Mai tei faataahia na mua ˈtu i roto i te parau faaara i nia i te jw.org, e rave rahi topita tei paaina i te hoê tairururaa e toru mahana tei tupu i Kerala, i Initia i te Tapati 29 no Atopa 2023. Te mea peapea râ, hau atu i na piti tuahine tei pohe, ua pohe atoa te hoê tamahine 12 matahiti no to ˈna mau pepe. I rotopu i na 55 taeae e tuahine tei pepe, te vai ra ua paapaa maitai.

E toru tuahine e e piti taeae tei mau i te fare maˈi e mea peapea to ratou tupuraa. Ua haapapu te feia mana, e toru topita tei paaina i te pure omuaraa i te hora 9:40 i te poipoi. Ua tapeahia te hoê taata tei rave paha i teie ohipa ino e te mau mutoi e tei roto teie ohipa i te hiˈopoaraa.

Ua oaoa roa matou i te tae-oioi-raa mai te mau utuutu maˈi i te vahi tairururaa no te horoa i te rima tauturu e te mau taote no te rapaau i te mau pepe.

Ua mauruuru e ua itoitohia te feia tei apiti mai i te tairururaa i te here e te turu ta te mau taeae e tuahine i faaite. Te haamanaˈo ra te hoê tuahine a paaina ˈi te mau topita: “Ua pure oioi au ia Iehova. Ua haapao maitai e ua haa oioi te feia tei apiti i te tairururaa e te mau taeae no te aupuru e no te paruru ia matou. Te faaite ra te reira i te here e te haapeapea o Iehova no tatou tataitahi.”

Ua tamau noa te mau tia o te amaa i Initia, te mau tiaau haaati e te mau matahiapo i te horoa i te maa pae varua e i te tauturu i te feia tei roohia i teie ati. Te faataa ra te hoê matahiapo no te amaa o tei haere i Kerala no te tamahanahana i te mau taeae e tuahine o tei faaruru i teie ati: “Noa ˈtu te riaria, te mauiui, ua itoitohia vau i te huru feruriraa maitai o te mau taeae tei pepe. Ua paraparau vau e rave rahi o ratou. E ua puaihia to ˈu faaroo i te ite-maitai-raa i to ratou tiaturi papu ia Iehova.”

Ei fetii taeae na te ao nei, te pure nei tatou no te mau fetii ua roohia hoê mero o te utuafare i teie ati e te feia tei farerei i tera ati i Initia. Te ite ra tatou i te tamahanahana i roto i te parau fafau Bibilia no te hoê a muri aˈe aita e haavîraa uˈana, e mauiui e e pohe. E faaoti papu anaˈe i te tuu i to tatou tiaturiraa ia Iehova.—Salamo 56:3.