I 25 no Atopa 2023, ua tupu te mataˈi rorofai Otis i te pae apatoa hitia o te râ o te pae miti i Mehiko i pihai iho i te oire ratere no Acapulco. Mea puai aˈe e mea vitiviti aˈe tera mataˈi i te puai mai, ia faaauhia i te tahi atu mau mataˈi rorofai tei tupu i tera pae o te Miti Patitifa. Ei faahopearaa, ua itehia te mau mataˈi tei naea hau atu 265 kilometera i te hora, te mau ûa puai e te pape pue. Te faaite ra te mau vea ua ino roa te mau purumu, te mau fare tahua rau e te uira. Aita e uira faahou no e tausani taata. E ua pohe 45 tiahapa taata.

Ua niuhia to muri nei mau haamaramaramaraa i nia i te mau faaiteraa matamua a te mau taeae i taua vahi ra.

• Aita hoê aˈe taeae e tuahine tei pohe aore ra tei pêpê

• Te ora ra hau atu 10 000 taeae e tuahine i te vahi i tupu ai te ati

• Ua ino roa 1 piha tairururaa i Acapulco

• Te horoa ra te mau tiaau haaati e te mau matahiapo i te tamahanahanaraa a te Bibilia e te tauturu papu i te feia tei roohia i te ati i tera mau vahi

• E 4 tia a te amaa no Marite no ropu tei haere i taua vahi ra no te horoa i te mau faaitoitoraa e tauturu

• Ua haamauhia hoê Tomite tauturu no te ati natura no te faanaho i te ohipa tauturu

Te pure nei matou ia tamau Iehova i te horoa i te hau e te tamahanahanaraa i to tatou mau taeae e tuahine tei faaruru i te mataˈi rorofai Otis.—Philipi 4:6, 7.