Te pee nei te mau Ite no Iehova i te aˈoraa Bibilia e parau ra eiaha e pahono i te mau pariraa haavare e i te mau faaoooraa atoa. Ei hiˈoraa, te na ô ra te Bibilia: “O tei avau atu i te tâhitohito ra, e tâhitohia mai ïa.” (Maseli 9:7, 8; 26:4) Eita matou e haapeapea roa no nia i te mau pariraa haavare ma te apiti i roto i te mau aimârôraa. Te mea faufaa roa râ, ia faaoaoa matou i te Atua.—Salamo 119:69.

 Parau mau, “e taime to te mamû noa, e taime to te parau.” (Koheleta 3:7) Te pahono nei matou i te mau taata aau tae o te faaite ra i te anaanatae no te parau mau, eita râ matou e apiti i roto i te mau aimârôraa faufaa ore. Te pee nei ïa matou i te mau haapiiraa e te hiˈoraa ta Iesu e ta te mau Kerisetiano matamua i horoa mai.

•   Aita Iesu i pahono atu a faaroo ai oia i te mau pariraa haavare no nia ia ˈna i mua ia Pilato. (Mataio 27:11-14; Petero 1, 2:21-23) Ua na reira atoa oia a parihia ˈi oia ei taata inu hua i te ava e te amu hua i te maa. Ua vaiiho Iesu e na ta ˈna mau ohipa e faaite mai i te parau mau no nia ia ˈna. Oia hoi, te haapapu ra te Bibilia e na te mau ohipa a te hoê taata e faaite e e taata î i te paari anei oia. (Mataio 11:19) I te mau taime râ i titauhia ˈi ia Iesu ia pahono atu, ua paraparau oia ma te itoito i te feia tei faaino ia ˈna.—Mataio 15:1-3; Mareko 3:22-30.

   Ua faaite Iesu i ta ˈna mau pǐpǐ eiaha ia toaruaru mai te peu e ua parihia ratou. Ua na ô ra Iesu: “E ao to outou ia faaino mai, e ia hamani ino mai, e ia pari haavare noa mai te taata ia outou i te mau ino atoa nei, no ˈu.” (Mataio 5:11, 12) Ua faaite Iesu e e parihia ta ˈna mau pǐpǐ. Ua parau atoa râ oia e e nehenehe ratou, i te tahi taime, e faaohipa i tera mau tupuraa no te faaite i te poroi Bibilia. Ua fafau oia ia ratou ma te parau: “Na ˈu hoi e horoa ˈtu i te parau na outou e te paari, eita roa e tia i to outou mau enemi atoa ia faaore mai e ia patoi mai.”—Luka 21:12-15.

•   Ua parau te aposetolo Paulo i te mau Kerisetiano ia ape i te mau aimârôraa faufaa ore faatupuhia e te feia patoi. Ua parau oia e “e mea faufaa ore ïa, e te tumu ore hoi” te reira.—Tito 3:9; Roma 16:17, 18.

•   Ua faaitoito te aposetolo Petero i te mau Kerisetiano ia faaite i ta ratou mau tiaturiraa, mai te peu e e nehenehe ratou e na reira. (Petero 1, 3:15) Ua parau râ oia e te ravea maitai roa ˈˈe no te na reira, o te ohipa ïa a te hoê taata, eiaha râ ta ˈna mau parau noa. Ua faaite te aposetolo Petero e ma te rave i te mau ohipa maitai e haamamû ai tatou i te feia maamaa e parau ra i te mau parau faufaa ore.—Petero 1, 2:12-15.