I te haamataraa o te avaˈe Atete 2024, ua tupu te hoê vero i nia i te moana Ataranitita. Oioi roa te reira i te riro mai ei mataˈi rorofai tuhaa hoê piihia Debby. I muri iho, i te 5 no Atete 2024, ua tapae teie mataˈi rorofai i te tuhaa fenua i pihai iho i te oire o Steinhatchee, i Floride, i Marite. Ua itehia te mau mataˈi tei naea hau atu 130 kilometera i te hora. Ua faatupu atoa te mataˈi rorofai hau atu 12 puahiohio. Ua faaere te mataˈi puai e te ûa rahi i te uira i roto hau atu hanere tausani fare. Ua pohe 8 taata i Marite.

I muri iho, ua maru mai te puai o te mataˈi rorofai o tei tere maru noa i te pae Kanada. I te 9 no Atete, i Québec, ua faitohia e 22 tenetimetera ûa tei topa aita e 24 hora ˈtura. Ua faaî te ûa rahi i te pape i roto i te mau nohoraa, ua tuino roa te reira i te mau paturaa e ua turai atoa i tau hanere taata ia horo i te hoê vahi papu aˈe no ratou. I Kanada, hoê taata tei pohe.

Marite

• Aita hoê aˈe o to tatou mau taeae e tuahine o tei pohe

• Ua tapeahia 1 taata poro i te fare maˈi

• E 23 taata poro o tei faarue i to ratou fare

• E 7 nohoraa o tei ino roa

• E 60 nohoraa o tei ino rii

• Ua ino rii 1 Piha a te Basileia

Kanada

• Aita hoê aˈe o to tatou mau taeae e tuahine o tei pohe, tera râ, ua pohe hoê piahi Bibilia i roto i te hoê heeraa fenua

• Ua pepe 1 taata poro

• E 23 taata poro o tei faarue i to ratou nohoraa, tera râ i teie mahana, ua hoˈi te rahiraa i to ratou fare

• E 2 nohoraa o tei ino roa

• E 165 nohoraa o tei ino rii

• Aita hoê aˈe Piha a te Basileia o tei ino aore ra o tei parari roa

• I Marite e i Kanada, ua horoa te mau tiaau haaati e te mau matahiapo i te tauturu i te pae materia e i te pae varua i te mau taeae e tuahine o tei roohia i te ati

• I Kanada, ua haamauhia te hoê Tomite tauturu i tei ati no te horoa i te tauturu i te mau taeae e tuahine o tei fifihia

Te tamau ra tatou i te pure no te feia tei faaruru i teie ati. Mea mahanahana ia ite o Iehova “to [t]atou faaoraraa i te taime ahoaho.”—Isaia 33:2.