I Thaïlande, mai te 28 no Mati e tae atu i te 8 no Eperera 2024 ua tupu te 22raa faaiteiteraa buka i Bangkok. Fatata piti mirioni taata te tae mai i taua faaiteiteraa buka o tei faatupuhia i te Queen Sirikit National Convention Center. Ua faanaho to tatou mau taeae i te hoê vahi faaiteiteraa, ia nehenehe te taata e ite te aratairaa Bibilia no nia i te ea i te pae feruriraa e te hepohepo rahi. Ua haamata to tatou mau taeae e tuahine e rave rahi aparauraa. Hau atu â, ua noaa ia ratou e 34 aniraa haapiiraa Bibilia.

I roto i te hoê aparauraa, ua faaite i te hoê taata i to tatou mau taeae, e hepohepo rahi to ta ˈna tamahine. Ua horoa to tatou mau taeae i te mau manaˈo Bibilia faaitehia i roto i Te Pare Tiairaa N^o 1 2023, “Te ea i te pae feruriraa: Tauturu a te Bibilia.” No ite hau atu â te mau haamaramaramaraa no nia i te oraraa utuafare oaoa, ua faaitoitohia to tatou mau taeae ia ˈna ia haere i nia i te jw.org. Ua mauruuru rahi roa taua taata ra no te mau aratairaa papu a te Bibilia e ua ru o ˈna i te faaite i te reira i ta ˈna tamahine.

Ua haere mai te hoê tia faatere a te hau e mataitai i ta tatou faaiteiteraa buka e ua paraparau maoro o ˈna e te hoê o to tatou mau taeae. I muri iho i to ˈna mataitairaa e rave rahi video i nia i te jw.org, mea rahi ta ˈna mau uiraa no nia i te mau Ite no Iehova e ta ratou ohipa haapiiraa Bibilia. Ua tapao o ˈna e te pûpû nei tatou i te mau haapiiraa Bibilia ma te tamoni ore. Ua ani teie tia faatere, “Mea nafea ia haapii i te Bibilia?” Faaite atura te taeae i te buka rairai Ia ora oe e a muri noa ˈtu! e mea nafea te tereraa o te haapiiraa Bibilia. Ua faanaho te mau taeae i te hoê aparauraa e o ˈna i te tahi atu â taime.

Ua faaite te hoê tuahine i ta tatou reni natirara i te hoê vahine, e ua faataa o ˈna e nafea te tupuraa o ta tatou ohipa pororaa. Ua ani teie vahine: “Eaha te tahi atu ohipa ta outou e rave nei?” Ua faaite te tuahine i te video Eaha te ravehia i te hoê Piha a te Basileia? Ua mataitai maite o ˈna i te video e ua parau oia: “Mea mahanahana mau e te farii maitai ta outou mau putuputuraa! E hinaaro vau e haere atoa.” I te hebedoma i muri iho, ua tere teie vahine e piti hora no te haere i te putuputuraa.

Mea oaoa te iteraa i te ohipa ta to tatou mau taeae e tuahine i Bangkok i rave no te tauturu i te taata ia ite “te hau o te Atua, tei hau ê i te mau manaˈo atoa.”—Philipi 4:7.