I te matahiti 1987, ua horoa Lyman Swingle, mero o te Tino aratai a te mau Ite no Iehova, i te hoê oreroraa parau i mua e 63 580 taata tei putuputu i te tahua aroraa puaatoro taehae piihia Plaza Monumental i Valencia i Vénézuéla. Mea rahi tei haere mai na nia i te pereoo mataeinaa i te po taatoa e faaroo ia ˈna. Teie ta Taeae Swingle i parau i taua nahoa rahi ra: “I teie nei, e ere faahou outou i te hoê amaa iti, e amaa huru rahi rii râ. E ia hiˈohia, fatata outou i te ô i rotopu i te mau fenua tei hau atu i te 100 000 taata poro!”

I te matahiti 1987 i Vénézuéla, i tapaohia na hau atu i te 38 000 taata poro, oia hoi te mau Ite no Iehova tei poro ma te itoito i te parau apî oaoa o te Faatereraa arii a te Atua. E vaˈu anaˈe fenua tei hau atu i te 100 000 taata poro i tera matahiti.

Mea faahiahia roa te maraaraa te numera o te mau Ite no Iehova na te ao nei. I muri aˈe i te Tamaˈi rahi matamua, tau tausani noa taata e faaite haere ra i te Faatereraa arii a Iehova. Ua taui râ te reira. Te na ô ra te Buka matahiti a te mau Ite no Iehova 1943 (Beretane): “E haamaitairaa mau â te tapura taviniraa no te matahiti 1942, noa ˈtu e aita i tae pauroa mai no te tahi mau fifi . . . , te itehia ra hoi e i te ao taatoa, ua hau atu i te 106 000 taata poro e apiti ra i te ohipa [pororaa i te parau apî oaoa].” I roto atoa i te ahoaho o te piti o te Tamaˈi rahi, mea rahi tei farii i te parau mau Bibilia. I te matahiti 1950, o te fenua no Marite anaˈe tei hau atu i te 100 000 taata poro.

O te fenua Nigéria i muri iho tei raea 100 000 taata poro i te matahiti 1974.

I te matahiti 1975, ua hemo te 100 000 taata poro i Beresilia e i Heremani. Te haapapu ra tera maraaraa i e maha fenua rahi i te anaanatae o te taata na te ao nei i te parau mau Bibilia.

E ati aˈe te fenua nei, te maraa noa ra te numera o te feia e farii ra i te parau apî oaoa. Te tuati ra te reira e ta te Bibilia i tohu: “E riro te mea iti ei tausani e te mea nainai ei nunaa puai. Na ˈu, o Iehova, e faatupu oioi i te reira i to ˈna taime.”—Isaia 60:22.

Ia au i te tapura o te matahiti taviniraa 2014, e 24 fenua tei hau atu i te 100 000 Ite no Iehova. E ô atoa mai te fenua Vénézuéla, tei raea taua numera faahiahia roa ra i te matahiti 2007. I te ao nei, te vai ra 115 416 amuiraa a te mau Ite no Iehova e 8 201 545 taata poro.