I te 14 no Tetepa 2013, ua putuputu mai e 10 500 taata i te Pu haapiiraa a te mau Ite no Iehova i Patterson, New York. I reira hoi te parau tuite i horoahia ˈi i te 135raa o te piha haapiiraa no Gileada. E tauturu teie haapiiraa i te mau taata poro aravihi ia amo maitai atu â i ta ratou hopoia.

Ua haamata Guy Pierce, melo o te Tino aratai a te mau Ite no Iehova e peretiteni o te porotarama, i ta ˈna oreroraa parau ma te faaohipa i te Mataio 28:19, 20: “E teie nei, e haere outou e faariro i te mau fenua atoa ei pǐpǐ . . . ma te haapii atu ia ratou i te haapao i te mau mea atoa ta ˈu i parau atu ia outou na.”

Ua faataa te taeae Pierce e ia au i ta Iesu mau parau e tamau noa teie ohipa pororaa e tae roa mai i teie mahana. A poro ai, te haapii ra tatou i te mau taata ia haa ia au i te mau faaueraa atoa a Iesu. Oia atoa te faaueraa ia poro i “te evanelia o te basileia.” (Mataio 24:14) E riro ïa te pǐpǐ apî taitahi ei taata poro e ei taata haapii i te poroi o te Basileia. Eaha te faahopearaa o tera ohipa pororaa? Ua parau te taeae Pierce: “Te rahi noa ˈtu ra te taata [na te ao nei,] oia atoa râ to te Atua nunaa.”

“Ua horoa rahi atu â ratou i tei tia ia ratou ia horoa.” Ua vauvau Thomas Cheiky, melo o te Tomite amaa i Marite, i ta ˈna oreroraa parau ma te faaohipa i te Korinetia 2, 8:1-4. I te senekele matamua, mea veve roa te mau amuiraa no Makedonia. Noa ˈtu râ, ua onoono ratou i te horoa i te mau taoˈa i to ratou mau taeae no Ierusalema tei roo i te fifi i te pae materia. Ua faaite te mau piahi no Gileada i te hoê â manaˈo tauturu e haapae.

Mea papu e ua haapao maitai to Makedonia eiaha ia haafifi i to ratou utuafare aore ra ta ratou iho haamoriraa i te Atua a horoa ˈi i ta ratou mau taoˈa. Ua faaitoito te taeae Cheiky i te mau piahi ia pee i te hiˈoraa o to Makedonia e ia vai aifaito noa a tauturu ai ia vetahi ê.

“Ua oti te haapiiraa.” Ua faataa maitai Samuel Herd, melo o te Tino aratai, no te aha e mea tia ia haamanaˈo te mau piahi i ta ratou i ite i te Haapiiraa no Gileada. Mai te hoê pehe nehenehe mau tei faaroohia i te poipoi e o te vai noa i roto i te feruriraa i te mahana taatoa, e faaitoito noa teie mau haamanaˈoraa faufaa roa i te mau piahi noa ˈtu e ua oti te haapiiraa.

Ua haamanaˈo te taeae Herd e eita e taotiaraa i ta te Atua e nehenehe e haamanaˈo. Ua horoa Oia i te hoê iˈoa i te mau miria e miria fetia tei roto i te ao nui. Eita hoê aˈe fetia e moe ia ˈNa. (Salamo 147:4) Mea papu ïa e e haamanaˈo iho â Iehova i te mau tutavaraa atoa ta te mau piahi i rave i ta ratou haapiiraa i Gileada! Ua haapue ratou “i te taoˈa . . . i nia i te raˈi.” Eita ïa e nehenehe e eiâ i ta Iehova mau haamanaˈoraa faufaa roa no nia i tera mau piahi.—Mataio 6:20.

E haamanaˈo te Atua i ta te mau piahi ohipa e here no ˈna. E nehenehe ïa ratou e haafaufaa i ta ratou mau haamanaˈoraa i Gileada. Ua parau taeae Herd: “A oaoa ˈi outou ma te haamanaˈo i ta outou i ite i Gileada, eiaha e moe ia haamauruuru ia Iehova, o oia hoi te tumu o teie oaoa. Eiaha e fiu i taua mau haamanaˈoraa. E vai ïa te mau haamaitairaa o taua haapiiraa ra.”

“E tamahanahana to Iehova puai taa ê.” Ua faaitoito Sam Roberson, taeae haapii no Gileada, i te mau piahi ia tiaturi i to Iehova puai eiaha râ i to ratou iho puai a faaruru ai i te mau fifi apî. Te na ô ra te Ephesia 3:20 e “ei te hau ê roa ˈtu ta [te Atua] ia rave, i te mau mea atoa ta tatou e ani nei e ta tatou e manaˈo nei.” Eita tatou e nehenehe e faataa i to Iehova puai. Eita atoa te parau ‘ei te hau ta [te Atua] ia rave i te mau mea atoa ta tatou e manaˈo nei’ e navai no te faataa ˈtu i te reira. Inaha te na ô ra teie irava e mea “hau ê roa ˈtu” ta te Atua e nehenehe e rave.

E horoa Iehova i to ˈna puai taa ê i te Kerisetiano taitahi. E au ra e e “aito riariahia” oia i mua i te mau fifi rahi. (Ieremia 20:11). Ua haamanaˈo taeae Roberson i te mau piahi e e tauturu Iehova ia ratou ia faaruru i te mau fifi atoa.

“A tapea noa i te tiaraa tura i roto i te taviniraa a te Basileia.” Ua faataa William Samuelson, taeae haapii atoa no Gileada, e ua noaa i te mau piahi i te tiaraa tura i roto i te taviniraa a te Basileia na roto e piti tuhaa. A tahi, e faaturahia ratou no te mau ohipa ta ratou i rave i na mua ˈtu e i te roaraa o te haapiiraa. A piti, e tamau ratou i te faaturahia no te mea e tia ratou no te faatereraa teitei aˈe o te ao nui nei, te Basileia o te Atua.

E nafea te mau piahi e tapea ai i tera tiaraa tura? Ua faaitoito taeae Samuelson ia ratou ia faahanahana ia Iehova e ia faatura ia vetahi ê. E pee ïa ratou i te hiˈoraa o Iesu tei faatura i te mau taata a aˈo atoa ai oia ia ratou. Eaha te faahopearaa? Mai te aposetolo Paulo, e faatura-noa-hia te mau piahi no te mea te hinaaro ra ratou e haafaufaa i ta ratou taviniraa eiaha râ e faatiatia ia ratou iho.—Roma 11:13.

“Tei to ratou vaha te puai o te mau puaahorofenua.” Na Michael Burnett, te tahi atu taeae haapii no Gileada, i haapao i tera tuhaa. Ua faaite oia e nafea ia haa ia au i te Apokalupo 9:19 a faaohipa ai i ta tatou e haapii i te mau putuputuraa Kerisetiano no te poro ma te papu maitai. I muri iho, ua ani oia i te mau piahi ia faaite aore ra hauti i te mau tupuraa ta ratou i ite i roto i te pororaa a haapii ai i Gileada. Ei hiˈoraa, ua ani te hoê piahi i te tahi rave ohipa i te titoraa mori: “Afea to te Etene anotau i haamata e i faaoti ai?” (Luka 21:24) Ua anaanatae taua taata ra. I te tahi farerei-faahou-raa, ua tauturu te piahi ia ˈna ia pahono i teie uiraa ma te faaohipa i te Daniela pene 4 e te tuhaa hau o te buka Eaha ta te Bibilia e haapii mau ra?

“Ua faaitoitohia to ratou aau.” Ua uiui Adrian Fernandez, melo o te Tomite amaa i Marite, i te manaˈo o e piti piahi e ta raua vahine. Ua haamanaˈo te taeae Helge Schumi i te mau aamu Bibilia o ta te Atua mau tavini tei teoteo no te hopoia taa ê ta ratou i fanaˈo. No reira, ua faaitoito-pinepine-hia te mau piahi ia faatupu noa i te haehaa. (Paraleipomeno 2, 26:16) Ua faaite atoa te taeae Peter Canning i teie aˈoraa î i te paari ta ˈna i faaroo i roto i te hoê oreroraa parau no nia i te haapiiraa i te hoê reo apî: “Eiaha roa ˈtu e teoteo. Ia hape oe, eiaha e haama.” Ua faaite na piahi e maha i to ratou mauruuru no te mea e tauturu te haapiiraa ia itoito to ratou aau no te mau ohipa i mua.—Hebera 13:9.

“E oaoa no te mea ua papaihia to outou iˈoa i nia i te raˈi.” (Luka 10:20) Na Geoffrey Jackson no te Tino aratai i vauvau i te oreroraa parau tumu. Taa ê noa ˈtu i te mau piahi matamua no Gileada, eita te rahiraa o te mau piahi o teie mahana e tonohia i te mau tuhaa fenua taa ê. Eita atoa ratou e ite i te tahi tupuraa taa ê itehia a poro ai i te mau tuhaa fenua aitâ i porohia ˈtura. Eaha ïa to ratou huru i mua i te reira?

Ua tono Iesu e 70 pǐpǐ i roto i te mau tuhaa fenua no te poro. I to ratou hoˈiraa mai, ua faatia ratou ia Iesu i te mau parau apî maere mau mai te tiavaruraa i te mau demoni maoti te iˈoa o Iesu. (Luka 10:1, 17) Ua tapao Iesu i taua mau parau faahiahia mau, ua na ǒ râ oia: “Eiaha . . . e oaoa i te mea ua vi te mau varua ino ia outou; e oaoa râ i to outou iˈoa i papaihia i nia i te raˈi ra.” (Luka 10:20) Ua faataa oia e eita ratou e ite i tera mau tupuraa taa ê i te mau mahana atoa. E mea tia ïa ia tiatonu noa i to ratou taiva ore ia Iehova e i te faufaaraa ia ‘papaihia to ratou iˈoa i nia i te raˈi,’ eiaha râ i te mau faahopearaa o tera mau tupuraa.

Ua parau te taeae Jackson: “Ta Iesu i haapii i ta ˈna 70 pǐpǐ, no tatou atoa te reira. Eiaha roa tatou e vaiiho i te mau faahopearaa i roto i te taviniraa ia riro ei tumu o to tatou oaoa e taiva ore. Na to tatou mau taairaa piri râ e o Iehova e ta tatou mau ohipa itoito mau i roto i te taviniraa e faaoaoa e e tauturu ia tatou ia vai taiva ore.”

Ua ite atoa Iesu i te mau tupuraa te nehenehe e haaparuparu. Ei hiˈoraa, ua rave Iesu i te hoê semeio ma te faatamaa e tausani taata. E ua apee taua mau taata ra ia ˈna. (Ioane 6:10-14, 22-24) Tera râ, e rave rahi tei huru ê i ta Iesu haapiiraa. Ei hopearaa, aita faahou te rahiraa i apee ia ˈna, ua haere ê atu râ ratou. (Ioane 6:48-56, 60, 61, 66) Taa ê roa ˈtu e te mau pǐpǐ taiva ore tei faaoti papu ia faaea ia Iesu. E hiˈoraa maitai ïa teie no te mea aita ratou i tiatonu noa i te mau faahopearaa, i to ratou taiva ore râ e to ratou taairaa e o Iehova.—Ioane 6:67-69.

Parau hopea. Ua horoahia te parau tuite i te mau piahi. I muri iho, ua taio hoê o ratou i te tahi rata no te faaite i to ratou mauruuru. I ta ˈna mau parau hopea, ua tapao te taeae Pierce e e ere te nunaa o te Atua i te nunaa taa ê no teie nei ao, oia atoa te mau piahi no Gileada. (Ohipa 4:13; Korinetia 1, 1:27-31) Tera râ, te farii nei Iehova i ta tatou haamoriraa e te horoa mai nei oia i to ˈna varua maitai. Eita oia e haafaufaa i ta tatou faito haapiiraa. Ua parau taeae Pierce: “Ua faahiahia Iehova i to tatou taiva ore e ta tatou mau taairaa e o ˈna.”