I te 27 no Tetepa 2024, ua tomo te mau mutoi a te hau Érythrée i roto i te hoê fare i reira te mau Ite no Iehova i putuputu ai ma te hau. Ua tapea ratou 24 taata: E 6 taeae, 16 tuahine e e 2 tamarii aita i tia te matahiti. E toru mahana i muri iho, ua hoˈi mai te mau mutoi e ua tapea i te tuahine 85 matahiti o te ora ra i roto i teie fare. I muri iho, ua tuuhia na 2 tamarii, tera râ ua afaihia na 23 taata paari i roto i te fare tapearaa no Mai Serwa.

I teie nei i Érythrée, 63 Ite no Iehova tei tapeahia no to ratou faaroo, 10 o ratou tei hau atu i te 70 matahiti. Aita roa ˈtu hoê o teie mau taeae e tuahine, oia atoa tei tapeahia i roto i teie fare, i parihia aˈenei i te raveraa i te tahi ohipa ino.

E rave rahi matahiti, ua hamani-ino-noa-hia te mau Ite no Iehova i Érythrée. A 30 matahiti i teie nei, i te 25 no Atopa 1994, ua faaore te peretiteni no Érythrée i te tiaraa huiraatira o te mau Ite no Iehova atoa i fanauhia i ǒ. Mai taua matahiti mai â, ua faaruru te mau taeae e tuahine i te hamani-ino-raa uˈana e te ohipa tia ore i mua i te ture.

Te haapeapea nei tatou no ratou e te mauiui nei a faaroo ai i teie mau parau apî. Te tamau noa ra tatou i te “haamanaˈo i te feia i roto i te fare tapearaa” i Érythrée e i te pure no ratou. Te tiaturi nei tatou e tamau noa Iehova i te horoa i te tamahanahanaraa, te faaoromai tamau e te puai no ratou.—Hebera 13:3.