E hau atu 10 000 kilometera te atea i rotopu i te fenua no Philipino (i reira te taata e paraparau ai na roto i te reo Tagalog) e ia Roma, Italia. Ua putuputu mai râ e tausani Ite no Iehova e paraparau ra i te reo Tagalog i te hoê tairururaa taa ê mau i Roma, mai te 24 e tae atu i te 26 no Tiurai 2015.

Ia au i te hoê maimiraa, te ora nei hau atu 850 000 taata no Philipino i Europa. Ei faahopearaa, ua haamauhia 60 tiahapa amuiraa e pǔpǔ iti Ite no Iehova i Europa. E faatupu ïa ratou i te mau putuputuraa na roto i te reo Tagalog e e poro ratou i te mau taata no Philipino e ora nei i ǒ.

I Roma râ, a tahi ra teie mau amuiraa e pǔpǔ atoa i putuputu mai ai i te tairururaa e toru mahana na roto i to ratou iho reo. Ua oaoa roa nau 3 239 taata tei tae mai i te faarooraa i te oreroraa parau a taeae Mark Sanderson, melo o te Tino aratai a te mau Ite no Iehova, i te hopea o te mahana taitahi. Ua tavini aˈe na hoi oia i Philipino.

Eaha te taa-ê-raa no te feia tei tae mai ia faaroo i te tairururaa na roto i to ratou iho reo aore ra na roto i te tahi atu reo? Te pahono ra Eva, te hoê metua vahine faaea taa noa: “Te taa rii ra ia ˈu i te reo Beretane. Maoti râ teie tairururaa na roto i te reo Tagalog, ua putapû roa to ˈu aau i te mau haapiiraa Bibilia.” Ia navai te moni no te aufau i to ratou tere mai te fenua Paniora mai e tae atu i Italia, ua faaoti oia e ta ˈna na tamarii e piti ia ore e tamaa faahou i te fare tamaaraa pauroa te mau hebedoma mai ta ratou i matau i te rave. Hoê noa râ taime i roto i te avaˈe. Te na ô ra Eva: “Oaoa roa matou i te raveraa i tera haapaeraa no te mea i tera tairururaa e toru mahana ua taa ia ˈu te mau parau atoa!”

No te tae i tera tairururaa, e titauhia ia Jasmin, te hoê taata no Heremani, ia ani i te paoti i te mahana faaearaa ohipa. Te faaite ra oia: “Hou te tere, ua parauhia e aita vau i nehenehe e reva inaha e rave rahi ohipa. Aita vau i riri, ua pure au ia Iehova e ua tauaparau vau i ta ˈu paoti ohipa. Ua faanaho faahou maua i te porotarama ohipa ia nehenehe au e haere i te tairururaa! E mea faahiahia roa ia nehenehe e putuputu e te tahi atu mau taeae e tuahine no Philipino o te ora nei i Europa.”

Parau mau, e rave rahi o ratou o te mihi nei i to ratou fenua e i to ratou mau hoa tei haere e ora i te tahi atu mau vahi i Europa. Maoti teie tairururaa, ua farerei faahou ratou e rave rahi o to ratou mau hoa, i teie nei râ e mau taeae e tuahine pae varua ratou. (Mataio 12:48-50) Te na ô ra Fabrice: “Oaoa roa te aau i te ite-faahou-raa i te feia ta ˈu i matau!” I te pae hopea o te tairururaa, ua parau noa te hoê tuahine: “E farereiraa utuafare rahi te reira!”