Ua niuhia to matou manaˈo e ta matou mau peu no nia i te hunaraa maˈi i nia i te mau aratairaa Bibilia mai teie:

•   Ia pohe tei herehia, e oto iho â tatou. Ua oto te mau pǐpǐ a Iesu i te poheraa o te feia ta ratou i here. (Ioane 11:33-35, 38; Ohipa 8:2; 9:39) Eita râ matou e faaohipa i te taime hunaraa maˈi no te arearea. (Koheleta 3:1, 4; 7:1-4) E taime teie no te faaite i te aumihi.—Roma 12:15.

•   Eita ta te feia pohe e parau itea. Noa ˈtu te fenua aore ra te taˈere, eita matou e pee i te mau peu aore ra te mau ohipa niu-ore-hia i nia i te Bibilia. Te mau peu iho â râ o te faaite ra e e tamau te feia pohe i te ora e e nehenehe ratou e ohipa i nia i te feia ora. (Koheleta 9:5, 6, 10) Ei hiˈoraa, eita matou e faatupu i te mau peu araraa i te po taatoa no tei pohe. Eita atoa matou e faarahi a faanaho ai i te hunaraa maˈi aore ra a haamanaˈo ai i te mahana o te poheraa o te tahi taata. Eita ˈtoa matou e pûpû i te ô i te feia pohe, e paraparau ia ratou, e faatae atu i te tahi aniraa e e tuama i te mau mori hinu no te haamanaˈo i to ratou pohe. E haapae matou i teie mau peu e i teie mau huru raveraa atoa no te auraro i teie faaueraa Bibilia: “A faataa ê mai ia outou . . . atira i te tapea i te mea viivii.”—Korinetia 2, 6:17.

•   E tiaturiraa no te feia pohe. Te haapii mai ra te Bibilia e e tupu iho â te tia-faahou-raa e e tae mai te mahana e ore roa ˈi te pohe. (Ohipa 24:15; Apokalupo 21:4) Ua tauturu teie tiaturiraa i te mau Kerisetiano matamua e e tauturu atoa te reira ia matou ia ore e pee i te mau peu otoraa tano ore ravehia ia pohe te taata.—Tesalonia 1, 4:13.

•   Te faaitoito mai ra te Bibilia ia faaite i te haehaa. (Maseli 11:2) Eita matou e tiaturi e e taime te hunaraa maˈi no te faaite i te “faaiteiteraa ahaaha,” oia hoi no te faaiteite i ta tatou moni aore ra tiaraa totiare. (Ioane 1, 2:16) Eita matou e faanaho i te mau hunaraa maˈi moni roa no te faaanaanatae i te mau taata aore ra no te faaiteite i te mau afata maˈi moni rahi. E haapao maitai atoa matou ia ore e faarahi roa i te pae o te faaahuraa i te taata pohe aore ra ia tatou iho. Eita matou e hinaaro e faatietie ia matou iho i mua i te taata.

•   Eita matou e faahepo ia vetahi ê ia pee i to matou iho manaˈo no nia i te hunaraa maˈi. E pee matou i teie faaueraa Bibilia: “E haava ïa te Atua ia tatou tataitahi ia au i ta tatou mau ohipa.” (Roma 14:12) Teie râ, ia nehenehe, e faataa matou i ta matou mau tiaturiraa “ma te mǎrû e te faatura rahi.”—Petero 1, 3:15.

 Te vahi: Ia faaoti te tahi utuafare i te faatupu i te hoê hunaraa maˈi, na ratou e faaoti i te vahi: i te Piha a te Basileia anei, i te fare vairaa taata pohe, i to ratou fare, i te vahi taninaraa taata pohe aore ra i te menema.

 Te faanahoraa: E vauvauhia te hoê oreroraa parau no te tamahanahana i te feia oto. E faataahia eaha ta te Bibilia e haapii ra no nia i te pohe e te tia-faahou-raa. (Ioane 11:25; Roma 5:12; Petero 2, 3:13) I te hunaraa maˈi, e haamanaˈohia te mau huru maitatai o te taata pohe. E faahiti atoa paha te taata orero i te tahi mau haapiiraa ta tatou e nehenehe e huti mai maoti te hiˈoraa taiva ore o te taata pohe.—Samuela 2, 1:17-27.

 E nehenehe e himene i te tahi himene niuhia i nia i te Bibilia. (Kolosa 3:16) E faaotihia te oroa na roto i te hoê pure tamahanahana.—Philipi 4:6, 7.

 Te titauraa moni: Eita matou e titau i te mau mero Ite no Iehova ia aufau i te pureraa, oia atoa i te hunaraa maˈi. Eita atoa matou e titau i te moni i ta matou mau putuputuraa.—Mataio 10:8.

 Te feia e tae mai: E nehenehe atoa te feia e ere i te Ite no Iehova e haere i te faanahoraa hunaraa maˈi ravehia i te tahi Piha a te Basileia. No te taatoaraa teie faanahoraa, mai ta matou mau putuputuraa atoa.

 Na te Ite no Iehova taitahi e faaoti i te reira, ia au i to ˈna manaˈo haava niuhia i nia i te Bibilia. (Timoteo 1, 1:19) Eita râ matou e apiti i roto i te mau oroa faaroo eita e tuea ra i ta te Bibilia e parau ra.—Korinetia 2, 6:14-17.