Ua faanahohia te hoê faaiteiteraa i te fare vairaa taihaa no nia i te Taparahiraa a te mau Nazi, i Buenos Aires i Raparata. Ua piihia te reira “Te mau poro toru vareau: Hoê aamu no nia i te itoito e te faaoromai.” Ua haamata tera faaiteiteraa i te 3 no Eperera 2024 e e hope i te 4 no Atete 2024.

Ua hamani-ino-hia hau atu 16 000 Ite no Iehova no te mea ua patoi ratou i te rave i te tau faehau e i te turu i te mau Nazi. Ua tuuhia 4 500 Ite no Iehova i te mau aua haavîraa e ua pohe 1 750 tiahapa o ratou. Ua faahepohia te mau Ite no Iehova ia oomo i te hoê ahu a te feia mau auri, ua nirahia i nia iho te hoê poro toru vareau.

E toru tuhaa to tera faaiteiteraa. Ua faaohipahia te mau tuatapaparaa e faatiaraa a te feia tei ite eaha tei tupu i taua tau ra no te faaite e nafea te mau Ite no Iehova i vai taiva ore ai e i tamau ai i te faaoromai i te mau fenua haruhia e te mau Nazi. Ua faaineinehia te mau haruharuraa o te horoa i te mau haamaramaramaraa hau, te hoê afata teata e nehenehe e pitopito i nia i te paruai e e rave rau video na roto i te reo apǎraa rima Raparata, te reo Beretane e Paniora. E ite-atoa-hia te mau taata aratai o te tauturu i te feia mataitai i te roaraa o te faaiteiteraa.

I tera faaiteiteraa, e itehia te hoê neneiraa o te parau mana ta te mau Nazi i faaohipa no te turai i te mau Ite no Iehova ia faaea i te tavini i te Atua. Ua faahepo tamau te mau Nazi i te mau taeae e tuahine ia tarima i tera parau mana e faaite ra e ere faahou ratou i te Ite no Iehova. Ia tarima ratou, e nehenehe ratou e faarue i te aua haavîraa. Mea iti roa te mau taeae e tuahine tei tarima. Hoê tuhaa faahiahia roa o te faaiteiteraa, o te taime ïa e nehenehe ai te feia mataitai e ora i tera huru tupuraa a feruri atu ai eaha ta te mau Ite no Iehova i faaruru. E faaitehia te parau mana a te mau Nazi i te feia mataitai e e faaitoitohia ratou ia feruri i nia i te itoito e te faaotiraa papu titauhia no te patoi i te tarima i te reira.

I muri aˈe i to ˈna apitiraa i te faaiteiteraa, ua parau te aivanaa Isabel Burnstein, hoê vahine e tuatapapa ra i te Taparahiraa a te mau Nazi: “E tauturu te faaiteiteraa i te feia mataitai ia taa e nafea te mau Ite no Iehova i paturu ai i ta ratou mau tiaturiraa e i haa ˈi no te rave i te mea tano no ratou. I roto i te hoê ao aita te taata e haafaufaa faahou ra i te mea tano, e tauturu mai ta ratou mau faatiaraa ia paturu papu i te mea faufaa no tatou e ta tatou mau tiaturiraa.”

Mai to ˈna matararaa iho â mai, ua haere hau atu 8 400 taata i tera faaiteiteraa. Ua parau taeae Marcos Donadío, hoê auvaha a te mau Ite no Iehova i Raparata: “Te vai ra te taata aita i matau i te mau Ite no Iehova. E nehenehe ïa tera faaiteiteraa e tauturu ia ratou ia taa maitai atu â i to matou aamu e ta matou mau tiaturiraa. Ia nehenehe e rave rahi taata e apiti i tera faaiteiteraa!”

Mauruuru maitai no tera faaiteiteraa o te faaite i te itoito e te taiva ore o te mau Ite no Iehova. Ia nehenehe to ratou hiˈoraa maitai e tauturu mai ia vai puai noa “e tae noa ˈtu i te hopea”!—Korinetia 1, 1:8.