Mai te 29 no Tenuare tae atu i te 11 no Mati 2024, ua apiti hau atu i te 11 000 taeae e tuahine i te hoê pororaa taa ê na roto i te reo Xhosa, faanahohia i te pae hitia o te râ o te oire no Cap, i Afirika apatoa. E hitu mirioni taata to tera oire e te paraparau ra te rahiraa i te reo Xhosa. I te hopearaa o te pororaa taa ê, ua ani hau atu 2 700 taata i te hoê haapiiraa Bibilia.

I tera pororaa taa ê, ua farerei e piti tuahine i te hoê vahine, ua pohe to ˈna taeae i roto i te hoê ati peapea mau e piti hebedoma na mua ˈtu. Ma te taˈi, ua faaite te vahine i na tuahine e piti e ua pohe to ˈna taeae. Ua tamahanahana ïa raua ia ˈna ma te taio atu i te Apokalupo 21:3, 4. Ua hinaaro te vahine e haapii atu â no nia i te parau fafau Bibilia e e faaore te Atua i te pohe e te mauiui. Ua ani oia i na tuahine e piti afea e ihea e tupu ai ta tatou mau putuputuraa e ua haamata atoa oia i te hoê haapiiraa Bibilia.

Ua paraparau te hoê tuahine, o Zukiswa to ˈna iˈoa, e te tahi vahine, e maˈi rahi to ˈna o te puoiraa ivi. No to ˈna maˈi, mea fifi roa no ˈna ia tunu i te maa na ta ˈna mau tamarii. Ua haapeapea te vahine e aita paha e maa no ta ˈna mau tamarii i taua mahana ra i te mea e ua paruparu roa o ˈna e aita i nehenehe e hamani i te faraoa. Ma te here, ua parau Zukiswa e na ˈna e hamani i te faraoa na ratou. I taua taime ra, ua faaite atu te tuahine tei apee ia Zukiswa i te poroi Bibilia i te vahine. Ua maere roa te vahine no te mea ua tâuˈa mau ra raua ia ˈna e ua tauturu raua ia ˈna ma te here. Ma te oaoa, ua faatia te vahine i to ˈna mau hoa eaha ta te mau tuahine i rave no ˈna. I muri iho, ua haamata o ˈna i te hoê haapiiraa Bibilia e te mau Ite no Iehova.

A poro ai i tera e tera fare i te oire o Gqeberha, ua farerei e piti taeae i te hoê tane. Ua tâpûhia hoê o to ˈna na avae. Ua faaite o ˈna ia raua i te hoê manaˈo ta ˈna i feruri noa na, oia hoi i te mea e na te Atua i poiete i te huitaata, no te aha ïa o ˈna e vaiiho ai e na Satani e faatere i teie ao. (Ioane 1, 5:19) Ua faaohipa na taeae e piti i te Bibilia no te pahono i ta ˈna mau uiraa. I muri aˈe i taua mahana ra, ua mataitai ratou i te video No te aha te Atua e vaiiho noa ˈi te mauiui? e ua farii te tane e ta ˈna vahine i te hoê haapiiraa Bibilia.

Ua poro atoa hoê o to tatou mau tuahine i te oire o Gqeberha e ua ani o ˈna i te hoê vahine ia taio i te Salamo 37:29. I muri noa mai i te taioraa i tera irava i roto i ta ˈna iho Bibilia, ua faaite te vahine i te tuahine e aita roa ˈtu o ˈna i taa i ta ˈna i taio. Ua taio ïa te tuahine i tera irava i roto i Te Bibilia, Huriraa o te ao apî na roto i te reo Xhosa. Ua na ô te vahine: “E e, e mea maramarama aˈe no ˈu te huriraa reo Xhosa i roto i ta oe Bibilia. Mea ohie aˈe ia taa, ia faaauhia i ta ˈu huriraa Bibilia!” I teie nei, te oaoa ra o ˈna i te haapii i te Bibilia e te mau Ite no Iehova.

Oaoa roa matou no te mea e rave rahi o te paraparau ra i te reo Xhosa i Afirika apatoa o te farii ra i te poroi o te tiaturiraa ta “te Atua o te tamahanahana i roto i te mau tupuraa atoa” e horoa ra i roto i ta ˈna Parau, te Bibilia.—Korinetia 2, 1:3.