tei haapohe ia ratou iho i Tabasco, i Mehiko. No reira te mau Ite no Iehova i faanaho ai i te hoê opereraa taa ê e piti avaˈe i te maoro i 2017. Ua opere faahou ratou i te vea A ara mai na! no Eperera 2014 “No te aha e faaoromai ai? Teie e toru tumu.” Ua farii-maitai-hia teie opereraa.

Ua paraparau o Faustino, te hoê Ite no Iehova, e te hoê vahine tei haapeapea no ta ˈna tamaiti, e 22 matahiti to ˈna. Ua hepohepo roa taua taata apî ra e ua tamata oia i te haapohe ia ˈna iho. Aita to ˈna mama i ite e nafea ia tauturu ia ˈna. A ite ai râ te vahine i te vea ta Faustino i pûpû ia ˈna, ua na ô oia: “Tano maitai tera vea no ta ˈu tamaiti.” Te mahana i muri iho, ua farerei o Faustino i te tamaiti a te vahine e ua tauaparau raua no nia i te aˈoraa Bibilia faahitihia i roto i te vea. Ua hoˈi o Faustino e farerei i taua taata apî ra e rave rahi taime e ua ite oia e mea maitai atu â te huru o te tamaiti a te vahine. Ua na ô o Faustino: “E au ra e ua mǎrû mai oia e mea oaoa aˈe oia i teie nei.” Hau atu, ua faaite oia i to ˈna taeae i ta ˈna i haapii mai. Te hepohepo atoa ra hoi to ˈna taeae.

Te faaea ra o Karla i te oire no Huimanguillo. Ua faaohipa oia i taua vea ra no te tauturu i te hoê hoa haapiiraa a na ô ai oia: “Ua ite au e ua hepohepo hoê tamahine o ta ˈu piha haapiiraa. E 14 matahiti to ˈna. Ua paraparau vau ia ˈna e ua faaite oia i te mau fifi ta ˈna e ta to ˈna utuafare e faaruru ra. A paraparau ai oia, ua ite au e mau rifa to ˈna i nia i te rima aui.” Ua taa ia ˈu e ua matau oia i te otioti i to ˈna na rima e avae. Aita oia i manaˈo e tamahine nehenehe oia e ua tiaturi oia e mea faufaa ore to ˈna oraraa. Ua horoa Karla i te vea A ara mai na! ia ˈna e ua taio te tamahine i te reira. I muri iho, ua faaite teie tamahine ia Karla e e au ra e ua papaihia taua vea ra no ˈna. Ma te mata ataata, ua parau oia e ua hinaaro oia e ora i teie nei.

I te oire no Villahermosa, ua hepohepo roa hoê taata. Ua ere oia i ta ˈna ohipa e ua faarue ta ˈna vahine ia ˈna e i ta raua mau tamarii. Ua pure oia i te Atua a ani atu ai i te tauturu. Tera râ, ua tamau oia i te hepohepo. Ua fatata oia i te haapohe ia ˈna iho a patoto ai o Martín e Miguel, e piti Ite no Iehova, i to ˈna uputa. Ua iriti taua taata ra i te uputa e ua pûpû atu na Ite no Iehova i te vea A ara mai na!. A ite ai te taata i te vea, ua manaˈo oia e ua pahono te Atua i ta ˈna pure. Ua tamahanahana o Martín e o Miguel ia ˈna maoti te Bibilia. Tau mahana i muri aˈe, ua hoˈi raua e farerei ia ˈna e ua ite raua e ua mǎrû mai te taata e ua maitai mai oia. Te haapii nei raua i te Bibilia e o ˈna e piti taime i te hebedoma.

I te roaraa o te opereraa, ua haere te mau Ite no Iehova i roto i e rave rahi fare tapearaa no Tabasco no te farerei i te feia mau auri. Ua faaite te mau Ite no Iehova i te aˈoraa Bibilia o te nehenehe e tauturu i te feia mau auri ia haamau i te hoê fa i roto i to ratou oraraa. Ua faaineine te mau Ite no Iehova i te mau video, i te hoê oreroraa parau Bibilia e i te hoê aparauraa no nia i te mau tumu faahitihia i roto i te vea e faaite ra no te aha e mea faufaa ia ora. Mea au roa na te feia mau auri e te mau rave ohipa i te fare tapearaa tera mau farereiraa. Ei hiˈoraa, ua na ô te hoê taata mau auri: “Ua tamata vau i te haapohe ia ˈu e toru taime. Ua faaite te tahi mau taata e te tâuˈa ra te Atua ia ˈu, aita roa ˈtu râ ratou i faaohipa i te Bibilia no te haapapu i te reira. Ua itoitohia vau maoti ta outou mau parau.”

Ua ite te taata i tei tupu i te roaraa o te opereraa. Ua haapopou te tia faatere i te pae o te ea no tera fenua ra i te mau Ite no Iehova no ta ratou tutavaraa no te tauturu i te oire. I roto i te hoê vea no tera oire, ua neneihia te hoê tumu parau no nia i te opereraa a te mau Ite no Iehova. Teie te upoo parau: “Ua tia ratou no te aro i te haapoheraa ia ˈna iho.”