Te Watch Tower Bible and Tract Society of Pennsylvania, e taatiraa ïa o te ore e imi ra i te moni, tei haamauhia i 1884 ia au i te ture a te Hau no Pennsylvanie, i te Hau Amui. E faaohipahia te reira e te mau Ite no Iehova no te turu i ta ratou ohipa na te ao nei, oia atoa te piaraa i te mau Bibilia aore ra papai Bibilia.

 Ia au i ta ˈna ture, e taatiraa faaroo te reira o te haapii ra e o te tauturu ra i te taata. Ua haamauhia iho â râ te reira no te pororaa e te haapiiraa i te evanelia a te Faatereraa arii a te Atua faaterehia e Iesu Mesia. E nehenehe te mau taata e riro ei mero o tera taatiraa e titau-anaˈe-hia ratou. Aita te reira e niuhia i nia i te rahiraa moni ta ratou e pûpû. E tauturu te mau mero o te taatiraa i te Tino aratai a te mau Ite no Iehova.

 Hau atu i te Watch Tower Bible and Tract Society of Pennsylvania, e faaohipa atoa te mau Ite no Iehova e rave rahi atu â taatiraa tauturu o te haapao ra i te mau ohipa i te pae ture i roto e rave rahi fenua. I roto i to ratou iˈoa, e faaohipa vetahi o tera mau taatiraa tauturu i te mau parau “Watch Tower,” “Watchtower” aore ra i te huriraa o hoê o tera mau faahitiraa.

 I te taime teie mau taatiraa tauturu o te haapao ra i te mau ohipa i te pae ture i haamauhia ˈi, ua nehenehe matou e rave hau atu â ohipa mai teie:

•   Te papairaa e te piaraa. Ua nenei matou 220 mirioni Bibilia e 40 miria papai Bibilia. Ua neneihia tera mau papai na roto e hau atu 900 reo. Maoti te reni natirara jw.org, e nehenehe te taata e taio i te Bibilia ma te tamoni ore na roto e hau atu 160 reo. E nehenehe atoa ratou e ite i te mau pahonoraa o te mau uiraa Bibilia mai teie: “Te tiaturi ra anei te mau Ite no Iehova ia Iesu?”

•   Te haapiiraa. E rave rahi pǔpǔ haapiiraa Bibilia tei faaterehia. Ei hiˈoraa, mai 1943, ua fanaˈo e 9 000 tiahapa Ite no Iehova i te hoê faaineineraa hohonu i te Haapiiraa Bibilia no Gileada a te Watchtower. Ua nehenehe ïa ratou e tavini ei mitionare, e tauturu e e haapuai i ta matou ohipa na te ao nei. I te hebedoma taitahi, e fanaˈo e mirioni taata i te haapiiraa maoti te mau putuputuraa faaterehia i roto i te amuiraa taitahi. Oia atoa te feia e ere i te Ite no Iehova. E faatere atoa matou i te tahi mau piha no te haapii i te taata i te taio e i te papai. No te na reira, ua pia matou i te hoê buka haapii i te taio e i te papai na roto e 120 reo.

•   Te mau ô tauturu. Ua horoa matou i te mau ravea no te tamǎrû i te feia tei roohia i te ati: te ati faatupuhia e te taata mai te taparahiraa taata i Rwanda i 1994 aore ra te ati natura mai te aueueraa fenua i Haïti i 2010.

 E rave rahi tei ravehia maoti teie mau taatiraa, aita râ ta matou mau ohipa i niuhia i nia i te tahi noa ˈˈe o teie mau taatiraa. E hopoia ta te Kerisetiano taitahi ia poro e ia haapii i te taata i te parau apî oaoa. Na te Atua hoi i tono ia ratou. (Mataio 24:14; 28:19, 20) Te tiaturi nei matou e o te Atua o te turu ra i ta matou ohipa e e tamau Oia i te riroraa ei Atua o te “faatupu ra” i te reira.—Korinetia 1, 3:6, 7.