Eita matou e tiavaru i te feia bapetizohia ei Ite no Iehova aita e poro faahou ra e aita atoa paha e amuimui faahou ra e to ratou mau taeae e tuahine pae varua. E haere râ matou e farerei ia ratou no te faaitoito atu ia anaanatae mai â ratou i te parau mau.

 Eita matou e tiavaru oioi i te hoê mero bapetizohia ei Ite no Iehova tei hara. Mai te peu râ e e ofati noa oia i te mau ture Bibilia ma te ore e tatarahapa, e tiavaruhia ïa oia. Ua parau roa te Bibilia: “A tiavaru atu i te taata ino i rapae i te amuiraa.”—Korinetia 1, 5:13.

 Mai te peu e tiavaruhia te hoê tane e e Ite no Iehova â ta ˈna vahine e ta ˈna mau tamarii, e nafea ïa? I te pae faaroo, aita e taairaa faahou to ˈna e ta ˈna vahine e tamarii Ite no Iehova. Te vai noa ra râ te taairaa fetii e te taairaa o te faaipoiporaa. E tamau â ïa to ratou oraraa utuafare mai tei matauhia, a here ai te tahi i te tahi.

 E nehenehe te feia tiavaruhia e haere i ta matou mau putuputuraa e ia hinaaro ratou, e fanaˈo atoa i te aˈoraa a te mau matahiapo o te amuiraa. E tauturu teie mau taeae ia ratou ia faaî i te mau titauraa no te riro faahou ei Ite no Iehova. Ia haapae tei tiavaruhia i te haerea ino ma te hinaaro mau â e pee i te mau ture aveia o te Bibilia, e nehenehe ratou e riro mai â ei mero o te amuiraa. Oaoa roa matou i te farii mai â ia ratou.