I roto i na e piti tuhaa matamua o teie tumu parau, ua faataahia e nafea tatou i te faaohiparaa i ta tatou reni jw.org no te pia i te mau papai e video e no te horoa atoa i te parau apî papu no nia i to tatou mau taeae e tuahine na te ao nei. I roto i teie tuhaa hopea e hiˈopoa tatou e nafea te reni jw.org i te tururaa i te ohipa pororaa na te ao nei.

Te reo e rave rahi: I Atete 2012, ua faaapîhia te reni jw.org e i tera taime ua hurihia te Omuaraa o taua reni natirara ra na roto e 139 reo. E i Atete 2014, ua maraa teie numera hau atu i te 500 reo i muri aˈe i te opereraa taa ê na te ao nei o te api parau no te haafaufaa i te reni jw.org. Mea faahiahia ia ite e te vai ra e 22 reo aparaa rima i roto i tera numera. I teie mahana, ua hau i te 1 070 reo, tei roto atoa hau atu i na 100 reo aparaa rima.

Tumu parau i te taime tano: I Atopa 2019, ua ravehia te tahi tauiuiraa i nia i te Omuaraa o te reni jw.org. Te vai ra te hohoˈa o te tumu parau matamua o te huti ra i to tatou ara-maite-raa e te vai atoa ra e toru tumu parau tei maitihia i raro aˈe. Mea faufaa roa teie faanahoraa apî no te taviniraa. I muri iho, ua haa amui te Tuhaa papairaa e te Tuhaa o te mau hohoˈa no te tuu i nia i te Omuaraa o te reni jw.org i te mau tumu parau faufaa e te tahi atu tumu parau no nia i tei tupu na te ao nei. Ei hiˈoraa, ua piahia te mau tumu parau no nia i te maˈi parare COVID-19, te tamaˈi rotopu ia Rusia e Ukraine e te feia tei horo ê i to ratou fenua.

Ta tatou reni natirara: E tauturu te reni jw.org i te taata e hinaaro ra e imi i te haamaramaramaraa tano no nia i ta tatou faanahonahoraa e ta tatou ohipa. E nehenehe atoa te taata e ani i te hoê farereiraa no te ite hau atu â. Mai teie vahine tariˈa turi tei haapii aˈena i te Bibilia e te mau Ite no Iehova i te tau a haere ai oia i te haapiiraa tuarua. Ua faaea râ oia i ta ˈna haapiiraa Bibilia i te taime a taui ai i to ˈna vahi faaearaa. Ua hinaaro o ˈna e haapii faahou i te Bibilia, aita râ te mau Ite no Iehova i haere atura i to ˈna fare apî. Haamanaˈo atura o ˈna i te reni jw.org e faaî ihora i te hoê aniraa i nia i taua reni ra no te farerei i te mau Ite no Iehova. Tau mahana noa i muri iho, e piti pionie taa ê tei patoto i to ˈna uputa. Ua haapii faahou o ˈna e ua haere atoa i te mau putuputuraa. I teie nei, ua bapetizohia o ˈna e te haapii ra i ta ˈna e toru tamarii no nia ia Iehova. Te parau ra o ˈna: “Te haamauruuru nei au ia Iehova no te reni jw.org. Ahani aita vau i faaî i te hoê aniraa i nia i teie reni natirara, e tiai maoro paha ïa vau no te farerei i te hoê Ite no Iehova.”

A rahi noa ˈtu â te ohipa pororaa, mea oaoa ia ite e te horoa ra te faanahonahoraa a Iehova i te mau ravea faufaa no te tauturu i tei anaanatae ra.—Isaia 60:22.

• Video ravehia mai i te mau avaˈe atoa

• Taata tei nati nei i te mau avaˈe atoa

• Mati 2013: Ua haamanahia te tapao o te reni jw.org

• Tiurai 2014: Te vai ra te reo aparaa rima i nia ia jw.org

• Atopa 2019: Ua faaapîhia te Omuaraa o te reni jw.org ia anaanatae atu â te taata

• Tenuare 2021: Ua faaarahia e matara mai te buka Ia ora oe e a muri noa ˈtu!