Mai te 20 no Me tae atu i te 11 no Tiunu 2023, ua tupu te haruraa auˈa o te FIFA U-20 i roto maha oire rahi i Raparata. Ua taiohia hau atu 400 000 ratere tei apiti mai i tera tataˈuraa e toru hebedoma te maoro. Ua tuuhia te mau vairaa papai afaifai i te mau vahi atoa e i te mau taime atoa. Fatata 500 taeae e tuahine tei apiti i teie huru pororaa e ua operehia hau atu 500 papai. Ua arataihia e rave rahi taata i nia i te jw.org no te pahono i ta ratou uiraa.

Ua tapiri mai hoê taata i te vairaa papai afaifai e ua faataa oia e mea au na ˈna ia faaroo i te mau haruharuraa audio ia haere oia e faaetaeta ia ˈna. Ua faaite hoê o to tatou mau taeae ia ˈna i te jw.org e ua faataa nafea ia rave mai i ta tatou mau papai audio. Ua parau teie taata e tuu oia i ta tatou mau papai audio i roto i ta ˈna tapura haruharuraa audio.

No te mau ratere tei apiti i teie tataˈuraa, ua tuuhia te mau vairaa papai afaifai e te mau papai na roto e iva reo. Hau atu â, ua haapii e rave rahi feia poro e nafea ia aroha na roto e rave rau reo no te paraparau i te feia tei tapiri mai i te vairaa papai afaifai. Ua faaite hoê o to tatou mau taeae tei apiti i teie huru pororaa: “Ua tauturu te pororaa i te feia no e rave rahi fenua ia ite e mea hamani maitai e e mea maitiiti ore Iehova. Ua oaoa roa vau.”

Te vahi au roa, ua vaiiho te feia faanaho i te tataˈuraa i te mau Ite no Iehova ia tuu i ta ratou vairaa papai afaifai i te mau vahi aita e faatiahia i te mau taata ia putuputu. Ua parau hoê o te taata tei faanaho i te tataˈuraa: “Ua matau matou i te mau Ite no Iehova e aita ratou e haafifi i te tereraa o te tataˈuraa.” Ua vaiiho ïa ratou i te hoê hiˈoraa maitai i te feia paruru.

Mea faaitoito mau ia ite i te mau tavini a Iehova o te tutava ra i te poro i te mau taata e i te ueue i te huero o te parau mau no nia i te Faatereraa arii na te ao nei.—Koheleta 11:6.