I Tetepa 2023, ua apiti te mau Ite no Iehova na te ao nei i te hoê pororaa taa ê no te faaite no nia i te Faatereraa arii a te Atua. Ua operehia Te Pare Tiairaa N^o 2 2020 “Eaha te Basileia o te Atua?” a E faaite te mau tupuraa i muri mai i tei itehia i te roaraa o teie pororaa taa ê na te ao nei.

I te roaraa o te pororaa taa ê, ua farerei Mark e ta ˈna tamaiti o Flynn ahuru matahiti, no Southport, i Beretane i te hoê vahine i to ˈna fare. Ua oaoa roa te vahine i te raveraa i Te Pare Tiairaa e ua parau oia no nia i te uiraa o te api matamua: “Aita vau i manaˈo e haere mai outou! Te hinaaro nei hoi au e ite i te pahonoraa o teie uiraa.” Ua faataa oia ma te taˈi e aita i maoro ua pohe ta ˈna tamaiti e ua imi oia i te tamahanahanaraa. Faaite oioi atura Mark ia ˈna i te parau tohu o ta te Faatereraa arii e faaite ra no nia i te faatiaraa. Ua oaoa roa teie vahine e ua ani hau atu â haamaramaramaraa. I to Mark e Flynn hoˈiraa ˈtu e farerei ia ˈna e ta ˈna tane, ua farii raua i te buka rairai Ia ora oe e a muri noa ˈtu! e ua haamata raua i te hoê haapiiraa Bibilia.

I Initonetia, a tiai noa ˈi te hoê taeae o Frederick te iˈoa i te taote, ua haamata oia i te paraparau i te hoê taata e ta ˈna tamaiti. Mea papu, ua poro Frederick no nia i te parau tohu o te Bibilia o te faaite ra, fatata te maˈi e te mauiui i te ore roa. I muri iho, ua faaite oia i te Mataio 6:9, 10 o ta teie taata i taio e ua ui Frederick ia ˈna: “E nafea ïa te mauiui e faaorehia ˈi?” Ua pahono te taata: “Maoti te Atua e ta ˈna Faatereraa arii.” I muri aˈe, ua ani te taata eaha te Faatereraa arii a te Atua, i tera râ taime, ua pii te taote ia ˈna e ta ˈna tamaiti e ua haere raua. Oioi ïa Frederick i te horoa ˈtu i to ˈna vahi nohoraa e Te Pare Tiairaa. I te mahana i muri iho, ua maere Frederick ua haere mai teie taata e ta ˈna vahine i to ˈna fare, no te ite hau atu â no nia i te mau haamaitairaa o te Faatereraa arii a te Atua. Ua oaoa Frederick i te raveraa i te mau faanahoraa no te tamau i teie aparauraa.

I Malawi, ua horoa e piti tuahine na te hoê raatira o te hoê oire iti i Te Pare Tiairaa e ua faataa e fatata te Faatereraa arii a te Atua e faatere i te fenua. Ua ui te raatira: “Te auraa anei ïa i te hoê mahana e ere au i ta ˈu faatereraa?” I muri aˈe i te faaiteraahia no te aha o te Faatereraa arii a te Atua anaˈe te ravea no te mau fifi o te huitaata, ua parau te raatira: “E parau apî iho â teie. Ei raatira, te taa ˈtura ia ˈu aita te mau raatira e nehenehe e rave i te mau mea ta te Faatereraa arii a te Atua e rave no te huitaata.” I muri iho ua ani teie raatira, pae atu â vea o Te Pare Tiairaa no te horoa na te tahi atu mau raatira o te tahi mau oire iti. Ua parau atoa oia e te tiai ru nei oia i te mau aparauraa no nia i te Bibilia i mua nei.

A tere ai te pereoo mataeinaa i Puebla, i Mehiko, ua ani te hoê tuahine i te hoê taata e nehenehe anei o ˈna e faaite atu i te hoê poroi faaitoito mau. Ua farii teie taata, e ua taio te tuahine i te mau parau a Iesu no nia i te Faatereraa arii a te Atua i roto i te Mataio 6:9, 10. Ua ani teie taata: “Eaha te Faatereraa arii a te Atua? Aita vau i taio aˈenei i te Bibilia aore ra i paraparau i te mau Ite no Iehova na mua ˈtu.” Ua pahono to tatou tuahine i ta ˈna uiraa ma te faaite ia ˈna i Te Pare Tiairaa i nia i ta ˈna vini. Ua haamata teie taata i te uiui rahi ia ˈna, ua faataa ˈtu ïa to tatou tuahine e nafea oia e nehenehe ai e faaohipa i te JW Library no te ite i te mau pahonoraa. Ua ite teie taata aita i toe rahi mai te vahi haaputuraa i nia i ta ˈna vini, ua tumâ oia i te mau mea aita e faufaa e ua parau: “Mea faufaa aˈe te mau mea no nia i te Faatereraa arii a te Atua.” A tapae ai te pereoo mataeinaa i te vahi haapouraa, ua oti atoa ïa ia ˈna Te Pare Tiairaa i te taiohia, te aparauraa o te haapiiraa matamua o te buka rairai Ia ora oe e a muri noa ˈtu! e ua farii i te hoê haapiiraa Bibilia. Ua haamauruuru noa teie taata i to tatou tuahine e ua faaite e te hinaaro nei oia e apiti i te mau putuputuraa.

A poro ai i tera e tera fare i Niu Zelani, ua faataa te hoê taeae o Ben te iˈoa i te hoê mama i ta te Faatereraa arii a te Atua e fatata i te rave na te feia e haapeapea ra. Ua faataa te mama: “Aita vau i manaˈo e tae mai outou! I na po ra, aita to ˈu taoto i topa no te mea te haapeapea rahi ra vau no te a muri aˈe.” Ua tahe to ˈna roimata i to Ben taioraa i te Apokalupo 21:4 e i to ˈna faataaraa i ta te Faatereraa arii e rave no te faaore i te maˈi e te pohe. Ua oaoa roa teie vahine i te rave i Te Pare Tiairaa e ua parau te hinaaro ru ra oia i te taio i te reira e i te haapii hau atu â.

I Soudan apatoa, i roto i te hoê puhapa no te feia horo ê, e rave rahi tei oaoa i te haapii no nia i te Faatereraa arii a te Atua. Oia mau, i roto noa piti hora, fatata 1 000 papai, oia atoa Te Pare Tiairaa, tei operehia. Ua faaite hoê o te feia horo ê: “Tano maitai outou i te haereraa mai. Tera iho â ta matou i hinaaro na!” Ua parau te tahi taata horo ê i to tatou mau taeae: “Mauruuru i to outou haamanaˈoraa ia matou. Ua ite matou mea atea to outou haereraa mai, a hoˈi mai faahou râ.”

I Taïwan, ua farerei e piti tuahine i te hoê taata tei haapeapea rahi no te ati auahi tei tupu i Vaihi. Ua faaite hoê o te mau tuahine ia ˈna i te hohoˈa o Te Pare Tiairaa no nia i te paradaiso i nia i te fenua. Ua parau teie taata: “Mea nehenehe roa te reira, ahani mai tera atoa te fenua. Ua î te ao i te parau peapea, e mea au ia faaroo i teie poroi mahanahana.”

E fanaˈoraa taa ê, i to tatou apitiraa i teie pororaa taa ê na te ao nei e i te faaiteraa i te taata, o te Faatereraa arii a te Atua te tumu o te tamahanahanaraa e te tiaturiraa mau.—Roma 15:4.

I raro mai, hoê haaputuraa hohoˈa o to tatou mau taeae e tuahine no e rave rahi fenua o te oaoa ra i te apiti i te pororaa taa ê na te ao nei.