I te 5 e 6 no Atopa 2013, ua putuputu e 1 413 676 taata o e 31 fenua no te 129raa o te rururaa matahiti o te Watch Tower Bible and Tract Society of Pennsylvania. Ua fanaˈo ratou i te reira i te Piha tairururaa a te mau Ite no Iehova no te oire no New Jersey, i Marite aore ra maoti te haapurororaa natirara.

O Guy Pierce, melo o te Tino aratai a te mau Ite no Iehova, te peretiteni o te porotarama. Ua haapapu oia e e pahono mai taua porotarama ra i te mau uiraa faufaa roa o te Bibilia. E faaanaana-atoa-hia te maramarama o te parau mau e e ‘hopoi atu i te maa pae varua i te hora mau.’ (Mataio 24:45; Maseli 4:18.) Ua hinaaro roa te feia e faaroo ra e ite hau atu â no nia i te reira.

“Hoê faaiteiteraa o te faahanahana ia Iehova.”

Ua horoa Mark Sanderson, melo o te Tino aratai, i te tahi haapapuraa no nia i te faaiteiteraa apî a te mau Ite no Iehova i te Pu rahi i Brooklyn, New York, Marite. Teie te upoo parau: “Te Bibilia e te iˈoa o te Atua.” E haapapu taua faaiteiteraa ra i te faufaaraa o te iˈoa o te Atua i roto i te mau Papai Hebera e Heleni. E faaite atoa te reira i e rave rahi mau Bibilia o te tau tahito ra, te mau taoˈa tahito tei hamani-faahou-hia e te tahi mau api Bibilia mai te matahiti 500 e tae atu 1500 o to tatou tau.

Te vai atoa ra te tahi mau api o te Bibilia hurihia na William Tyndale i te mau matahiti 1500. O oia hoi te taata huri Bibilia matamua tei tuu faahou mai i te iˈoa o te Atua i roto i te Bibilia na roto i te reo Beretane. Te vai atoa ra hoê api no ô mai i te Bibilia Reina-Valera, neneiraa no 1602 na roto i te reo Paniora. Ua tuuhia ˈtu “Iehova” i te mau vahi atoa e vai ra te iˈoa o te Atua. E ite-atoa-hia i taua faaiteraa ra te Grande Bible (neneiraa no 1549 na roto i te reo Beretane), te Bibilia na Elias Hutter na roto e 12 reo (neneiraa no 1599 tei parau-atoa-hia te Polyglotte de Nuremberg) e te Bible de Genève (neneiraa no 1603). Pauroa taua mau neneiraa Bibilia ra e faaohipa i te iˈoa o te Atua.

Ua titau manihini te taeae Sanderson i te taata taitahi ia haere e hiˈo i tera faaiteraa Bibilia, ma te parau: “Te pure nei matou e . . . e tauturu te reira i te feia aau haavare ore noa ˈtu to ratou matahiti e faito haapiiraa ia here i teie na piti taoˈa rahi ta tatou e here atoa nei: te Parau faufaa a te Atua, te Bibilia, e te iˈoa hanahana o Iehova.”

Irava matahiti 2014.

Ua haapoto mai Gerrit Lösch, melo o te Tino aratai, i te haapiiraa o Te Pare Tiairaa o tera hebedoma. I muri iho, ua faaite te taeae Pierce i te irava matahiti 2014: ‘Ia tae mai te Basileia o te Atua.’ (Mataio 6:10) Mea au roa na te mau Ite no Iehova i taua irava ra. Mea tano maitai te reira no te matahiti 2014 inaha a hanere matahiti te Basileia i te haamauraahia i nia i te raˈi.

“Hoê ô faufaa mau no ǒ mai i te Atua ra.”

I muri iho, ua faaitehia hoê video no nia i te aamu o te Huriraa o te ao apî, hoê Bibilia neneihia na te mau Ite no Iehova. Te parau atoa vetahi e to roto teie huriraa i te mau huriraa Bibilia maitai roa ˈˈe ta ratou i ite aˈenei. A faaite ai Nathan Knorr i te buka matamua o te Huriraa o te ao apî i te tairururaa nunaa rau i 1950, teie te aˈoraa ta ˈna i horoa ˈtu: A taio i te taatoaraa o teie huriraa Bibilia. A haapii i te reira. A tauturu ia vetahi ê ia haapii atoa i te reira inaha e turaihia ia tiaoro i te iˈoa o Iehova.

“A haamanaˈo na i tei tupu.”

Na Samuel Herd, melo o te Tino aratai, i haapao i taua tuhaa ra. Ua pata oia i te haruharuraa o te hoê uiuiraa manaˈo o e maha melo o te Betela i Marite. Ua ite hoi ratou i te matararaa matamua o te Huriraa o te ao apî na roto e ono buka mai 1950 e tae atu i 1960.

Ua haamanaˈo Eunice Timm i to ˈna faaohiparaa i te Huriraa o te ao apî i te mau putuputuraa Kerisetiano. Ua au roa oia i te mau aratairaa no te maimiraa, mai te mau faahororaa. I te mea ra e e mea teiaha taua mau buka ra, e rave noa oia i te mau buka hinaarohia no te putuputuraa. Oia atoa te neneiraa nainai o te King James Version mai te peu e e faahitihia te tahi mau irava ta ˈna i ore i manaˈo.

Maoti taua neneiraa apî ra, ua rave matou i te mau tauiraa i roto i te tahi tuhaa o ta matou haamoriraa. Ei hiˈoraa, ua faahiti Fred Rusk e hou te matahiti 1950, e pure te mau taeae o te Betela ma te faaohipa i te mau taˈo tahito itehia i roto i te King James Version. I te matararaa mai râ o te Huriraa o te ao apî, ua faaohipa ratou i te mau taˈo o te mau mahana atoa a pure ai ratou.

Ua maere roa John Wischuk i te maitai o te huriraa e i te haehaa o te Tomite huriraa i te Bibilia o te ao apî. Ua parau oia: “Aita roa ˈtu ratou i hinaaro e ia itehia o vai ratou, a ora ai e a pohe ai. Ua hinaaro ratou e ia faahanahana-noa-hia te Atua Iehova.” Ua faaite Charles Molohan i te manaˈo o ratou e maha ma te parau: “Ua tauturu te Huriraa o te ao apî ia matou ia haapapu i te parau mau i roto i to matou aau e ia haapuai i to matou faaroo. E nehenehe ïa matou e haere e tauturu ia vetahi ê ia haapuai atoa i to ratou faaroo.”

‘Te faaroo nei tatou ia ratou ia paraparau na roto i to tatou reo i te mau mea faahiahia a te Atua.’

(Ohipa 2:11) Na Geoffrey Jackson, melo o te Tino aratai, i vauvau i tera oreroraa parau. Ua faaite oia e ua matara mai te Huriraa o te ao apî, neneiraa faaapîhia i 2013. I te hopea o tera tuhaa, ua horoahia hoê Bibilia i te taata taitahi tei tae mai, oia atoa te feia i fanaˈo i te porotarama maoti te haapurororaa natirara.

Ua tapao te taeae Jackson e a 60 matahiti to te buka matamua o te Huriraa o te ao apî i te matararaa mai. I te roaraa o taua mau matahiti ra, ua taui te mau taˈo o te reo Beretane, eiaha râ te fa o ta matou ohipa huriraa Bibilia. Te hinaaro iho â nei matou e huri i te Parau a te Atua mai te mau papai tumu ma te ore e faahuru ê i te auraa.

I 2005, ua tapao te Tino aratai i te hinaaro ia hurihia te Bibilia na roto e rave rahi reo. Mai taua matahiti ra, ua maraa te numera reo huriraa a te Huriraa o te ao apî mai 52 e tae atu i te 121 reo. E te ohipa ra te mau pûpû huriraa i nia i te reira na roto e 45 reo. Ia ohie taua ohipa ra, ua ani mai te mau pûpû huriraa i te mau haapapuraa no nia i te tahi mau taˈo aore ra pereota. I teie nei, te vai ra e 52 000 uiraa tei papaihia e pahonohia. E rave rahi uiraa te faaite nei e te vai ra te mau irava na roto i te reo Beretane e mea tia ia faaapîhia.

Ei hiˈoraa, i roto i te mau neneiraa reo Beretane matamua o te Huriraa o te ao apî, e au ra te parau ra te Samuela 1, 14:11 e ua tatara o Ionatana e ta ˈna hopoi mauhaa tamaˈi i to ratou ahu i mua i te mau Philiseti. Ia ore e faahuru ê i te auraa, ua papaihia i roto i te neneiraa apî Beretane e “ua faaite raua e tei ǒ nei raua.” I roto atoa i te Mika 2:6, ua faahitihia te parau e “eiaha e vaiiho i te mau parau ia topa. Ua vaiiho ratou i te mau parau ia topa.” I teie nei râ, te parauhia ra: “‘Eiaha e poro faahou!’ Tera hoi ta ratou e poro ra.”

I 2008, ua faatoroa te Tino aratai i te hoê tomite no te faaapî i te Huriraa o te ao apî e e nehenehe e fanaˈo i ta ratou ohipa i teie nei. Mea au roa tera huriraa Bibilia faaapîhia. Mea ohie ia taio e eita teie Bibilia e tahito oioi noa ˈtu te faaohiparaa pinepine o te reira. Ua faaite te taeae Jackson e e ite-atoa-hia i te mau mahana i mua te neneiraa rarahi e nainai o teie huriraa faaapîhia na roto i te reo Beretane.

“Te tia hoi i te tufa i te parau mau.”

Ua faaite Stephen Lett, melo o te Tino aratai, i te mau tuhaa hau o te neneiraa Bibilia faaapîhia e ua faaohipa oia i te Timoteo 2, 2:15. I roto i teie irava, e itehia te parau “te tia . . . i te tufa.” Teie ïa te auraa: “Tâpû afaro.” Te hinaaro nei matou e faaohipa i “te ˈoˈe o te [v]arua” ma te tano e ma te papu. (Ephesia 6:17) I muri iho, ua faaite te taeae Lett e nafea te mau tuhaa hau apî o tera neneiraa Bibilia e tauturu ai ia tatou ia na reira.

1. E pahono te omuaraa i e 20 uiraa tumu no nia i te Bibilia maoti te mau irava Bibilia.

2. I roto i te tuhaa hau matamua, e haamaramaramaraa no nia i teie neneiraa, mai te faaapîraa o te huru papairaa aore ra te mau taˈo e te faaohiparaa i te iˈoa o te Atua.

3. I roto i te tuhaa hau piti, e 15 tuhaa o te faaite e rave rahi hohoˈa peni rau mai te hohoˈa fenua e te vai atu â. E nehenehe e faaohipa i te reira i ta tatou iho haapiiraa e no te haapii ia vetahi ê.

4. I te omuaraa o te buka Bibilia taitahi, e itehia te tahi haapotoraa ia nehenehe te taata taio e ite oioi i te irava ta ˈna e hinaaro. E mono te reira i te mau pereota haapotoraa tei itehia i nia i te api o te mau neneiraa matamua.

5. E faataa te titionare i te auraa poto o e hau i te 100 taˈo i faaohipahia i roto i te Bibilia.

6. Ua faaitihia te tapura taˈo Bibilia. I teie nei, e ite-noa-hia te mau taˈo e irava hinaarohia no te pororaa aore ra no te haapii ia vetahi ê.

7. Eita faahou e rave rahi mau faahororaa i ropu i te api. Ua tapea-noa-hia te mau haamaramaramaraa faufaa aˈe no te pororaa.

8. I roto i te mau nota i raro i te api, te vai ra te tahi atu mau huru huriraa o te hoê taˈo, te huriraa o te mau parau itehia i roto i te reo tumu aore ra te mau haamaramaramaraa hau.

JW Library.

Ua faaite John Ekrann, melo o te amaa no Marite, i te porotarama roro uira apî JW Library no te mau niuniu afaifai aore ra roro uira afaifai. Maoti taua porotarama ra, e fanaˈo te taata i te neneiraa faaapîhia o te Huriraa o te ao apî e e pae huriraa Bibilia hau. Mai te 7 no Atopa 2013, e nehenehe e rave mai i te reira ma te tamoni ore maoti te mau porotarama natirara matau-maitai-hia.

“Te huriraa i ta te Atua Parau no te faaite i te auraa mau.”

Ua faataa Anthony Morris, melo o te Tino aratai, i te mau aratairaa Bibilia tei tauturu i te Tomite huriraa i te Bibilia o te ao apî ia faaineine i te neneiraa faaapîhia. Ia au i te Korinetia 1, 14:8, 9, ua hinaaro te Tomite ia taa-ohie-hia te taioraa o taua neneiraa ra. I te tahi taime, e nehenehe te huriraa o te mau taˈo o te reo tumu e faahuru ê i te auraa. Ua huri ïa te Tomite i te auraa.

Ei hiˈoraa, ia hurihia te mau taˈo o te reo tumu o te Genese 31:20, e nehenehe e taa e “ua eiâ Iakobo i to Labana mafatu.” Tera râ, teie te auraa o te parau Hebera i roto i teie irava: haa ma te huna. No reira, ua papaihia i roto i te Huriraa o te ao apî e “ua haere huna Iakoba, ma te ore e faaite ia Labana i te reira.” Teie te tahi atu hiˈoraa. Ia hurihia te mau taˈo o te reo tumu i roto i te Korinetia 1, 7:39, e taahia e nehenehe hoê vahine e faaipoipo i te tahi atu tane mai te peu e te “taoto nei” ta ˈna iho tane. I roto râ i te mau Papai, mea pinepine ia faaohipa i te taˈo “taoto” no te pohe. No reira, maoti te Huriraa o te ao apî, e taa i te taata taio i te auraa mau o teie irava ma te papai e “ua pohe.”

Te na ô ra te taeae Morris: “Ua papaihia te Bibilia ma te faaohipa i te mau taˈo matauhia e te mau taata atoa, mai te feia faaapu, tiai mamoe aore ra taata taiˈa. E mea maitai hoê huriraa Bibilia ia taahia te poroi i te mau taata aau haavare ore, noa ˈtu to ratou faito haapiiraa.”

“Faaohipa i te ‘parau fariihia’ e ‘te parau mau.’”

Na te taeae David Splane no te Tino aratai i vauvau i tera oreroraa parau ma te faaohipa i te Koheleta 12:10. Ua haapao maitai te mau taata papai Bibilia ia tapao i to te Atua mau manaˈo. Ua na reira atoa te mau melo o te Tomite huriraa i te Bibilia o te ao apî matamua. No te neneiraa faaapîhia, e pee noa ratou i teie aratairaa: “A papai i te parau mau” e a faaite i ta te Atua poroi ma te tano.

Ua parau te taeae Splane: “Te vai ra te mau taˈo Beretane e rave rahi auraa to ratou.” Ei hiˈoraa, i roto i te Timoteo 2, 1:13, e itehia i roto i te mau neneiraa matamua a te Huriraa o te ao apî te parau: “hohoˈa o te parau mau ora.” E rave rahi auraa to te taˈo “hohoˈa.” E hohoˈa penihia anei? Ia au i teie auraa, ua taa ia vetahi e te faahiti ra teie irava i te nehenehe o te mau haapiiraa Bibilia. Teie râ te auraa mau: “hoê hiˈoraa e mea tia ia pee.” No reira, ua faaohipahia i roto i te neneiraa faaapîhia i te parau “ture aveia.”

Ua faaite atoa te taeae Splane i te mau tauiraa o te reo Beretane. Ei hiˈoraa, i roto i te mau neneiraa matamua a te Huriraa o te ao apî, ua faaohipahia te tahi taˈo Beretane no te faataa i te huru poheraa o Iesu. I teie tau, teie te auraa o taua taˈo ra: ua patiahia te hoê raau i roto i te tino o Iesu ia mou oia i nia i te pou. E ere râ i te reira. I roto i te neneiraa faaapîhia, e itehia te parau e “ua patitihia Iesu i nia i te pou.”—Mataio 27:22, 23, 31.

I te pae hopea, ua parau te taeae Splane: “Te pure nei matou ia tauturu te taioraa e te haapiiraa i tera neneiraa faaapîhia ia outou ia haafatata ˈtu â ia Iehova. Ia riro oia ei Metua, Atua e Hoa no outou.”

Parau hopea.

Ua faaau te taeae Pierce i te neneiraa Bibilia apî i te maa o ta Iehova “amuraa maa maitatai.” (Isaia 25:6) I muri iho, ua faaoti oia i te porotarama ma te ani i te feia e faaroo ra ia himene i te himene 114 o te buka Himene ia Iehova. Teie te upoo parau: “E faufaa rahi to te Parau a te Atua.”