Ua matau te taata i te ite i te mau vairaa papai Bibilia afaifai a te mau Ite no Iehova na te mau oire rahi o te ao. Ei hiˈoraa i Heremani, te vai ra taua mau vairaa papai afaifai ra i Berlin, Cologne, Hambourg, Munich e te tahi atu mau oire mea taata roa.

E ite-maitai-atoa-hia anei râ teie mau vairaa papai i roto i te mau oire rii i reira to Heremani e haere ai e faafaaea? E haapao mai anei te taata ia tuuhia ˈtu te reira i te mau oire no apatoerau i te pae miti mea rahi te ratere, i te mau motu no na miti Baltique e Apatoerau? I 2016, ua faanaho te amaa a te mau Ite no Iehova i Europa no ropu e ia pahonohia teie mau uiraa. Mai Me tae atu i Atopa, piri i te 800 Ite no Iehova te faaohipa i te vairaa papai afaifai i te mau oire rahi tei apiti i taua ohipa ra na Heremani apatoerau i roto e 60 oire. No ǒ roa mai vetahi i Vienne i Auteteria.

Ua farii-maitai-hia te mau Ite no Iehova. Te na ô ra hoê o ratou: “Ua anaanatae mai te taata, mea maitai ratou i nia ia matou, mea uiui e ua hinaaro i te paraparau mai.” Te na ô ra Heidi tei haere i te oire o Plön: “Tau mahana i muri iho, ua matau roa te taata ia matou, a tarape roa mai ai.” Ua apǎ mai te hoê tariˈa turi i te rima: “Aita e vahi aita outou!” No hoˈi noa mai ra o ˈna e to ˈna mau hoa i te hoê rururaa na te tariˈa turi i te pae apatoa hitia o te râ o Heremani, i reira atoa to ˈna farereiraa i te Ite no Iehova.

Ua tauturu atoa mai te tahi mau taata no teie mau oire. I te motu o Wangerooge, ua tapiri mai te hoê mutoi i te tahi mau Ite no Iehova e ua faaite mai ma te mǎrû e nafea ratou e farerei rahi ai i te taata. I Waren an der Müritz, ua faaite te tapena o te hoê pahi i te mau horopatete i te mau vahi mea anaanatae roa. A tohu ai oia i te hoê vairaa papai afaifai i nia i te uahu, ua parau oia: “I ǒ, e haapii hau atu â outou no nia i te Atua.” E rave rahi o taua mau horopatete ra tei tapiri atu e tei taio i tei piahia i nia i te vairaa.

Ua anaanatae te ratere e te feia no taua mau oire ra i na toru buka rairai:

• Te haapao mau ra anei te Atua ia tatou? Ua parau te hoê ratere: “Mea maoro to ˈu ui-noa-raa i te reira. I teie nei râ taime faafaaearaa, e taime to ˈu no te taio i te pahonoraa.”

• Parau apî oaoa a te Atua. Ua parau te hoê tane ruhiruhia i e piti Ite no Iehova e aita o ˈna e au faahou ra i te haapaoraa. Ua tauturu raua ia ˈna ia taa e ere tei te taata te ravea e faaafaro i to tatou mau fifi, tei te Atua anaˈe râ. Ua rave te tane i te buka rairai e ua parau e e taio oia i te reira.

• Ta ˈu pehepehe Bibilia. Ua faatia te hoê metua tane i ta ˈna tamahine ia rave i teie buka rairai no te mau tamarii rii. Ua rave atoa te metua tane i te buka Ta ˈu Buka Aamu Bibilia a parau atu ai: “E faufaahia to ˈu utuafare i te reira.”

Hau i te 3 600 papai tei operehia. Ua ani vetahi ia haere mai te mau Ite no Iehova i ǒ ratou no te tauaparau atu â.

Ua au roa te mau Ite no Iehova tei apiti i teie ohipa. Ua reva Jörg e ta ˈna vahine faaipoipo Marina i te hoê vahi piri i te miti Baltique. Ua parau raua: “E haamaitairaa mau â te reira. Ua paraparau mâua ia vetahi ê no nia i te Atua a faahiahia ˈi i mua i ta ˈna i poiete.” Ua parau Lukas, 17 matahiti: “Ua au roa vau! Te mea maitai aˈe râ, ua horoa vau i te tahi mea faufaa ia vetahi ê.”