I te 23 no Novema 2023, ua pohe Mary Larimer, o tei faatuitehia i te haapiiraa matamua o te Fare haapiiraa tuatoru Bibilia no Gileada a te Watchtower. a Ua fanauhia Mary i te 4 no Tiunu 1920 i Scenery Hill, Pennsylvanie, i Marite. I 1935, ua bapetizohia oia i te 15raa o to ˈna matahiti, i te tairururaa i Washington, i Marite. Maha matahiti i muri iho, ua riro mai tuahine Larimer ei pionie tamau e ua matauhia oia ei taata poro itoito rahi.

I Titema 1942, ua titau-manihini-hia Mary na taeae Nathan Knorr, o te tiaau ra i te faanahonahoraa, ia faaî i te hoê aniraa no te haere i te Fare haapiiraa tuatoru Bibilia no Gileada a te Watchtower. Te faaite ra teie titauraa, “te fa o teie haapiiraa, no te faaineine i te mau taeae e tuahine no te taviniraa mitionare na te ao nei.” Te faahiti atoa ra teie titauraa: “E pae avaˈe te roa o teie haapiiraa . . . Te fa ia tutava ratou i roto i te haapiiraa i roto i te hoê tau poto.” E ua faahoˈi oioi ïa Mary i ta ˈna aniraa.

I te 1 no Fepuare 1943, ua apiti ïa oia e na 99 piahi i te haapiiraa matamua o teie haapiiraa apî i South Lansing, New York, i Marite. I te roaraa o na pae avaˈe, ua haapii maite Mary no nia i te mau Papai. Ei piahi maitai roa o ˈna e ua faatuitehia oia i te 23 no Tiunu 1943.

I muri aˈe i te faatuiteraa, ua tonohia Mary i Cuba ei mitionare. Ma te faahiti i te tahi mau fifi ta ˈna i ite, ua haamanaˈo oia: “Mea veve te feia i ǒ e no te taviniraa e na avae noa matou . . . e aita to matou e pereoo.” Ua faaea Mary i ǒ tae roa i 1948, i muri iho, ua hoˈi o ˈna i Pennsylvanie no te haapao i to ˈna mama, tei pepe maitai. I te mau matahiti i muri aˈe, ua tamau noa Mary i te rave i ta ˈna taviniraa e i te tahi atu mau ohipa Kerisetiano ei taata taa noa. I te taime a pohe ai oia, ua tavini oia i roto i te hoê amuiraa i Glendale, i Kalifonia, i Marite.

I teie nei, tei Patterson, i New York, te Haapiiraa Bibilia no Gileada, i reira te ravehia ra te 155raa o te haapiiraa. I to te taeae haapii o Mark Noumair faarooraa ua pohe Mary, ua parau oia: “Ei tamahine apî o Mary Larimer no te hoê oire iti o tei ineine i te haere i te mau vahi atoa no te poro i te taata no nia ia Iehova. Aita o ˈna i ite i te vahi e tonohia ˈi oia e e hoˈi mai anei o ˈna i te hoê mahana. Ua tauturu te mau mitionare no Gileada mai ia Mary ia haamau e ia nuu te ohipa pororaa na te ao i mua.”—Isaia 6:8.