I te 8 no Eperera 2024, ua itehia te hoê haapoiriraa mahana taatoa i te mau tuhaa fenua i Marite apatoerau. E mirioni taata te haere mai no te mataitai i teie tupuraa natura, te vai ra mea atea to ratou haereraa mai. Ua faanahohia te hoê pororaa taa ê i roto i na 24 oire, i reira e itehia teie haapoiriraa mahana. Ua apiti te mau Ite no Iehova no Kanada, Mexico e Marite i roto i teie pororaa taa ê. Ua faaohipa ratou i te mau vairaa papai afaifai no te faaite i te poroi a te Bibilia e te mau vea na roto 15 reo.

I te oire o Carbondale, Illinois i Marite ua tapiri mai e piti piahi haapiiraa tuatoru i te vairaa papai afaifai. Ua haamata hoê o to tatou tuahine i te aparauraa no nia i te uiraa papaihia i nia i te paruai “Mea poietehia anei?” I te roaraa o te aparauraa, ua ani hoê o na taurearea: “Mai te peu te vai ra te Atua e mai te peu te here ra o ˈna ia tatou, no te aha ïa o ˈna e faatia ˈi i te mauiui?” Ua faaite atura te tuahine nafea ia faaohipa i te reni jw.org no te ite i te pahonoraa. Ua maere na piti piahi, no te mea ua ite raua te pahonoraa o ta raua uiraa i roto hoê o ta tatou mau video. Ua hinaaro raua e ite hau atu â, e ia faaite te mau mea ta raua i haapii i to raua mau hoa.

I Sherbrooke, Québec i Kanada, te poro ra te hoê tuahine i pihai iho i te vairaa papai afaifai. Ua maere roa te hoê taurearea i to te tuahine aroharaa ia ˈna na roto i to ˈna reo Pendjabi. Maoti noa teie parau iti, ua nehenehe e haamata i te hoê aparauraa au maitai. Ua faaite te tuahine mea nafea e tupu ai te hoê haapiiraa Bibilia i nia i te buka rairai Ia ora oe e a muri noa ˈtu! Ua maere roa teie taurearea i te ite e nehenehe o ˈna e fanaˈo i te hoê haapiiraa Bibilia i te taime e te vahi ta ˈna e hinaaro ra, na roto atoa i te ravea natirara. Ua rave te tuahine i te mau faanahoraa ia haamata te hoê taeae i ta ˈna haapiiraa Bibilia.

I te oire no Evansville, Indiana i Marite, i pihai iho i te vairaa papai afaifai ua paraparau te hoê tuahine e te hoê vahine tei faarue i to ˈna vahi nohoraa no te haapao i to ˈna mama tei maˈihia. Ua faaite to tatou tuahine e ua taa ia ˈna i te mau fifi ta ˈna e farerei ra no te mea te haapao atoa ra o ˈna i to ˈna mama. I muri iho, ua taio te tuahine i te mau irava tamahanahana mau i roto i te Isaia 33:24 e te Apokalupo 21:4. Ua putapû roa teie vahine i te faarooraa i teie mau parau fafau a te Bibilia e ua ani o ˈna ia taio faahou mai te tuahine i teie mau irava. Mea au roa ta raua aparauraa Bibilia e ua faanaho ia tamau noa te reira.

Mea oaoa roa na tatou i te iteraa e ua nehenehe to tatou mau taeae e tuahine no Marite apatoerau e faaohipa i teie tupuraa taa ê no te haapii ia vetahi ê no nia i to tatou “Atua poiete rahi” e ta ˈna mau parau fafau faahiahia mau.—Koheleta 12:1, 2.