“Mai te tahi oroa utuafare.” Tera tei papaihia i nia i te api matamua o te vea no Heremani, Frankfurter Rundschau. Tera atoa te manaˈo o te feia i tae atu.

Ua parau Karla no Porto Rico: “E au iho â tei te fare au!”

Ua na ô Sara no Auteralia: “Mai te huru ua haere au e farerei i to ˈu iho fetii, i te tahi atu râ pae o te fenua.”

No te aha ratou i paraparau mai tera? Ua haere ratou i te tairururaa nunaa rau a te mau Ite no Iehova. Ua tupu te reira i te piha tuaro Commerzbank-Arena i Francfort-sur-le-Main i Heremani i te 18 e tae atu 20 no Tiurai 2014. E 37 000 taata tei tae atu i te tairururaa.

Ua putuputu ratou no te haapii i te Bibilia. Te vai atoa ra te taioraa Bibilia, te mau himene, pure, e piti video e te mau taioraa Bibilia e au i te teata.

I roto i te feia i tae atu, te vai ra te mau Ite no Iehova o tera vahi e hau atu 3 000 Ite no Afirika Apatoa, Auteralia, Beretane, Heleni, Lebanona, Marite e Serbie. Tau 234 Ite no 70 fenua tei roto i te taviniraa taa ê tei tae atoa ˈtu, mai te mau mitionare.

Ua haapuroro-tia-hia te tahi mau tuhaa o te porotarama i 19 atu vahi mai Auteteria e Helevetia. Ia amuihia te taatoaraa i tae i tera mau vahi, 204 046 ïa taata.

I Francfort, ua vauvauhia te mau tumu parau na roto i te reo Beretane, Heleni e Heremani. I te tahi atu mau vahi, ua hurihia te mau oreroraa parau i te hoê â taime na roto 17 reo mai te Arabia, Tamoul, Tinito, Turekia e piti reo apǎraa rima.

Na te here i tahoê i te mau Ite noa ˈtu mea taa ê to ratou reo, fenua e taˈere. (Ioane 13:34, 35) Ua riro te tahi e te tahi ei taeae e tuahine no ratou.

Ua na ô Tobias no Beretane: “Ua ite roa matou mea hoê to tatou mau taeae noa ˈtu te mau taa-ê-raa atoa.”

Ua parau Davianna no Porto Rico: “Ua farerei au i te mau Ite no hau atu 20 fenua. Mea hoê matou no to matou here i te Atua e te tahi i te tahi.”

Ua na ô Malcom no Auteralia: “Ua riro mai au ei Ite no Iehova i te tahi oire iti. Ua taio vau i te mau faatiaraa no nia i te taa-ê-raa o te hoêraa o to matou mau taeae na te ao. Ua mataitai atoa vau i te mau video ia faaite i te reira. I ǒ nei, ua ite mata roa vau i te reira. Ua taa ˈtu â ia ˈu te auraa ia hoê e te mau taeae. Ua puai-roa-hia to ˈu faaroo i te taeraa mai i ǒ nei.”

Ua faaineine te mau taeae no 58 amuiraa i Francfort e ati aˈe i te tahi mau ô e arui faaanaanataeraa no te mau taeae o te tahi atu mau fenua.

Ua na ô Cynthia no Marite: “Ua ite mau matou i te faahiahia o te farii maitai. Eita roa e moehia ia ˈu te here mau, te maitai e te aau horoa noa o te mau taeae.”

Ua parau Simon no Heremani: “Ua itehia te here, te oaoa e te hoêraa o te mau taeae. Mea rahi mau ta tatou e haapii i te tahi e te tahi.”

Ua faataa Amy no Auteralia: “Ua haapapu mai te mau arui faaanaanataeraa ia ˈu, eita te mau Ite no Iehova e haapae i te mau mea maitatai. Ua ite matou e nafea ia faaanaanatae ma te tano e te maitai.”

Ua tupu hoê o te mau tairururaa nunaa rau i Francfort. Te vai ra ˈtu â te faatupuhia i iva ˈtu fenua na te ao.

Ua anihia eaha te huru te tairururaa i Francfort. Ua pahono hoê no te tahi atu fenua: “A feruri na ua itehia mai hoê o to oe mau fetii piri mai te hoê taeae ta oe i ore i ite aˈenei. Ma te aau tae, e farii maitai o ˈna ia oe i to ˈna fare. Eita e nehenehe e faataa i te oaoa. I ǒ nei, 37 000 taeae mai tera. Tera ïa te huru ia tae mai i ǒ nei.”