Ua tupu te 103raa o te Tour de France, te tataˈuraa pereoo taataahi tuiroo, i te 2 tae atu i te 24 no Tiurai 2016 i roto i te taiâ. I 2015, mea rahi te ohipa totoaraa i tupu i Farani a pohe atu ai hau i te 100 taata. E i te hoê Tapati Farani, 14 no Tiurai 2016, ua faaû te hoê taata totoa na nia i te hoê pereoo rahi i te hoê nahoa e mataitai ra i te ahitiri i te oire o Nice. E 86 taata tei pohe e e rave rahi tei pepe.

A riaria e a oto noa ˈi te huiraatira Farani, ua hinaaro rahi te mau Ite no Iehova e faaite i te hoê tiaturiraa e e tamahanahana ˈtu. Ua faanaho ïa ratou i te tahi mau vairaa papai afaifai i te mau oire e faafaaea ˈi te feia tataˈu o te Tour de France. Hau i te 1 400 Ite no Iehova tei apiti i teie ohipa, e tei opere hau i te 2 000 papai Bibilia i te feia e imi ra i te pahonoraa o te tahi mau uiraa faufaa roa ˈˈe o te oraraa.

Ua maere te feia turu tei pee noa i te feia tataˈu na tera e tera oire i te ite i te mau Ite no Iehova. Mea pinepine to te mau mero tiaau i te Tour de France haapopouraa i te mau Ite no Iehova no to ratou faanaho-maitai-raa i ta ratou ohipa: “E au ra e aita e vahi aita outou, i te mau oire atoa e faafaaea ˈi te feia tataˈu!” Ua parau e rave rahi taata turu: “To ǒ nei atoa te mau Ite no Iehova!” Mea pinepine to te hoê taata faahoro pereoo uta taata oreraa e farii i te api parau i pûpûhia ˈtu, ua faataa oia ma te mǎrû e ua horoa-aˈena-hia mai na ˈna e maha api parau!

No to ratou maere e to te mau vahi atoa te mau Ite no Iehova, ua rave vetahi i te mau papai i te vairaa papai afaifai e a tahi ra. Ei hiˈoraa, i ite na te hoê rave ohipa no te hoê pu afata teata tuaro i te mau Ite no Iehova i te Tour de France i 2015. Ua faaoti oia i 2016 e haere atu i te vairaa papai afaifai, e ua rave i te buka Te ravea e itehia ˈi te oaoa i te utuafare, mea faufaa roa hoi no ˈna teie tumu parau. Hoˈi atura oia i to ˈna pereoo, taio atura i te buka e paraparau atura i to ˈna mau hoa ohipa no nia i te vairaa papai afaifai. Rave atoa maira ratou i te tahi mau papai ua rau te tumu parau.

I imi na vetahi ratere i te mau Ite no Iehova no te haamahora ˈtu i to ratou aau. Ua faaite te hoê vahine apî e ua hepohepo roa oia, e ua manaˈo roa oia e haapohe ia ˈna i taua iho mahana ra ma te ouˈa ˈtu i mua i te hoê pereoo au auahi. I muri iho râ i to ˈna faarooraa i te poroi tamahanahana o te Bibilia no nia i te hoê a muri aˈe hau i raro aˈe i te Faatereraa arii a te Atua, ua tamahanahanahia oia e ua faaoti eiaha e haapohe ia ˈna. Ua parau te tahi atu vahine: “A tamau i te rave i teie ohipa maitai ta outou!”

Ua faaite te hoê tane e turutootoo to ˈna e taiâ na oia i te taata ê, ua farii râ oia i te tauturu a te hoê vahine mea tura te faaahuraa, i to ˈna taaraa e Ite no Iehova. Ua parau oia: “Mauruuru no to oe mata ataata e to oe huru faaahuraa. E nehenehe iho â e tiaturi atu.”