I te 15 no Titema 2023, ua fanaˈo o Simone Arnold-Liebster i te hoê haamaitairaa taa ê a te hau no Heremani. Teie te haamauruururaa teitei roa ˈˈe ta Heremani i horoa i te feia no ta ratou tauturu no te huiraatira. Na te tia o te hau Thomas Pröpstl i haamauruuru ia Simone i te rururaa i tupu i Chambéry i Farani. E 93 matahiti to Simone i teie nei, ua haamauruuruhia o ˈna no ta ˈna mau tutavaraa no te haamanaˈo i te taata te mau ohipa ino ta te faatereraa Nazi i rave e te feia o tei patoi i te turu i te hae e te haavîraa uˈana a tera faatereraa.

Tae roa mai teie mahana, ua paraparau Simone i mua i te taata no e 25 fenua. Fatata 65 000 tei apiti mai, mai te mau piahi haapiiraa e rave rahi e te mau orometua haapiiraa. Noa ˈtu to ˈna matahiti, te apiti noa ra o ˈna na roto i te ravea natirara no te pahono i te mau uiraa a te feia apî e no te faatia ia ratou i te haapiiraa ta ˈna i huti mai i to ˈna apîraa. Ua papai te hoê piahi haapiiraa i to ˈna apitiraa i tera rururaa: “Maoti te aamu o Simone, ua taa ia ˈu e nafea tatou e puaihia ˈi e i itoitohia ˈi ia papu ia tatou i ta tatou mau tiaturiraa.”

Ua parau te tia a te hau, Thomas Pröpstl i muri aˈe i to ˈna haamauruururaa ia Simone: “Mea faahiahia ia ite, noa ˈtu te mauiui ta oe iho i ite, ua itoitohia oe. Ua faatia noa oe i to oe aamu ma te haavare ore e te hoê tiaturiraa papu no a muri aˈe. No reira, te haamauruuru nei e te faatura rahi nei au ia oe.”

I raro aˈe i te faatereraa Nazi, ua faaruru Simone e to ˈna utuafare, mai na tausani Ite no Iehova, i te hamani-ino-raa riaria mau. I te 12raa o to Simone matahiti, ua afaihia o ˈna e ua faahepohia o ˈna ia ora i Constance i Heremani, i te fare auri i Von Wessenberg, i reira te mau Nazi i te tamataraa i te faahepo ia ˈna ia farii e ia turu i ta ratou faatereraa. No te mea aita o ˈna i turu i ta ratou faatereraa, ua faahaamahia o Simone, ua faaitihia ta ˈna maa, ua faahepohia o ˈna i nia i te ohipa e ua opanihia o ˈna ia paraparau e piti matahiti te roaraa. A haamanaˈo ai i tera tau, ua parau Simone: “Ua paturu noa mai Iehova ia ˈu e ua tapea vau i to ˈu hapa ore.”

Te faahiahia mau nei matou i te taiva ore e te hapa ore o Simone, a tamau noa ˈi oia i te faahanahana i to tatou Metua, te Atua ra o Iehova.—Mataio 5:16.