Eita te mau Ite no Iehova e faatupu i te mau oroa mahana fanauraa, no te mea te tiaturi nei ratou e e mea au ore na te Atua i teie mau oroa. Noa ˈtu e aita te Bibilia e faataa roa ra ia ore e faatupu i te mau oroa mahana fanauraa, e tauturu râ te reira ia tatou ia feruri i nia i te tahi mau tupuraa e ia taa i to te Atua manaˈo. E hiˈopoa mai tatou e maha tuhaa e te mau faaueraa ta te Bibilia e faataa ra.

1.   No roto mai te mau oroa mahana fanauraa i te haapiiraa etene. Te faataa ra te hoê buka nohea mai teie mau oroa: te manaˈo ra vetahi e ia faatupuhia te oroa mahana fanauraa o te hoê taata, “e nehenehe te mau varua ino e haafifi ia ˈna,” oia atoa “na roto i te taeraa mai o to ˈna mau hoa e i ta ratou mau parau maitatai, e paruru ïa te reira ia ˈna maoti te oroa mahana fanauraa.” (Funk & Wagnalls Standard Dictionary of Folklore, Mythology, and Legend) Te faataa ra te hoê buka e i tahito ra “mea faufaa ia haamau i te mau tarena no te mau mahana fanauraa ia noaa mai te hoê tohuraa tapao” o tei niuhia i te “ihi peu hiˈo fetia ma te peu tahutahu.” Te faataa atoa ra teie buka e “ia au i te tiaturiraa a te taata, e mana tahutahu te mau mori hinu faaohipahia no te oroa mahana fanauraa no te faatupu i te mau mea hinaarohia.”—Peu tumu e tutuu o te mau oroa fanauraa (Beretane).

    Ia au i te Bibilia, eiaha roa ˈtu râ tatou e faaohipa i te peu tahutahu atoa, te peu hiˈohiˈo, aore ra “ia na reira.” (Deuteronomi 18:14; Galatia 5:19-21) No reira, i faahapa ˈi te Atua i te oire tahito ra o Babulonia, no te raveraa ïa te mau taata no ô i te peu hiˈo fetia, mai te peu hiˈohiˈo ra te huru. (Isaia 47:11-15) Eita te mau Ite no Iehova e imi roa nohea mai te mau peu tumu atoa. Ia horoa râ te Bibilia i te mau haapapuraa tano, e haapao maite ratou i te reira.

2.   Aita te mau Kerisetiano o te senekele matamua i faatupu i te oroa fanauraa. Te parau ra te hoê buka ite rahi no nia i te mau Kerisetiano o te senekele matamua, “e haapiiraa etene te oroa mahana fanauraa no ratou.” (The World Book Encyclopedia) Te faaite ra te Bibilia e mea titauhia ia pee te mau Kerisetiano atoa i te hiˈoraa o te mau aposetolo e te tahi atu mau pǐpǐ o ta Iesu i haapii tia ˈtu.—Tesalonia 2, 3:6.

3.   Hoê noa oroa ta te mau Kerisetiano e titauhia ia faatupu, o te poheraa o Iesu, eiaha râ te mahana fanauraa. (Luka 22:17-20) Eita tatou e maere, te parau ra te Bibilia, “e maitai ae . . . te mahana o te poheraa i te mahana o te fanauraa.” (Koheleta 7:1, Te Bibilia Moˈa V.C.J.S., 1976) I te pae hopea o to ˈna oraraa i te fenua, ua haamau Iesu i te hoê iˈoa maitai i mua i te Atua. No reira, mea faufaa roa ˈtu â te mahana o to ˈna poheraa i te mahana o to ˈna fanauraa.—Hebera 1:4.

4.   Aita roa ˈtu te Bibilia e faahiti ra e ua faatupu hoê noa ˈˈe tavini a te Atua i to ˈna mahana fanauraa. Aita te reira i haamoehia. Ua faahiti iho â râ te Bibilia e piti oroa mahana fanauraa no te mau taata aita e tavini ra i te Atua. Te faatia râ na oroa e piti e ua riro te reira ei tupuraa ino mau.—Genese 40:20-22; Mareko 6:21-29.

 Mai te mau metua maitai atoa, te faaite ra te mau Ite no Iehova i te here i ta ratou mau tamarii i te roaraa o na matahiti: e horoa ratou i te mau taoˈa horoa na ta ratou mau tamarii e e faanaho i te mau taime oaoa mau e te mau hoa. Te tutava nei ratou i te pee i te hiˈoraa tia roa o te Atua o te horoa ma te aau tae i te mau mea maitatai na ta ˈna mau tamarii. (Mataio 7:11) Aita te mau tamarii a te mau Ite no Iehova e faaerehia ra. Te haapapu ra teie mau parau:

•   “Mea au aˈe ia horoahia mai te hoê taoˈa horoa aita anaˈe oe e tiai mau ra.”—Tammy, 12 matahiti.

•   “Noa ˈtu e aita ta ˈu e taoˈa horoa i to ˈu mahana fanauraa, e hoo mai iho â to ˈu na metua i te tahi atu taime. Mea au aˈe na ˈu mai tera no te mea e maere au.”—Gregory, 11 matahiti.

•   “Te manaˈo ra anei oe e ahuru minuti, te tahi mau monamona e te hoê himene, e oroa tera? Ia haere mai oe i to ˈu fare, e ite ïa oe eaha mau na te hoê oroa!”—Eric, 6 matahiti.