I te tuhaa fenua rahi mau o te na roto atu ia Filelane, Norevetia e Tuete, te ora nei te mau Sami. E nunaa teie e to ratou iho taˈere, tutuu e reo. Aita i maoro aˈenei, ua rave te mau Ite no Iehova e piti ohipa no te faaite haere i te poroi Bibilia i te mau Sami.

A tahi, i 2015, ua haamata te mau Ite no Iehova i te huri i te mau papai Bibilia e video na roto i te reo Sami. a Te piti, i roto e piti opereraa taa ê i 2016 e 2017, ua haere ratou i Laponie, te hoê tuhaa fenua moemoe i reira te mau nǎnǎ ria e ora ˈi, no te faaite haere i te mau huriraa i te mau Sami.

I te opereraa taa ê i Me 2017, ua hau atu i te 200 Ite no Iehova i Filelane, Norevetia e Tuete tei haere i te mau oire iti nainai e rave rahi tei purara haere i nia e tausani kilometera tuea i Laponie. Ua haapii vetahi mau Ite i te tahi mau pereota na roto i te reo Sami e ua maere roa tera nunaa. Te faatia nei Denis o tei haere i Karigasniemi: “Ua oaoa ratou i ta matou mau tutavaraa no te paraparau i to ratou reo e ua ite i to matou anaanatae haavare ore.”

Mea poihere na ratou te oraraa e te natura, mea au roa ïa na te mau Sami te parau fafau Bibilia no nia i te hoê paradaiso i te fenua. (Salamo 37:11) A hiˈo na i teie vahine Sami tei haamata i te haapii i te Bibilia maoti te buka rairai Parau apî oaoa a te Atua e tei ite mai i ta te Atua e rave no te huitaata. Feruri noa o ˈna no te aha aita ta ˈna orometua i faahiti aˈenei i te hoê paradaiso i te fenua.

Mea rahi tei faaite i to ratou mauruuru i te mau Ite no Iehova. Ua haapopou te hoê fatu fare toa i na Ite no Iehova e piti ta ˈna i hiˈo noa na. Ua parau atu oia e te rave nei raua i te “ohipa faufaa roa no te taatoaraa.” I muri iho, ua titau manihini atu ia tomo mai e ia rave i te mau maa atoa ta raua i hinaaro i roto i ta ˈna fare toa. E aita roa ˈtu oia i hinaaro ia aufau raua.

I roto i te opereraa, ua hiˈo te mau Sami 180 video e ua farii hau atu e 500 papai. E pinepine ratou i te ani i te mau papai atoa e vai ra na roto i to ratou reo. Hau atu â, 14 Sami tei haamata i te haapii i te Bibilia e te mau Ite no Iehova.

Mea rahi te Sami tei taio i te mau papai a te mau Ite no Iehova e ua au mau ratou i te huriraa. Teie te mau parau a Nila Tapiola, orometua haapii e mero o te apooraa tiaauraa o te hau faatere Sami: “Hope te au te huriraa o ta outou mau papai.” Ua faataa o ˈna no nia i te mau papai e “mea ohie ia taio e mea maitai roa te huru papairaa.” Ua parau te hoê tane Sami e ora ra i te pae apatoerau roa o Filelane: “Na te feia aravihi iho â teie ohipa.”

I Karigasniemi, i te otia i rotopu ia Filelane e Norevetia, ua aparau te mau Ite no Iehova e te hoê orometua haapii Sami i nia i te haapiiraa matamua o te buka rairai Parau apî oaoa a te Atua. Ua maere roa o ˈna e mea au roa te huriraa. E ua ani oia i te mau Ite no Iehova te parau faatia no te faaohipa i te buka rairai i te fare haapiiraa no te haapii atu i te reo Sami.

Mea rahi te video e api parau iti, oia atoa hoê buka rairai, tei hurihia na roto i te reo Sami. Mai te 29 no Fepuare 2016, te vai ra te reni jw.org na roto i te reo Sami. I te mau avaˈe atoa, te haere nei te mau Sami i nia i tera reni hau atu i te 400 taime e te rave nei e 350 papai, haruharuraa reo e video.

Ua faufaahia te mau Sami i tera opereraa, oia atoa te mau Ite no Iehova tei haere e farerei ia ratou. Ua parau Henrick e Hilja-Maria, tei haere i Utsjoki, e ua nehenehe te mau Sami “e ite e e faufaahia ratou i te Bibilia i roto i te mau tuhaa e rave rahi.” Ua na ô Lauri e Inga, tei Utsjoki atoa: “Ua haamanaˈo mai teie opereraa i te paetahi ore o te Atua. Oaoa roa mâua i te faaite i to ˈna here i te feia e ora ra i teie mau vahi moemoe.”