17 NO NOVEMA 2023 | PARAU APÎ: 8 NO TITEMA 2023
INITIA
PARAU APÎ: I teie nei, e vaˈu taata tei pohe no te topita tei paaina i Initia
I te Mahana maa 2 no Titema 2023, hoê matahiapo ei pionie tamau 76 matahiti, tei pohe no to ˈna mau pepe no te topita tei tupu i Kerala, i Initia. Te mea peapea râ, i te Mahana maha 7 no Titema, ua pohe atoa ta ˈna vahine herehia, o tei tavini ei pionie tamau, no to ˈna mau pepe no teie topita. Ia amuihia, e vaˈu ïa taeae e tuahine tei pohe i roto i teie ati riaria mau.
I te Tapati 29 no Atopa 2023, e rave rahi topita tei paaina i te hoê tairururaa e toru mahana i Kerala, i Initia. Te mea peapea râ, hau atu i na e toru taata tei pohe tei faaitehia na, ua pohe atoa hoê taeae e e piti tuahine. I rotopu ia ratou, te vai ra te mama e te taeae o te tamahine 12 matahiti tei pohe na mua ˈtu. Hau atu â, 11 taeae e tuahine tei mau i te fare maˈi.
No te horoa i te tamahanahanaraa e te faaitoitoraa i te feia tei roohia i teie ati, ua farii te amaa no Initia ia faanahohia te hoê putuputuraa taa ê tei faatupuhia i te 4 no Novema 2023. Ua titau-manihini-hia te mau taeae e tuahine no roto e 21 amuiraa, o tei apiti i te tairururaa a paaina ˈi te mau topita, i teie putuputuraa. Ua ravehia teie porotarama i roto i te hoê Piha a te Basileia no ǒ e e 200 taata tei apiti mai. E 1 300 taata tei nati mai e ua faanahohia te hoê haruharuraa no te feia tei mau i te fare maˈi. Ua faahiti te hoê matahiapo no te amaa i te Salamo 23:1 e ua faataa i to Iehova haapeapea no ta ˈna mau tavini tataitahi: “I roto i teie irava, aita te fatu salamo e parau ra e tiai mamoe Iehova aore ra e tiai mamoe faahiahia. Te parau ra te fatu salamo ia Iehova mai ‘to ˈu tiai.’ Mea tamahanahana ia ite e te haapao ra Iehova ia tatou tataitahi!”
Te mau tuahine î i te here o te tamahanahana ra te tahi i te tahi
Te faataa ra te hoê taeae o tei ite i te paainaraa te mau topita e mea fifi no ˈna ia taoto. Noa ˈtu te reira, ua horoa o ˈna i te rima tauturu i te feia tei te fare maˈi noa â. Ua parau oia: “Ua tauturu mai to ratou faaroo e te feruriraa maitai ia ore e haamanaˈo faahou i ta ˈu mau haapeapearaa. Noa ˈtu to ratou mau pepe e mauiui, e rave rahi o ratou tei himene i te mau himene arueraa.” Ua faataa te tahi atu taeae: “Titauhia te taime e rave rahi no vetahi o ratou, ia rave faahou i ta ratou i matau na. Noa ˈtu râ, ua ite au e tamau to tatou fetii taeae i te faaite ia ratou i te here. Ua papu ia ˈu e aupuru to tatou Atua î i te here ia ratou tataitahi maoti to ˈna rima puai. Auê ïa faaitoitoraa mau!”
Ei fetii taeae tahoê na te ao, mea tamahanahana ia ite e e tamau Iehova i ‘te rapaau i te feia aau oto e e taamu i te mau pepe’ o to tatou mau taeae e tuahine here i Initia.—Salamo 147:3.