Mai te 28 no Fepuare tae atu i te 10 no Mati 2024, ua tupu te hoê faaiteiteraa buka piihia Libroferia Capel, i Asunción i Paraguay. I te mau matahiti atoa, e haere 10 000 taata i taua tupuraa ra. Mea anaanatae roa na ratou te reira noa ˈtu eaha to ratou faito matahiti. Ua faanaho atoa to tatou mau taeae e tuahine i te hoê vahi faaiteiteraa buka no te haafaufaa i te Parau a te Atua e e rave rau papai Bibilia itehia i nia jw.org. I te roaraa o tera tupuraa, ua apiti hau atu 160 taeae e tuahine i te reira ei rima tauturu. Ua faaitehia ta matou mau papai roro uira e neneihia na roto i te reo Guarani, te reo apǎraa rima Paraguay e te reo Paniora.

Ua ite te hoê taata i te paruai ua papaihia i nia iho e e nehenehe o ˈna e ani i te hoê haapiiraa Bibilia tamoni ore. Haere atura o ˈna i te vahi faaiteiteraa a te mau taeae. Ua faataa ratou ia ˈna eaha te tupu i te hoê haapiiraa Bibilia e ua faaite atu i te buka rairai Ia ora oe e a muri noa ˈtu! I muri aˈe i to ˈna taio-vitiviti-raa i te buka rairai, ua parau te taata: “Aita roa ˈtu vau i manaˈo e e nehenehe te Bibilia e pahono i tera mau uiraa atoa!” Ua oaoa atoa o ˈna i te haapii i te iˈoa o te Atua, oia hoi o Iehova. Ua ravehia te tahi mau faanahoraa no te haamata i ta ˈna haapiiraa Bibilia.

I te tahi atu taime, ua tauaparau te hoê taata i te hoê o to tatou mau tuahine i te vahi faaiteiteraa buka. Ua oaoa roa o ˈna i te iteraa e rave rau tumu parau i nia i ta matou reni natirara na roto i te reo Guarani, Guarani Mbya e Nivaclé. Ua haapopou o ˈna i te mau Ite no Iehova no te mau tutavaraa atoa ta ratou i rave no te huri i te mau papai Bibilia na roto e rave rau reo tumu.

Ua tauturu taeae Daniele Sarcone i roto i te faanahoraa i te ohipa i te faaiteiteraa buka e ua parau o ˈna: “Ua oaoa roa matou i te mau aparauraa atoa e te mau taata tei hinaaro e ite hau atu â no nia i te Bibilia.” I te roaraa o tera tupuraa, ua ani 13 taata e nafea ia fanaˈo i te hoê haapiiraa Bibilia.

Auê ïa te oaoa i te iteraa e rave rahi taata i Paraguay tei haapii no nia i te Bibilia e no nia ia Iehova! Ua taa ia tatou e mea rahi atu â o te hinaaro nei i te parau mau.—Salamo 119:160.