I te 2 no Atete 2024, ua faaite o taeae Carlos Hortelão, mero o te Tomite amaa no Angola e ua matara mai te Huriraa o te ao apî o te mau Papai Heleni Kerisetiano, oia atoa te mau buka Bibilia mai te Genese, Ruta, Esetera e Iona na roto i te reo Ibinda. Ua faaitehia te reira i te mahana matamua o te tairururaa e toru mahana 2024 “A faaite i te parau apî oaoa!” i Cabinda, i Angola. E 953 taata tei haere atu i tera tairururaa e ua fanaˈo ratou i te hoê neneiraa o te Huriraa o te ao apî o te mau Papai Heleni Kerisetiano. Oioi te mau Papai Heleni Kerisetiano e te mau Papai Hebera i te matara mai i nia i te reni natirara jw.org e i nia atoa i te ravea roro uira JW Library.

Ua hau atu i te 716 000 taata e paraparau ra i te reo Ibinda i Angola. A tahi ra hoê huriraa Bibilia i matara mai i roto i te reo Ibinda. I teie nei, mea oaoa roa te mau taeae e tuahine i te fanaˈoraa mai i te Parau a te Atua na roto i to ratou iho reo. E 335 taeae e tuahine o te tavini nei i roto 13 amuiraa e i roto atoa i te hoê pǔpǔ reo Ibinda i Angola.

I te 9 no Atete 2024, o taeae Energy Matanda, mero o te Tomite amaa no Zimbabwe, tei faaite e ua matara mai te Huriraa o te ao apî o te mau Papai Heleni Kerisetiano na roto i te reo apǎraa rima Zimbabwe. Ua tupu te reira i te tairururaa e toru mahana 2024 “A faaite i te parau apî oaoa!” i Harare, i Zimbabwe. E 405 taata tei haere i tera tairururaa e ua nehenehe te taatoaraa e haere i nia jw.org e i nia i te ravea roro uira JW Library reo apǎraa rima no te rave mai i te huriraa Bibilia apî.

I 2021, ua matara mai te buka a Mataio na roto i te reo apǎraa rima Zimbabwe. I teie nei, ua huri-atoa-hia te tahi atu mau buka o te mau Papai Heleni Kerisetiano. I Zimbabwe, hoê mirioni tiahapa taata te faaohipa nei i te reo apǎraa rima, oia atoa na 377 taeae e tuahine i roto 11 amuiraa e 11 pǔpǔ reo apǎraa rima.

I te 11 no Atete 2024, o taeae Mark Sanderson, mero o te Tino aratai, tei faaite e ua faaapîhia Te Bibilia, Huriraa o te ao apî na roto i te reo Bulgarie. Ua faaara atoa o ˈna e ua matara mai te mau buka Bibilia a Mataio, Mareko e Luka. Ua faaite o ˈna i te reira i te oreroraa parau hopea o te tairururaa taa ê 2024 “A faaite i te parau apî oaoa!” i Sofia, i Bulgarie. E 5 418 taata tei putuputu atu e ua nehenehe te mau taata atoa e rave mai i te reira i nia jw.org e JW Library.

I 2009, ua matara mai Te Bibilia, Huriraa o te ao apî na roto i te reo Bulgarie. I teie nei, te tavini nei fatata 3 000 taeae e tuahine i roto 57 amuiraa i te fenua Bulgarie.

I te 16 no Atete 2024, ua faaara taeae Bois Sylvain, mero o te Tomite amaa no Afirika tooa o te râ, e ua matara mai na buka Bibilia a Mataio e Mareko na roto i te reo Adja. Ua tupu te reira i te tairururaa e toru mahana 2024 “A faaite i te parau apî oaoa!” i Djakotomey, i Bénin. E 631 taata tei haere i tera tairururaa e e 435 taata tei apiti mai na nia i te natirara mai te Piha tairururaa mai i Abomey-Calavi, i Bénin. Oioi te huriraa apî o na buka Bibilia i te piaraahia i nia jw.org e JW Library.

Te vai ra hau atu i te 1 200 000 taata o te paraparau ra i te reo Adja i Bénin e i Togo. Ua matara mai e piti atu huriraa o te mau Papai Heleni Kerisetiano na roto i te reo Adja. E ere râ i te mea ohie ia fanaˈo i te reira e no te rahiraa o te feia taio, mea fifi roa ia taa. Hau atu â, ua faaorehia te iˈoa o te Atua ra o Iehova i roto i na huriraa e piti. I teie nei, te vai ra 1 300 tiahapa taeae e tuahine e tavini ra i roto i na 25 amuiraa reo Adja e hoê pǔpǔ i Bénin, oia atoa 12 amuiraa e 2 pǔpǔ i Togo. Oaoa ratou pauroa i te fanaˈoraa i te hoê huriraa maramarama roa o te faahoˈi ra i te iˈoa o te Atua i te vahi tano.

I te 16 no Atete 2024, ua faaite taeae Jeffrey Winder, mero o te Tino aratai e ua matara mai Te Bibilia, Huriraa o te ao apî faaapîhia na roto i te reo Kinyarwanda. Ua tupu te reira i te mahana matamua o te tairururaa e toru mahana 2024 “A faaite i te parau apî oaoa!” i Kigali, Rwanda. Ua putuputu mai e 9 908 taata e ua apiti 1 141 taata na nia i te natirara, mai e piti atu vahi tairururaa. Ua fanaˈo ratou pauroa i te hoê neneiraa o te Bibilia. Ua tuu-oioi-hia te Huriraa o te ao apî na roto i te reo Kinyarwanda i nia i te jw.org e JW Library. Oia atoa te mau haruharuraa o te Bibilia.

I Rwanda, te paraparau ra hau atu i te 13 mirioni taata i te reo Kinyarwanda. Oia atoa i te tahi atu mau fenua mai te Repupirita manahune no Congo, te Tanzanie e te Ouganda. I 2010, ua matara mai te taatoaraa o Te Bibilia, Huriraa o te ao apî no te taime matamua roa na roto i te reo Kinyarwanda. I teie nei, te vai ra hau atu i te 35 500 taeae e tuahine o te tavini nei i roto 634 amuiraa reo Kinyarwanda i Rwanda.

I te 16 no Atete 2024, o taeae David Splane, mero o te Tino aratai, tei faaite e ua matara mai Te Bibilia, Huriraa o te ao apî faaapîhia na roto i te reo Singhalais, i te mahana matamua o te tairururaa e toru mahana 2024 “A faaite i te parau apî oaoa!” i Colombo, i Sri Lanka. Ua putuputu mai 4 273 taata e ua apiti mai 1 045 taata na nia i te natirara i te oire o Chilaw i Sri Lanka. Ua fanaˈo ratou pauroa i te hoê neneiraa o te Huriraa o te ao apî na roto i te reo Singhalais. Ua nehenehe atoa ratou e rave mai i te reira i nia jw.org e JW Library.

Hau atu 75 matahiti na mua ˈtu, ua haamata te mau Ite no Iehova i te huri i te mau papai niuhia i nia i te Bibilia na roto i te reo Singhalais. I teie nei, te vai ra hau atu 15 mirioni taata o te paraparau ra i te reo Singhalais i Sri Lanka. I rotopu ia ratou, te vai ra to tatou mau taeae e tuahine, e 4 808 ratou e te tavini nei ratou i roto e 62 amuiraa reo Singhalais.

I te 30 no Atete 2024, na taeae Martin Décousus, mero o te Tomite amaa no Taratoni, i faaite atu e ua matara mai te taatoaraa o Te Bibilia, Huriraa o te ao apî na roto i te reo Wallis i te tairururaa e toru mahana 2024 “A faaite i te parau apî oaoa!” Ua tupu teie tairururaa i te oire o Nouméa, i Taratoni. Ua apiti atoa mai te tahi atu mau taata na nia i te natirara, mai te oire iti mai o Malaˈe, i Wallis e Futuna. Ua fanaˈo na 317 taata tei tae mai i te hoê neneiraa o te Huriraa o te ao apî. Oioi atoa te reira i te tuuraahia i nia jw.org e JW Library.

I 2018, ua matara mai te Huriraa o te ao apî o te mau Papai Heleni Kerisetiano na roto i te reo Wallis. Te tavini ra 153 taeae e tuahine i roto e piti amuiraa i Taratoni e i Wallis e Futuna. I tera mau fenua, te vai ra hau atu i te 35 000 taata e paraparau ra i te reo Wallis. Te tiai ru nei to tatou mau taeae e tuahine i te faaohipa i te taatoaraa o te Huriraa o te ao apî no te faaite atu i te parau apî oaoa.