I te 20 no Me 2023, ua horoa te taeae Mark Sanderson, mero o te Tino aratai i te hoê oreroraa parau no te avari i te Piha a te Basileia apî i te oire o Iqaluit, i te tuhaa fenua Nunavut i Kanada. E 44 taata tei tae tino roa mai i te rururaa e e 388 tei nati mai na nia i te natirara. Ua riro o Nunavut hoê o te mau vahi i nia i te fenua mea ateatea roa te faaearaa o te taata. Hau atu i te 39 000 taata te faaea ra i nia hau atu i te 1 837 000 kilometera tuea. Mai tei faaitehia i nia i te jw.org, e rave rahi fifi ta te mau taeae i farerei no te hamani i te Piha a te Basileia. Ma te itoito, ua faaruru te mau Ite tei haere matamua mai e poro i te toˈetoˈe e te fifi. Ua faahitihia te mau ohipa ta ratou i rave i te roaraa o te rururaa.

I te matahiti 1976, ua faarue te tuahine Margaret Gallie ia Québec no te haere e ora i 2 052 kilometera te atea i Iqaluit, i te tuhaa fenua Nunavut. O ˈna te Ite no Iehova matamua tei poro i tera tuhaa fenua ano e te rahi. I muri aˈe, i tera noa â matahiti, ua tere mai te taeae Hans Pintar tei tavini na ei tiaau haaati e ta ˈna vahine o Minerva, no te faaitoito ia tuahine Margaret e no te poro na muri ia ˈna.

I muri aˈe i te matahiti 1983, ma te itoito, ua tere te hoê pǔpǔ Ite no Iehova i Iqaluit. Ua rohi puai ratou no te faaite i te parau mau e riro mai nei te tahi utuafare tumu no ǒ ei Ite no Iehova. O ratou te feia matamua tei bapetizohia i tera tuhaa fenua. I te roaraa o na 20 matahiti i mairi, e rave rau feia poro itoito tei tere i teie fenua atea no te poro i te parau apî oaoa. I te matahiti 2008, ua haamauhia te hoê pǔpǔ i Iqaluit. I 2010, riro mai nei teie pǔpǔ ei amuiraa. E faatupuhia na ta ratou putuputuraa i roto i te hoê piha tuaro a te hoê fare haapiiraa. I Atopa 2022 râ, ua oaoa te mau taeae e tuahine i te avari i ta ratou Piha a te Basileia.

Taa ê noa ˈtu ia Iqaluit, te poro-atoa-hia ra e rave rau tuhaa fenua atea i Nunavut. I rotopu i te feia poro, te vai atoa ra te pionie taa ê mai ia taeae Joel Therrien e ta ˈna vahine o Cheryl. Ua haere raua e ora i Baker Lake i 1 329 kilometera te atea i te pae tooa o te râ ia Iqaluit. Te na ô ra te taeae Joel: “Noa ˈtu te toˈetoˈe, te atea e te haamâuˈaraa rahi, ua hoona maitai te mau haapaeraa atoa. Ua ite mâua i te haamaitairaa a Iehova, ua farii maitai mai te feia no Baker Lake ia mâua. Ua oaoa roa mâua i te faaiteraa i te poroi o te Bibilia i te feia e ora ra i ǒ.”

O Joseph Utatnaq hoê o te feia no Baker Lake tei farii maitai i te parau apî oaoa o te Faatereraa arii. Na taeae Joel i faatere i ta ˈna haapiiraa Bibilia e i 2021, ua bapetizohia o ˈna. Tae roa mai i teie mahana, o taeae Joseph anaˈe te taata poro i Baker Lake. I to ˈna iteraa te vai ra te hoê rururaa e avarihia ˈi te Piha a te Basileia i Me 2023, ua imi oia i te ravea ia tae mai iho â oia. Mai to ˈna bapetizoraa, a tahi ra o ˈna e farerei tino roa ˈi i te mau taeae e tuahine i roto i te hoê Piha a te Basileia. Te na ô ra o ˈna: “Ua faahiahia roa vau ua oti te Piha a te Basileia. E rave rahi tei haere mai e tauturu e ere ratou no ǒ nei, aita ratou i matau i te huru o te reva e te oraraa i ǒ nei. E haapapuraa tera i to ratou here ia Iehova e i to ratou taata tupu.”

I teie nei, 178 taeae e tuahine te tavini ra i roto e maha amuiraa i te mau tuhaa fenua i apatoerau. Hoê i Nunavut, e piti i te mau tuhaa fenua apatoerau tooa o te râ e hoê i Yukon. Ua porohia 40 i nia i te hanere o te taatoaraa o te mau tuhaa fenua i Kanada. No te toˈetoˈe rahi e te mataˈi puai i te pae apatoerau o Kanada, e ere i te mea ohie ia farerei i te feia e ora ra i teie mau tuhaa fenua atea. Noa ˈtu râ, e faaitoito iho â te mau taeae e tuahine i te poro i te parau apî oaoa na tera mau tuhaa fenua.—Ohipa 1:8.