Ohie te feia tei roohia i te maˈi ino mau i te hepohepo e rahi roa ˈtu â ua titauhia anaˈe ia haere i te fare maˈi. Ua faahiti te hoê vea a no te ea e ia au i te mau tuatapaparaa mea faufaa roa ia haapaohia te mau hinaaro i te pae aau e i te pae varua no te ea o te feia maˈi.

No reira te mau Ite no Iehova e horoa ˈi i te tamahanahanaraa pae varua e e tauturu roa ˈi i to ratou mau hoa Ite no Iehova tei mau i te fare maˈi. E haere te mau matahiapo e hiˈo i te feia o ta ratou amuiraa tei maˈihia. E nafea râ ia mau te hoê Ite no Iehova i te hoê fare maˈi atea mau i to ˈna fare? I te mau oire rarahi na te ao, ua faanaho te mau Ite no Iehova i te mau pǔpǔ farereiraa i te feia maˈi. E haere tamau te mau matahiapo o teie mau pǔpǔ i te mau fare maˈi no te turu i te mau Ite no Iehova e to ratou utuafare no ǒ mai i te tahi atu mau tuhaa o to ratou fenua aore ra no te ara mai. Ua taiohia hau atu e 28 000 matahiapo i roto i na 1 900 pǔpǔ farereiraa i te feia maˈi na te ao. b

Te na ô ra William, e mero o te tahi pǔpǔ farereiraa: “Ua tia ia ˈu ia tamahanahana i te mau Ite no Iehova e to ratou fetii e ere i te Ite no Iehova ma te paraparau atu e te faaroo noa ˈtu. E haapapu atu vau e te ite nei Iehova i ta ratou e faaruru nei e te aupuru atu nei oia. E oaoa te feia maˈi e to ratou utuafare ia faaotihia te tahi pure no ratou.”

Mea rahi tei faaite i to ratou mauruuru no te faaitoitoraa ta ratou i fanaˈo no ǒ mai i te pǔpǔ farereiraa. Teie te tahi mau hiˈoraa no Marite mai, i reira tau 7 000 matahiapo te haere nei e farerei i te feia maˈi.

• Ua parau Priscilla: “Mauruuru i te haereraa mai e hiˈo i to ˈu papa i te fare maˈi a roohia ˈi o ˈna i te tahi maˈi i roto i te roro. Putapû roa o ˈna! Ua maere roa o ˈna e te vai ra tera huru faanahoraa. I to ˈu manaˈo, na te reira i tauturu ia ˈna ia maitai oioi mai.”

• Ua parau Ophilia i te hoê mero o te pǔpǔ farereiraa a pohe ai to ˈna mama: “Mea faufaa roa no to ˈu mama ia haere mai outou e hiˈo ia ˈna! Ua ite o ˈna e na Iehova i tono mai ia outou. Mauruuru no ta outou aupuru î i te here.”

• Ua hepohepo roa te hoê taata maˈi a faaroo ai e tau mahana noa e toe ra ia ˈna hou a pohe ai. Na James ïa, te hoê mero o te pǔpǔ farereiraa, i faaea ia ˈna ra e i faaite atu i te tamahanahanaraa Bibilia i roto i te Philipi 4:6, 7. Te na ô ra James: “I to ˈu haereraa ˈtu e hiˈo ia ˈna i to muri iho mahana, ua taui roa o ˈna e ua tiaturi papu e e tauturu atu Iehova. E na ˈna i faaitoito ia ˈu!

Ua pohe ta Pauline tane i te hoê fare maˈi atea mau i to raua nohoraa. Teie ta ˈna i papai: “Mauruuru roa no ta outou tauturu i roto i te taime peapea roa ˈˈe ta to matou utuafare i faaruru. E tamahanahanaraa mau ia ite tei te fare maˈi outou i te maororaa po no te farerei ia matou noa ˈtu e ohipa ta outou a poipoi aˈe. Mauruuru no te faanahoraa i te mau vahi taotoraa no matou, 11 hoi taata, e no te haapao-atoa-raa mai. Te haamauruuru atoa nei au ia Iehova e i ta ˈna faanahonahoraa no teie tauturu o tei tamahanahana ia matou.”

Ua û Nicki, Gayle e Robin 300 kilometera i te atea i to ratou nohoraa. Ua faaarahia Carlos, matahiapo i roto i te pǔpǔ farereiraa, e ua tiai ia ratou i te fare maˈi. Te na ô ra Carlos: “Ua parau atu vau e rave au i te mau mea atoa no te tauturu atu. Ia nehenehe Nicki e rapaauhia, na ˈu ïa i haapao i ta ˈna urî nainai.” Tae atoa mai Curtis, te tahi atu mero o te pǔpǔ, e ta ˈna vahine. Ua faaea ratou i te fare maˈi e rave rahi hora i te maoro ia tae mai te mau fetii. Ua parau te hoê hoa o te utuafare: “Ua tamahanahanahia ratou e toru i te aupuru ta ratou i fanaˈo. Ua maere roa Robin, to Nicki tuahine e ere i te Ite no Iehova, i te tauturu ta ratou i fanaˈo no ǒ mai i te mau mero o te pǔpǔ farereiraa.”