Te oaoa nei te Tino aratai i te faaite atu ua naea ia tatou te hoê numera faahiahia i roto i te ohipa e faariro i te taata o te mau nunaa atoa ei pǐpǐ na te Mesia. I teie mahana, te piahia nei i nia i te reni natirara JW.ORG te mau tumu parau, video e haruharuraa na roto 1 000 reo. I roto i tera numera, ua taio-atoa-hia 100 reo apǎraa rima.

Te na ô ra te taeae Gerrit Lösch, mero o te Tino aratai: “Fatata 150 matahiti to tatou haamataraa i te huri i te mau papai Kerisetiano. Ua rahi roa ˈtu râ te reo ta tatou e huri i na ahuru matahiti mairi aˈenei.” Te parau atoa ra te taeae Geoffrey Jackson, mero o te Tino aratai: “I Tenuare 2013, ua huri tatou na roto 508 reo, ua titauhia râ e rave rahi roa matahiti no te naea i tera numera. E 508 reo na mua ˈˈe, i teie nei, 1 000 reo! Mea faahiahia roa, i roto noa e hitu matahiti, ua tataipiti te rahiraa reo ta tatou e huri ra!”

I nia i ta tatou reni natirara, e nehenehe e rave mai e rave rau tumu parau na roto 1 000 reo. E nehenehe te tuhaa omuaraa e te tahi atu tuhaa o te reni jw.org e itehia na roto 821 reo. Tera ïa te reni natirara tei huri-roa ˈˈe-hia! Te ravehia nei tera ohipa huriraa e te mau rima tauturu faaineine-maitai-hia o te haa ra i roto 350 piha huriraa na te ao nei.

Te faataa ra te taeae Izak Marais o te tiaau ra i te Tuhaa huriraa i te pu rahi i Warwick, New York: “Ua farerei matou i te tahi mau fifi taa ê mau no te huri e no te pia i te mau papai na roto e rave rahi reo. I te tahi taime, ua hinaaro matou e pia na roto i te mau reo o tei ore i matauhia e te rahiraa, aita râ te mau reta e tapao papairaa na roto i tera mau reo. I te roaraa o te mau matahiti, ua titauhia ia hamani i te reira ia nehenehe tatou e nenei i te mau papai na roto e rave rahi roa reo. Ua farerei atoa matou e rave rahi fifi ia nehenehe ta tatou mau papai ia piahia i nia i te reni natirara jw.org na roto e rave rahi reo. O te reni jw.org anaˈe te pia nei na roto i te rahiraa o tera na 1 000 reo!”

Te parau atoa ra taeae Clive Martin o te tiaau ra i te Tuhaa haapao i te MEPS: “Hoê o te mau fifi ta matou i farerei, o te imiraa ïa i te ravea no te faanaho i te hoê tumu parau o te piahia i nia i te hoê â reni natirara na roto e rave rahi roa reo mea taa ê te huru papairaa. Ei hiˈoraa, e 21 reo i nia i ta tatou reni o te papai nei mai te pae atau i te pae aui. No na 100 reo apǎraa rima, ua titauhia ia hamani i te hoê faanahoraa taa ê ia ohie te feia turi i te hiˈo haere i nia i ta tatou reni natirara.”

Pinepine te mau reni natirara i te hurihia na roto i te tahi atu mau reo mai te peu noa e noaa rahi mai te moni. Mea taa ê râ te manaˈo o te mau Ite no Iehova. Ta ratou hoi fa, ia faaite-haere-hia te poroi Bibilia ma te ravea ohie e te anaanatae i te feia atoa.

Te arue e te faahanahana nei tatou ia Iehova no te mea te haamaitai ra o ˈna i ta tatou mau tutavaraa ia “faariro i te taata o te mau nunaa atoa ei pǐpǐ” na te Mesia. Tae roa ˈtu i te taime e oti ai ta tatou ohipa, e tamau Iehova i te horoa mai i te puai e te mau faufaa hinaarohia no te faaite haere i te poroi o te Faatereraa arii i te feia aau farii na te ao atoa nei.—Mataio 28:19, 20.