I te 17 no Tetepa 2024, ua faaoti amui te Piha hororaa hopea o te Tiripuna Europa o te tiaraa o te taata ia faaturahia te tiaraa o te taata maˈi ia maiti i te ravea rapaauraa tei tuati i ta ˈna mau tiaturiraa. E faaotiraa faufaa mau teie! No te aha? No te mea, i teie nei, e titauhia ia faatura Paniora, oia atoa na 46 fenua i roto i te Apooraa no Europa, i te tiaraa o te taata maˈi ia maiti i ta ˈna rapaauraa.

I Tiunu 2018, ua haere te tuahine Rosa Pindo Mulla, e 47 matahiti to ˈna, i te fare maˈi no te hoê rapaauraa ohie roa. Ua papai e ua horoa aˈena Rosa i ta ˈna mau faaueraa i te pae rapaauraa i te mau taote. Ua faataa atoa o ˈna e ia au i ta ˈna mau tiaturiraa e to ˈna manaˈo haava haapiihia e te Bibilia, eita o ˈna e farii i te pâmuraa toto. (Ohipa 15:28, 29) Ua tuuhia ta ˈna mau faaueraa i roto i ta ˈna mau haamaramaramaraa no te mau taote. Noa ˈtu râ, ma te ore e ani ia Rosa, ua faatia te hoê haava i te mau taote ia rave i te hoê tâpûraa atâta mau i nia ia Rosa e ia pâmuhia o ˈna i te toto. I muri iho, ua haapeapea roa Rosa a faaroo ai e aita te mau taote i tâuˈa i to ˈna mau hinaaro e ua pâmu ia ˈna i te toto.

A faaite ai i ta ratou faaotiraa i rotopu ia Pindo Mulla e Paniora, ua farii na 17 haava o te Piha hororaa hopea e “e tiaraa to te hoê taata paari tei maˈihia ia patoi” i te hoê huru rapaauraa ta ˈna e ore e hinaaro. Ua haapapu atoa te tiripuna e “hoê o te mau ture faufaa roa ˈˈe i te pae o te rapaauraa, o te faaturaraa ïa i te tiamâraa o te taata maˈi ia farii aore ra ia patoi i te hoê ravea rapaauraa.”

Ei fetii taeae tahoê na te ao, te oaoa nei matou i te faaotiraa a te tiripuna ia turu i te tiamâraa o te tuahine Pindo Mulla e o na mirioni taata ia maiti i te hoê ravea rapaauraa tei tuati i ta ratou mau tiaturiraa.