Aita i maoro aˈenei, ua faanaho te mau Ite no Iehova i te mau tairururaa taa ê i Beresilia, Costa Rica, Hong Kong, Irelane, Iseraela, Niu Zelani e Tuete. Ua tupu te tairururaa matamua i Tuete i Tiurai 2012 e na tairururaa hopea e toru, ua tupu ïa i Costa Rica e i Niu Zelani i Tenuare 2013.

Mai te tahi atu mau tairururaa e toru mahana i te matahiti taitahi, e fanaˈo te taata i te mau oreroraa parau Bibilia, te mau faahiˈoraa e te mau aamu hautihia.

Ua titau-manihini-hia te mau tia no te haere i teie mau tairururaa taa ê i te fenua ê. Na mua ˈˈe e i muri aˈe i te mau tairururaa, ua tia ia ratou ia apiti i te mau tere faanahohia no te mataitai i te tahi mau vahi taa ê o tera fenua.

Te parau ra te hoê taeae o tei haere i te tairururaa i Beresilia: “Mea oaoa mau ia ite i te here e te farii maitai a te mau taeae. Mai te mea ra e ua rahi taue mai te mau melo o te utuafare.”

Ua parau te tahi atu tia tei haere i te tairururaa taa ê i Hong Kong: “Ua putapû roa to ˈu aau i te ite i te mata ataata e te roimata oaoa o te mau tia e paraparau ra i te reo Mandarin a tapea ˈi ratou i te mau papai Bibilia apî i nia i to ratou ouma.”

I te mau matahiti atoa, te faatupu nei te mau Ite no Iehova i te mau haaputuputuraa rarahi na te ao nei. E e mirioni taata te haere atu.

I tera mau tairururaa e itehia ˈi te here, te oaoa e te hau o to tatou fetii taeae. E ite-maitai-hia te reira i te mau tairururaa taa ê aore ra nunaa rau. I te taime faafaaearaa, e oaoa mau te feia i tae mai i te tairururaa i te paraparau e i te tamaa amui e o vetahi ê ma te horoa i te mau ô au noa, i to ratou iˈoa, vahi nohoraa e numera niuniu. E pata atoa ratou ia ratou i te hohoˈa e e tauahi te tahi i te tahi ma te here.

E farii-popou-atoa-hia te feia e ere i te Ite no Iehova te haere mai i ta matou mau tairururaa atoa.