I Atete 2014, ua opere te mau Ite no Iehova i te hoê api parau no te haafaufaa i te jw.org. Maoti te reira, e rave rahi taata tei haere i nia i teie reni natirara i tera avaˈe. Fatata 65 mirioni taime i haere ai tera mau taata i nia jw.org. Ua maraa ïa tera numera, oia hoi hau atu i te 20 i nia i te hanere ia faaauhia i te avaˈe i mairi. Maoti teie reni natirara, fatata 10 000 taata tei ani ia haere mai te hoê Ite no Iehova i ǒ ratou no te haapii i te Bibilia ma te tamoni ore: ua hau atu i te 67 i nia i te hanere ia faaauhia i te avaˈe i mairi! Ua tauturuhia te mau taata i te mau vahi atoa maoti teie opereraa.

I Kanada, ua farerei te hoê Ite no Iehova ia Madeline i roto i te hoê piha utaraa taata. Ua faaite oia ia ˈna te api parau Ihea e ite ai i te pahonoraa i te mau uiraa faufaa roa o te oraraa? Ua parau Madeline e i te po na mua ˈˈe, ua pure o ˈna ma te aau rotahi mai te taupee mai o to ˈna fare. Ua ani o ˈna i te Atua ia tauturu mai ia ite i te mau pahonoraa i te mau uiraa itehia i nia i teie api parau. Ua haere aˈena oia i e rave rahi fare pureraa no te ani i te hoê haapiiraa Bibilia, aita râ te tahi noa ˈˈe i pahono mai. I muri iho, ua haamata Madeline i te haapii i te Bibilia e te mau Ite no Iehova.

I Philipino, ua paraparau Rowena i te tahi taata Tinito i mua i te hoê vahi amuraa maa oti noa. Ua horoa oia ia ˈna i te hoê api parau. Ua faataa Rowena ia ˈna e te hinaaro ra te mau Ite no Iehova e tauturu ia vetahi ê ia faufaahia i te hoê haapiiraa Bibilia tamoni ore.

Ua faaite te taata e aita roa ˈtu oia i ite i te tahi noa ˈˈe Bibilia. A tupu ai te aparauraa, ua faaitoitohia oia ia haere i te hoê tairururaa a te mau Ite no Iehova. I muri iho, ua parau taua taata ra e ua hinaaro oia e ite atu â no nia i te Bibilia. Ua faaoti oia i te haere i nia i ta tatou reni natirara no te rave mai i te hoê Bibilia.

I Paniora, ua farerei Guillermo, te hoê Ite no Iehova tariˈa turi, ia Jorge, te tahi hoa haapiiraa tahito e tariˈa turi atoa oia. Ua faaite Jorge e e rave rahi uiraa e feaaraa ta ˈna no te mea no pohe noa ˈtura to ˈna mama. Ua horoa ïa Guillermo i te api parau ia ˈna a faataa ˈtu ai e nafea ia ite i te pahonoraa i ta ˈna mau uiraa i nia jw.org na roto i te reo aparaa rima. Ua titau manihini Guillermo ia Jorge ia haere i te mau putuputuraa i te Piha a te Basileia. Ua haere iho â o ˈna e mai reira mai, aita o ˈna i mairi hoê noa ˈˈe putuputuraa noa ˈtu e tei 60 kilometera te Piha a te Basileia mai to ˈna fare.

I Groenland, ua tere e piti Ite no Iehova e ta raua vahine e ono hora na nia i te hoê pahi nainai no te haere i te hoê oire iti e 280 taata, noa ˈtu te haamâuˈaraa rahi o tera tere. Ua poro ratou i tera vahi e ua opere ratou i te mau api parau a faaite atu ai i te hoê video na roto i te reo Groenland. Ua haamata atoa ratou i te hoê haapiiraa Bibilia e te tahi taata e ta ˈna vahine. I teie nei, te faatere nei ratou i tera haapiiraa Bibilia e piti taime i te hebedoma maoti te niuniu paraparau.

Aita tera mau tutavaraa i rave-noa-hia i te pae Apatoerau. I Nicaragua, ua faanaho te mau Ite no Iehova e opere i te api parau i te taata e paraparau ra i te reo Mayangna i roto i te uru raau i Antilles. Ua tere ratou e 20 hora na nia iho i te hoê pereoo utaraa taata ino roa e na nia i te hoê purumu e rave rahi apoo. I muri aˈe, ua pata avae ratou e 11 hora no te tapae i te oire iti e i te tahi taime ua haere ratou na te vahi vari roa. I tera oire iti, ua opere te mau Ite no Iehova i te mau api parau e ua faaite atu ratou i te mau video na roto i te reo Mayangna. Ua maere roa te mau taata e ua oaoa atoa.

I te hoê oire iti, i roto i te ururaau haumi no Amazonie i Beresilia, ua pûpû Estela i te api parau i te tahi taata. Ua farii oia i te api parau, aita râ tera taata i anaanatae roa a tuu atu ai i te reira i roto i to ˈna pute ahu. A hoˈi ai oia i to ˈna fare, ino atura te matini o to ˈna poti e vai noa aˈera o ˈna i nia i te anavai. A tiai ai te taata i te tauturu, ua taio oia i te api parau. Maoti ta ˈna niuniu afaifai, ua haere oia i nia jw.org e ua taio oia e rave rahi tumu parau. Ua rave atoa mai oia i te tahi mau video. Tau mahana i muri aˈe, ua farerei taua taata ra i ta Estela tane e ua ani ia ˈna ia haamauruuru i ta ˈna vahine no te api parau. Ua na ô oia: “Ua tamǎrû te mau tumu parau ta ˈu i taio ia ˈu a tiai ai i te tauturu i roto i to ˈu poti i nia i te anavai. Mea au roa na ta ˈu mau tamarii te mau video no nia ia Kaleba. E tamau vau i te haere i nia jw.org.”