Mai te 21 tae atu i te 29 no Atopa 2023, ua faatupuhia te 66raa o te faaiteiteraa buka nunaa rau i Belgrade, Serbie. Ua hau i te 190 000 taata tei tae mai i taua tupuraa ra. I to ratou vahi faaiteiteraa, ua faaite te mau Ite no Iehova e nafea te Parau a te Atua e haamaitai ai i te oraraa o te taata. Ua hau atu i te 100 taeae e tuahine tei tauturu i te taata ia ite i te mau pahonoraa Bibilia no nia i te mau uiraa faufaa roa.

Ua haere mai te hoê vahine i to tatou vahi faaiteiteraa e ua parau o ˈna i to tatou tuahine e mea rahi ta ˈna mau uiraa no nia i te Bibilia. Ua oaoa roa o ˈna i te farerei i te hoê taata o te tauturu ia ˈna ia ite mai i te mau pahonoraa. Ua faaoti raua i te farerei faahou i te tahi atu taime.

Ua rave mai te hoê taurearea i te buka rairai Mea poietehia anei? (Farani). Ua tiaturi o ˈna i te Atua, tera râ mea fifi no ˈna ia taa maitai te aamu Bibilia no nia i te poieteraa. Ei hiˈoraa, ua hinaaro o ˈna e ite e ua poiete mau anei te Atua i te mau mea atoa e ono noa mahana. Ua anaanatae roa o ˈna i to te mau Ite no Iehova faaiteraa ia ˈna te hoê tumu parau no nia i te reira i nia i te jw.org.

Ua anaanatae roa o na piti taurearea vahine i te buka 1 e te 2, Pahonoraa i ta te feia apî e uiui nei. Ua oaoa roa raua i te iteraa e rave rau tumu parau faufaa mau mai e nafea ia ite te hoa mau, ia manuïa i te fare haapiiraa e eaha mau na te here mau. Ua na ô hoê o raua: “Mea faahiahia mau taua mau buka ra. E taio iho â mâua i te reira!”

Te hinaaro nei tatou e haamauruuru i to tatou mau taeae e tuahine no Belgrade no te ohipa ta ratou i rave i te vahi faaiteiteraa buka nunaa rau. Ia haamaitai noa Iehova i ta ratou mau tutavaraa no te “faaite i to ˈna iˈoa i te taata atoa.”—Hebera 13:15.