Mai 13 no Eperera tae atu i te 27 no Eperera 2024, ua apiti te mau Ite no Iehova no Zimbabwe i te hoê pororaa taa ê na roto i te reo Chitonga no Zimbabwe. I tera fenua, e 300 000 tiahapa taata te paraparau ra i te reo Chitonga. Te ora ra te rahiraa o ratou i roto i te mau oire iti i te pae apatoerau tooa o te râ o te mataeinaa no Binga. Tera râ, e ere i te mea ohie ia poro i te mau taata atoa i taua mau vahi ra no te mea e 300 tiahapa noa Ite no Iehova o te tavini ra i roto e vaˈu amuiraa reo Chitonga.

E rave rahi taata tei faaite i te anaanatae i te parau apî oaoa i te roaraa o tera pororaa taa ê. Ei hiˈoraa, i roto i te hoê amuiraa, e 77 taata tei titau-manihini-hia e tei haere i te putuputuraa o te hopea hebedoma matamua roa o te pororaa taa ê. Hau atu, i te putuputuraa o te hopea hebedoma i mua ˈtu, ua tae atu 126 taata tei titau-manihini-hia. I te pae hopea, ua haamatahia hau atu 2 000 haapiiraa Bibilia.

I te hoê mahana, ua haere te mau taeae i te tahi oire iti e ua paraparau ratou i te hoê vahine e ta ˈna mau tamarii. Ua ani atu te mau taeae i te vahine ia nehenehe ratou e farerei i te raatira o te oire iti. I te taeraa mai te tane a teie vahine, ua faaite atu o ˈna e o ˈna te raatira o te oire iti. Ua au roa o ˈna i te tura ta te mau taeae i faaite atu ia ˈna, no te mea ua ani ratou ia farerei ia ˈna hou a haere ai i roto i teie oire iti. Ma te oaoa, ua faaite atu taua taata ra i ta ˈna Bibilia na roto i te reo Chitonga. Ua faaite ïa te mau taeae ia ˈna eaha te ravehia no te haamata i te hoê haapiiraa Bibilia. Hau atu, ua rave ratou i te mau faanahoraa ia nehenehe o ˈna e tamau i ta ˈna haapiiraa Bibilia. Ua farii atoa teie taata ia haere te mau taeae e poro i te tahi atu mau vahi o te oire iti i raro aˈe i ta ˈna aratairaa.

Ua haere e piti taeae e poro i te hoê oire a farerei atu ai raua i te hoê taata tei parau atu e e Ite no Iehova o ˈna. Ua faataa atu taua taata ra e ua poro te mau Ite no Iehova i to ˈna metua tane i 1993. Ua faaite atoa tera taata e i haamata na to ˈna metua tane i te hoê haapiiraa Bibilia i tera matahiti. Tera râ, pinepine te metua tane e to ˈna utuafare i te taui i to ratou vahi nohoraa. No reira te metua tane i ore ai i tamau i ta ˈna haapiiraa Bibilia. Ua faaoti papu na taeae e piti e farerei i te metua tane o tera taata. No reira, te mahana i mua ˈtu, ua hahaere raua hoê hora e te afa i te maoro no te tapae atu i te oire iti o te metua tane. Oaoa roa te metua tane i te iteraa ia raua. Ua faaite o ˈna ia raua e ua pure noa o ˈna e ta ˈna vahine ia haere te mau Ite no Iehova e farerei ia raua. Ua farii te utuafare taatoa i te hoê haapiiraa Bibilia e ua haere pauroa ratou i te putuputuraa o te hebedoma. E ere râ o ratou anaˈe, ua titau manihini atoa ratou i te hoê taata tapiri.

Ua titau manihini te hoê tuahine, o Alicia to ˈna iˈoa, i te hoê vahine ruhiruhia i te putuputuraa e ua farii oioi te vahine i tera titau-manihini-raa. I to Alicia haereraa e tii ia ˈna, e ere o ˈna anaˈe, ua titau manihini atoa te vahine ruhiruhia i te hoê hoa. I muri mai i te putuputuraa, ua na ô te vahine ruhiruhia: “Papu roa e tei rotopu te Atua ia outou ra. Ua farii outou ia ˈu ma te here e te mahanahana, hinaaro ïa vau e hoˈi faahou mai i te mau putuputuraa.”

Oaoa roa te mau taeae e tuahine i Zimbabwe no te mea e rave rahi taata tei faaite i te anaanatae i te roaraa o teie pororaa taa ê. Te haamanaˈo mai ra te reira ia tatou e e rave rahi atu â taata o te faaroo i te parau apî oaoa a tamau ai tatou i te poro i te mau vahi atoa o te fenua.—Koheleta 11:6.