E rave rahi roa feia tei horo ê i te mau fenua mai ia Afirika, Hitia o te râ no Ropu e Asia Apatoa tei tomo atu i Europa i te mau matahiti i mairi aˈe nei. No te tauturu ia ratou, ua ohipa te mau pû a te Hau e te feia tauturu o te fenua iho ia fanaˈo teie nei feia i te maa, te nohoraa e te mau ravea rapaauraa.

Parau mau, aita i navai te tauturu pae tino noa, ua hau atu â te titauhia. Ua faaruru e rave rahi o ratou i te ati, ua hinaaro atoa ïa ratou i te tamahanahanaraa e te tiaturiraa. Ua horoa ˈtu ïa te mau Ite no Iehova no Europa no Ropu i te mau mea i hinaarohia ma te faaroo atu ia ratou e ma te tufa atu i te mau manaˈo tamahanahana no roto mai i te Bibilia.

Mai Atete 2015, ua tutava taa ê te mau Ite no Iehova no hau atu e 300 amuiraa no Auteteria e Heremani i te tamahanahana i teie feia tei horo ê. Ua tapao te mau taeae i te oaoa rahi ta teie feia i faaite a horoa ai ratou i ta te Bibilia pahonoraa i te mau uiraa mai teie:

• No te aha i rahi roa ˈi te mauiui?

• Eaha te tupu i muri aˈe te pohe?

• Eaha te parau apî oaoa a te Bibilia?

• E iˈoa anei to te Atua?

• O vai te mau Ite no Iehova?

I roto i te area Atete e Atopa 2015, ua poroi te mau Ite no Iehova no tera vahi hau atu i te maha tane papai Bibilia i te amaa no Europa no Ropu e ua opere atu i te reira ma te tamoni ore i te feia tei horo ê.

Te paraparau ra e rave rahi feia tei horo ê na roto i to ratou iho reo tumu. Tera râ, te faaohipa ra te mau Ite no Iehova i te reni jw.org, o te faaite ra i te mau tumu parau e video na roto hanere reo. “I te tahi taime, e aparau matou ma te apa i te rima, ma te faaite i te mau hohoˈa, e aore ra ma te papai i te hohoˈa,” ta Matthias e Petra ïa o te tauturu ra i Erfurt, Heremani, e parau ra. Te faaohipa atoa ra ratou i te JW Language, te hoê faanahoraa no te haapii i te reo ê, o te tauturu i te mau Ite no Iehova ia faaite i te poroi Bibilia na roto i te reo tumu o te feia tei horo ê, area vetahi atu te faaohipa ra ïa i te faanahoraa reo rau JW Library no te taio i te mau irava e faaite i te mau video.

“Ua haaati e rave rahi taata ia matou,” ta nau hoa faaipoipo no Schweinfurt, Heremani, i parau. “I te area e piti hora e te afa, ua farii te feia tei horo ê tau 360 papai. Mea rahi tei piˈo i to ratou upoo i raro ei haamauruururaa ia matou.” “Ua oaoa te feia tei horo ê e te tâuˈahia ra ratou,” ta Wolfang i parau, e taata tauturu oia no Diez, Heremani. “I te tahi taime, e ani ratou i te mau papai na roto e pae aore ra e ono reo.”

Ua haamata roa e rave rahi i te taio i te hoê papai, area râ vetahi ua hoˈi ïa e haamauruuru i te mau Ite no Iehova. Te faatia ra Ilonca, Ite no Iehova no Berlin, Heremani: “Ua rave e piti taata apî te tahi mau papai. Afa hora i muri aˈe, ua hoˈi atu raua e te tahi faraoa ei ô, ma te tatarahapa no te mea e aita ˈtu ta raua no te faaite i to raua mauruuru.”

Ua oaoa te feia tauturu i te huiraatira, te mau tia e te feia tapiri i te mau tutavaraa aau tae a te mau Ite no Iehova. “Mauruuru!” ta te hoê rave ohipa i parau, te haapao ra oia tau 300 taata horo ê. “Mauruuru roa no to outou tâuˈa rahi i te maitai o teie feia ěê!” Ua parau te tahi atu no tera aua fariiraa taata horo ê i te mau Ite no Iehova e e mea maitai te horoaraahia i teie feia tei horo ê te tahi mea faufaa ta ratou e nehenehe e taio na roto i to ratou iho reo. “To ratou hoi oraraa i tera taime, tera noa ïa e toru taime tamaaraa e aita ˈtu.”

Ua faataa Marion raua ta ˈna tane o Stefan o te ora ra i Auteteria i te fa o ta raua ohipa i na mutoi. Ua haamauruuru na mutoi ia raua e ua ani atu e piti buka. Te na ô ra Marion: “E ua haapopou faahou mai â na mutoi no ta mâua ohipa.”

Ua tapao te hoê vahine o te horoa tamau nei i te mau ô e noa ˈtu te huru o te reva, e haere te mau Ite no Iehova e tauturu i te feia horo ê. Ua parau o ˈna ia ratou i te hoê mahana: “E hinaaro iho â te feia horo ê i te tauturu i te pae materia. O te tiaturiraa râ ta ratou e hinaaro rahi nei. E tera iho â ta outou e horoa nei.”