Mai te avaˈe Mati 2020, aita faahou i faatupu-tino-hia te mau tairururaa no te maˈi parare COVID-19. I teie râ matahiti, e faatupu-tino-hia e 6 000 tairururaa “A faaoromai”! na te ao atoa nei, na roto e 500 reo. Ua tupu te tairururaa matamua i te 12 tae atu i te 14 no Me 2023.

Ua hau i te 1 800 taata tei tae mai i te tairururaa i te Piha tairururaa a te mau Ite no Iehova no Newburgh, i New York, i Marite. Ua apiti te tuahine Khrystine Torres i taua tairururaa ra, e teie ta ˈna i parau: “I te parauraa te peretiteni e: ‘Maeva,’ popo aˈera te taatoaraa. Ua oaoa roa te taata atoa i te amui faahou no te tairururaa.” Tei roto atoa te taeae Duane Smith, ua na ô o ˈna: “E ite-roa-hia e ua oaoa roa te mau taeae e tuahine i te amui-faahou-raa mai.”

Ua bapetizohia te tuahine Jessica Dolcemascolo i te roaraa o te tau opanipaniraa, aita ïa o ˈna i apiti tino aˈenei i te hoê tairururaa. Teie ta ˈna i parau: “Ua î roa vau i te oaoa e te here, mai te huru ra e a tahi ra vau i farerei faahou ai i to ˈu hoa rahi mea maoro te moˈeraa.” E 18 matahiti to te tuahine Noemi Tinajero, ua bapetizohia oia i teie matahiti. Ua na ô o ˈna: “Ua oaoa roa te mau utuafare, te mau hoa. . . . Mai tera ïa i roto i te ao apî.”

E rave rahi tei faaite i to ratou mauruuru no te tumu parau o te tairururaa. Ua parau taeae Sam Huh: “Mea fifi no e rave rahi o tatou ia faaoromai. Ua tano maitai ïa teie haamanaˈoraa ia pee i te hiˈoraa faahiahia roa o Iehova no nia i te faaoromai.” Ua na ô te tuahine Frenchie Smith: “Ua haapii teie tairururaa ia ˈu e nafea te faaoromai e ohipa ˈi i roto i te mau tuhaa atoa o to ˈu oraraa. Mai te huru ra e ua ite au ia ˈu i roto i te mau tumu parau atoa i vauvauhia mai.”

Ua riro teie tairururaa matamua i Newburgh, i New York, ei taime faaitoito mau no te feia atoa i apiti atu. Te tiai ru nei tatou e e mirioni atu â ia fanaˈo i teie tamaaraa pae varua i roto i te mau avaˈe e haere mai nei.—Salamo 122:1.