I te 6 no Eperera 2024, ua avarihia te mau paturaa apî o te amaa i Buenos Aires i Raparata e na taeae Jeffrey Winder, mero o te Tino aratai, i vauvau i te oreroraa parau avariraa. Fatata 500 taeae e tuahine tei putuputu mai i roto e toru vahi rururaa i te mau paturaa apî o te Betela no te porotarama avariraa. Ua apiti atoa mai e 5 844 taata i tera porotarama na roto i te ravea roro uira, mai te hoê Piha tairururaa i pihai iho i te oire o Ezeiza. Te mahana i muri iho, ua tupu te hoê putuputuraa taa ê i taua Piha tairururaa ra e ua haapurorohia te reira i te mau amuiraa atoa i Raparata e Uruguay. Ua taiohia 181 643 taata tei apiti i te porotarama.

Ua nehenehe te mau manihini e mataitai i te mau paturaa apî, e fanaˈo i te amuimuiraa mahanahana mau o te mau taeae e tuahine e e apiti i roto i te tahi atu mau tupuraa taa ê. I rotopu ia ratou, ua itehia 230 taeae e tuahine no 25 fenua. Ua ohipa atoa taeae Sergio Spaccasassi i roto i te paturaa i te mau tuhaa apî o te Betela i Raparata e te tavini ra o ˈna i teie nei i Équateur. No nia i te pǔpǔ taata rahi no te mau nunaa rau tei tae mai no te avariraa, ua parau o ˈna: “Te faaohipa ra Iehova i teie mau tupuraa taa ê no te tauturu i ta ˈna mau tavini ia piri atu â te tahi i te tahi mai te hoê utuafare.”

Ua tapao taeae Juan Carlos Nigro, mero o te Tomite amaa no Raparata: “Ua ite matou e nafea Iehova i aratai e i haamaitai ai i te mau tuhaa atoa o tera ohipa paturaa. Na ˈna i horoa mai i teie Betela nehenehe mau o te faahanahana ra i to ˈna iˈoa.”

Mai to tatou mau taeae e tuahine i Raparata, te haamauruuru nei matou ia Iehova no teie mau paturaa apî o te Betela, o ˈna hoi te “faanehenehe . . . i te mau mea atoa i to ratou tau mau.”—Koheleta 3:11.